Search form

Marcos 8

Is Kepekeena te Heepat he Libu he Menge Etew

(Marcos 8:1-10; Mateo 15:32-39)

1Ne nepipira pa he menge andew zutun nengeamur-amur en maan diyà te ki Jesus is utew mezakel he menge etew. Ne hein neeminan dan en te lutù, mid-umew ni Jesus is menge sumusundan din, ne ke sikandin te, 2“Kehizu kayi te menge etew su tetelu en he kezukileman is wazè dan medsuwey kenitew ne wazè dan en egkekaan. 3Ne emun ibpeulì ku sikandan te wazè dan mekekaan kela ke luyahi sikandan diyà te zalan, su is duma kandan ne meziyù is ed-ubpaan.” 4Ne midtavak haazà is menge sumusundan din te, “Meziyù heini te menge valey. Ne wazè tew egkekuwaan te ibpekaan kayi te utew mezakel he menge etew.” 5Ne ke si Jesus te, “Pira he vuuk is supas niw?” Ne ke sikandan te, “Pitu he vuuk.”

6Ne migkeg̵iyan ni Jesus haazà is menge etew he mebpememinuu zan diyà te tanà, ne migkuwa zin haazà is pitu he vuuk he supas ne mibpeselematan din te Megbevayà, ne zutun mibpenevìtevì din. Ne minsan pa zutun kenà egkeamin haazà is edtevien din. Ne indata zin dutun te menge sumusundan din wey zan ikepemeg̵ey zutun te menge etew. 7Ne zuen daan dutun pira he leg̵as he zeisek he pait ne hein nepeselematan din en insug̵ù din he ipemeg̵ey zaan haazà dutun te menge etew. 8Ne pudu nengehantey haazà is menge etew he nemekekaan dutun. Ne is nesamà dutun te menge tinevì he supas wey pait, ne pitu he vinevey. 9Menge heepat he libu is kezakel zutun te menge etew he nengehantey zutun. 10Ne impemeulì ni Jesus sikandan. Ne zutun, si Jesus wey is menge sumusundan din, mid-untud dan te avang ne midhendiyè dan te tanà he Delmenuta.

Is Ebpen-ahà te Singyal

(Marcos 8:11-13; Mateo 16:1-4)

11Ne hein nekeuma zan en, midhendiyà te ki Jesus is menge Perisiyu ne mibpekidlewanè dan kandin. Migkeg̵iyan dan sikandin he mebpaahà sikandin te singyal he egkein-inuwan he tuus he sug̵ù sikandin te Megbevayà. Umba migkag̵i zan haazà su egezaman dan sikandin. 12Ne haazà, inmesakit te g̵ehinawa ni Jesus ne ke sikandin diyà te kandan te, “Sikiyu is menge zuma ku he menge Hudiyu, maan is egkinahanglan kew he mekeehè kew te egkein-inuwan he singyal ne human kew edtuu? Benar utew is egkeg̵iyen ku keniyu he wazà singyal he ibpaahà keniyu.” 13Ne zutun mid-ewaan eni Jesus haazà is menge etew. Mid-untud dan en maan te avang su edlayun dan dutun te ranew.

Is Ketudluanan te Menge Perisiyu Wey is ki Hirudis

(Marcos 8:14-21; Mateo 16:5-12)

14Sengevuuk dà he supas is dutun te kandan su nelipat is menge sumusundan din he ed-uwit te supas he egkelutù dan. 15Ne zutun duen sempità he impezineg kandan ni Jesus. Ibpesavut din he likayi zan is menge mezaat he vetasan te menge etew. Ke sikandin te, “Andam kew wey niw melikayi is tapey te menge Peresiyu wey is tapey te menge sakup ni Hadì Hirudis.” 16Wazè dan mesavut he kenà iyan is tapey te supas egkeg̵iyen din ne mibpelelelag̵è dan te, “Iyan ingkeg̵iya zin kayi su wazè kiw mekeuwit te lutù tew he supas.” 17Ne netuenan ni Jesus ke hengkey is diyà te isip dan ne ke sikandin te, “Maan is egkesemukan kew te wazè kew mekeuwit te supas? Kenè kew pe bes ebpekesavut? Henduen te wazè niw isip. 18Duen niw mata, iyan, henduen be te kenè kew ebpekeahà. Duen niw telinga ne henduen be te kenè kew ebpekezineg. Nengelipatan niw ve sikan is mid-ulaula ku? 19Su hein mibpenevìtevì ku sikan is lelima he vuuk he supas he impekaan duen te lelima he libu he menge maama, pira he vinevey is nengepenù niw te nengesamà he menge tinevì he supas?” Ne zutun midtavak dan te, “Sepulù wey zezuwa.” 20Ne mid-uman med-insà si Jesus te, “Ne hein mibpenevìtevì ku sikan is pitu he vuuk he supas he impekaan duen te heepat he libu he menge etew, pira he vinevey zutun is nengepenù niw te nengesamà he tinevì?” Ne midtavak dan te, “Pitu he vinevey.” 21Ne migkag̵i si Jesus diyà te kandan te, “Ne egkesavut niw human buwa he kenà supas is igkeseeng tew.”

Is Kebewii Zuen te Lakap Diyà te Bitsayda

22Ne nekeuma zan diyà te inged he Bitsayda ne zuen menge etew zutun he mid-uwit dan diyà te ki Jesus is sevaha he lakap. Ne midhengyuan dan si Jesus he zempaa zin haazà wey meulii. 23Ne mid-ag̵ak ni Jesus haazà is lakap pehendiyà te g̵awas dutun te inged. Ne mid-ilevan ni Jesus is menge mata zutun te lakap ne midampè din, ne mid-insaan din ke zuen be egkeehè din. 24Ne nenlangulangu haazà is lakap ne ke sikandin te, “Egkeehè ku is menge etew he henduen be te menge kayu he ebpenhiphipanew.” 25Ne zutun mid-umanan dempaa ni Jesus haazà is mata zutun te lakap. Ne zutun mibpurung mebpenlangulangu haazà is lakap ne egkemelmeleg̵an din en is menge etew te ed-ahà su mibmeupiye en is mata zin. 26Ne migkeg̵iyan ni Jesus haazà is etew he medtandang en med-ulì ne kenè en mebpenuluytuluy pa maan minsan dutun te inged.

Is Migkag̵i ni Pedro Mehitenged ki Jesus

(Marcos 8:27-30; Mateo 16:13-20; Lucas 9:18-21)

27Ne zutun, midlaus si Jesus wey is menge sumusundan din su edhendiyè dan te menge inged he ziyà te uvey te inged he Sisarya Pilipus. Ne zutun te ziyè dan te zalan mid-insaan din is menge sumusundan din te, “Hentei e kun sumalà te ked-isipa kediey te menge etew?” 28Ne midtavak dan te, “Duen egkag̵i he iyan ka si Juan Megbebewtismu he nevanhew ne zuen daan egkag̵i he iyan ka sikan is tipehuna he si Elias, ne egkag̵i is duma pa he sevaha ka zuen te menge tipehuna zengan he ebpeneuven te Megbevayà.” 29Ne zutun mid-insaan din sikandan te, “Ne sikiyu zaan, hentei e man sumalà is ked-isipa niw kediey?” Ne zutun midtavak si Pedro te, “Iyan ka sikan is mibpilì te Megbevayà he ibpahadì din te menusiyà.” 30Ne zutun migkeg̵iyan sikandan ni Jesus he kenè dan tudtula haazà diyà te minsan hentei.

Is Kegkeg̵iya ni Jesus te Kemetayen Din

(Marcos 8:31-38; Mateo 16:21-28; Lucas 9:22-27)

31Ne zutun impesavut ni Jesus te menge sumusundan din is imbanglis kandin. Ke sikandin te, “Siak is Kakey te Menusiyà, mezakel is menge kemeresayan he ibpaantus kediey. Edsumpeliten a te menge ebmeg̵urangen te menge Hudiyu wey te menge punuan he memumuhat wey te menge menunudlù te kesug̵uan. Edhimetayan e zan ne seled te tetelu he andew zutun egkevanhew a.” 32Ne mibpurungan din seysaya is egkeulaula zin. Ne hein nezineg ni Pedro haazà, ne insivey zin si Jesus ne migkeg̵iyan din te kenà haazà egkehimu is egkeulaula ni Jesus. 33Ne zutun midsineruwan ni Jesus haazà is menge sumusundan din ne migkeg̵iyan din si Pedro te, “Sikew is ed-iring ki Setanas, awè ka zini te kediey, su wazà diyà te isip nu is egkesuatan te Megbevayà, kekenà, iyan diyà te isip nu is egkesuatan te etew!”

34Ne zutun impeuvey ni Jesus diyà te kandin is menge etew wey menge sumusundan din. Ne ke sikandin te, “Ke zuen egkesuat he edsundan kedì, kinahanglan he iawè din diyà te isip din is kandin he egkesuatan he menge ulaula, ne tianga zin is krus din, he ke và dà egkeg̵iya, kinahanglan he edtumanen din is menge sug̵ù ku minsan pa ke iyan ibpatey zin. Ne human ebpekesunud kedì. 35Su ke zuen etew he egkenug̵unan din is untung din, ebpatey g̵ihapun. Iyan, ke zuen etew he minsan ibpatey zin pa ne edsunud kedì wey edsangyew te Meupiya he Tudtulanen, id-ulì te Megbevayà diyà te kandin is untung din ne kenè en sikandin ebpatey te wazà pidtemanan. 36Minsan ke maangken pa te etew is tivuuk he kelibutan, wazà pulus diyà te kandin ke kenà sikandin ebeg̵ayan te untung he wazà pidtemanan. 37Su wazà minsan hengkey he azen he igkeliwè din wey zin maangken is untung he wazà pidtemanan. 38Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index