Search form

Mateo 19

Is Ketudluanan Mehitenged te Kebpeengkezà

(Mateo 19:1-12; Marcos 10:1-12)

1Ne hein ingkepenurù en ni Jesus haazà is langun, mid-awà sikandin diyà te prubinsya he Geliliya ne midhendiyà te Hudiya, diyà layun te wahig he Hurdan. 2Utew mezakel he menge etew is nemenduma kandin, ne mibewian din is egkengezeruwan dutun ne nengeulian.

3Duen menge Perisiyu zutun he midhendiyà te kandin su ebpengahaan dan te paag̵i sikandin wey zan ikesumbung. Ne mid-insaan dan sikandin te, “Intug̵ut be te kesug̵uan is ked-engkezi ta te esawa ta minsan ke wazè ta utew ketezengan?” 4Ne midtavak si Jesus te, “Wazè niw ves mevasa sikan is insurat he Lalag te Megbevayà 5he edhenduen te, ‘Dengan te kedlimbag̵a te Nengazen te langun, mibeelan din is maama wey vahi. Tenged kayi ed-ewaan te maama is amey zin wey iney zin ne ebpengesawa te vahi ne zutun egkesevaha sikandan.’ 6Ne tenged kayi,” ke si Jesus, “kenè en maan dutun dezuwa he etew haazà is teleesawa, kekenà, sevaha zà, ne tenged kayi zaan kenà egkehimu he ipedsuwey te etew is midsevaha te Megbevayà.” 7Ne mid-uman med-insà is menge Perisiyu te, “Ne maan is intug̵ut ni Moises diyà te maama he veg̵ayi zin dà is esawa zin te kemetuuzan te kebpekidsuwey emun egkesuatan din he meengkezi zin haazà is esawa zin?” 8Ne midtavak si Jesus te, “Intug̵ut ni Moises is kedsuwayi niw te esawa niw su g̵eina te edsumpeliten niw is penurù, iyan, dengan te kedlimbag̵a te langun, wazà itug̵ut heini te Megbevayà is kebpekedsuwey te teleesawa. 9Ne tenged kayi egkeg̵iyen ku keniyu he ke zuen maama he ed-engkezan din is esawa zin he wazà sikandin is maama selselai zutun te esawa zin ne ed-uman ebpengesawa, ne haazà he maama, ebpekesalà dutun te nehuna he esawa zin tenged dutun te kebpengesawa zin.”

10Ne zutun migkag̵i is menge sumusundan ni Jesus te, “Emun iyan bes heini egkeulaula te telteleesawa meupiya pa ke kenà ebpees-eseweey is etew.” 11Ne midtavak si Jesus te, “Duen menge etew he imbanglis kandan te Megbevayà is kenà ebpekeesawa emun maama, ne kenà egkeesawa emun bahi; ne meupiya iyan haazà diyà te kandan, iyan, kenà meupiya te langun. 12Su kenè en ed-iring-iring is ketezengan te etew ke maan is kenè dan ebpengesawa wey egkeesawa. Is duma, kenà ebpekeesawa wey egkeesawa su iyan en haazà kegkeetew-etew zan; ne is duma zaan tenged te migkapun; ne is duma pa, kenà ebpekeesawa wey egkeesawa su wey zan metuman is insug̵ù kandan te Megbevayà tenged te kedhadì din. Sikan is ebpekezawat te kenè din kebpengesawa, wey ke kenè din kebpeesawa, ne meupiya ke edewaten din en.”

Si Jesus wey kes Dezeisey he Menge Vatà

(Mateo 19:13-15; Marcos 10:13-16; Lucas 18:15-17)

13Duen menge vatà he mid-uwit te menge etew ziyà te ki Jesus wey zin mezepeneti te palad din wey mepenubtuvazi. Ne midawey heini te menge sumusundan din. 14Iyan, migkag̵i si Jesus dutun te, “Ipehendini niw te kediey heeyan is menge vatà; ne kenè niw zewaya su is etew he zuen din kedsarig he iring te kedsarig te vatà ne iyan ebpekepahadì te Megbevayà.” 15Ne midepenetan din haazà is menge vatà ne mibpenubtuvazan din ne hein nepasad din haazà, ne mid-awà dutun.

Sikan is Sepian he Etew

(Mateo 19:16-30; Marcos 10:17-31; Lucas 18:18-30)

16Duen menguhed he etew he mid-uvey ziyà te ki Jesus he ed-insà te, “He Menunudlù, hengkey is meupiya he ed-ul-ulahan ku wey a meveg̵ayi te untung he wazà pidtemanan?” 17Ne midtavak si Jesus te, “Maan is id-insè nu kedì is meupiya he ed-ul-ulahan he sebsevaha zè man is ed-ulaula te meupiya ne wazè en duma, kekenà, iyan dà is Megbevayà. Ke egkesuat ka he meveg̵ayi ka te untung he wazè din pidtemanan, tumana nu is menge sug̵ù te Megbevayà.” 18Ne mid-insà haazà is etew te, “Hengkey he menge sug̵ù?” Ne midtavak si Jesus te, “Kenè ka mebunù; kenè nu selselai is esawa nu; kenè ka penakew; kenè ka tarùtarù; 19tehuza nu is amey nu wey iney nu; wey purungi nu is duma nu; isipa nu sikandin he iring te kenikew en he g̵ehinawa.” 20Ne migkag̵i haazà is etew te, “Is langun keniyan, ne mibentayan ku; hengkey pa is kurang ku he ebpeveelan kedì?” 21Ne migkag̵i si Jesus te, “Emun edheg̵eten nu pa, ulì ka ne ivelegyè nu is langun he menge azen nu, ne is halin, ibpemeg̵ey nu ziyà te menge egkengeayuayu, ne edsepian ka ziyà te langit. Ne ke egkeipus nu heeyan likù ka zini wey ka mekesundan kediey.” 22Ne hein nezineg heini zutun te menguhed he etew, ne mid-ulì he utew mibmesakit is gehinawa zin su utew zekelà is ketig̵eyunan din.

23Ne zutun migkag̵i si Jesus diyà te menge sumusundan din te, “Utew mereg̵en te sepian he etew is kebpesakup din te Megbevayà wey mehedii sikandin. 24Egkeg̵iyen ku keniyu he kenè din egkehimu. Melemu pa te kemilyu is kedseled din diyà te vudsi te rag̵um kenà te sepian he etew is kebpesakup din te Megbevayà wey sikandin mehedii.” 25Ne hein nezineg heini te menge sumusundan din utew zan neinuinu, ne ke sikandan te, “Emun kenà egkehimu te sepian, ne kenè bes egkehimu te minsan hentei is ked-angken te untung he wazà pidtemanan.” 26Ne zutun midtengtengan sikandan ni Jesus te egkag̵i te, “Kenà iyan egkehimu te etew; iyan, egkehimu mulà te Megbevayà he ibpaangken din is etew te untung he wazà pidtemanan su egkehimu zin is langun.”

27Ne zutun migkag̵i si Pedro te, “Ahaa nu man, mid-ewaan dey is langun he menge azen dey wey key mekesunud kenikew. Ne hengkey is idsuhul kenami?” 28Ne midtavak dutun si Jesus te, “Benar heini is egkeg̵iyen ku, siak is Kakey te Menusiyà, mekeg̵eg̵ehem a keuzemà te kedhadì ku emun egkeveg̵u en is langun; ne sikiyu is menge sumusundan ku, egkehedian niw zaan is menge kevuwazan te sepulù wey zezuwa he anak ni Israyil. 29Ne is minsan hentei he mid-ewaan din is baley zin, menge suled din, amey zin, iney zin, anak din, wey tanè din su edsunud sikandin kediey, egkezawat din is kenenggatus egketakep haazà is mid-ewaan din ne liyu zutun ibeg̵ey kandin is untung he wazà pidtemanan. 30Iyan, mezakel is menge etew g̵untaan he henduen be te zekelà is pid-etawan dan, iyan, utew minus is pid-etawan dan keuzemà. Ne mezakel zaan is etew g̵untaan he utew minus is pid-etawan dan, iyan, keuzemà, utew zekelà is pid-etawan dan,” ke sikandin.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index