Search form

Mateo 28

Is Kegkevanhew ni Jesus

(Mateo 28:1-10; Marcos 16:1-10; Lucas 24:1-12; Juan 20:1-10)

1Ne hein neiwas haazà is Andew te Kedhimeley te meg̵aan egkepawà dutun te andew he Duminggu, midhendiyà te penlevengà ensi Maria Megdelina wey kes duma zin, he Maria zaan is ngazan, su ed-ahaan dan sikan is surung. 2Ne zutun netekewtekew medlinug te utew mezesen. Ne zuen ebpuun diyà te langit he velinsug̵uen te Nengazen. Ne mibpenaug haazà ne in-awè din kes batu he inlekeb dutun te surung ne mid-untuzan din. 3Is dagwey zin, ne ebpekesirang su utew merayag, ne utew zaan meputì is ugelingen din. 4Ne nengehandek utew sikan is ebantey zutun he menge sundaru ne nengetentanan dan is wazà memekewaleng he ebpengerkeren.

5Ne sikan is menge vahi, migkeg̵iyan sikandan dutun te velinsug̵uen te, “Kenè kew mahandek. Netuenan ku he ebpen-ahaan niw si Jesus, sikan is inransang te krus. 6Wazè en dini su nevanhew en sumalà is migkag̵i zin keniyu. Hendini kew wey niw ahaa is midsevukan kandin. 7Ne g̵ègaani niw veyai is duma he menge sumusundan din. Ne keg̵iya niw ziyà te kandan he nevanhew en sikandin ne edhuna keniyu ziyà te Geliliya ne ziyè niw sikandin egkeuma. Ne kenè niw lipati heini is migkag̵i ku keniyu,” ke sikandin.

8Ne zutun, migaanggaan haazà is menge vahi med-awà dutun te surung. Nengehandek dan, iyan, nepenù is gehinawa zan te kelipey. Ne ebpelelag̵uy zan su ibpenudtul zan diyà te menge sumusundan he zuma. 9Ne netekewtekew zan te nesinug̵ung sikandan ni Jesus. Ne ke sikandin te, “Mebmelinawen kew.” Ne mid-uvey zan diyà te kandin. Ne mid-azap dan kandin is egawed te paa zin. 10“Kenè kew egkehandek,” ke si Jesus, “beyai niw is menge suled ku ne keg̵iyi niw he medhendiyè dan te Geliliya ne ziyè e zan egkeuma,” ke sikandin.

Is Tudtul te Impemevantey

11Ne hein neipus haazà is menge vahi, migenat daan is duma zutun te menge sundaru he impevantey zutun te surung. Midhendiyè dan te inged ne midtudtul zan ziyà te menge punuan he memumuhat is langun he neulaula. 12Ne is menge punuan, mibpekibitiyara te menge ebmeg̵urangen. Ne zutun mibeg̵ayan dan haazà is menge sundaru te zekelà he selapì. 13Ne migkeg̵iyan dan te, “Iyan niw tudtula te menge etew is: hein mezukilem nekelipezeng kew ne nekeuma is menge sumusundan ni Jesus ne midtakew zan is lawa zin. 14Ne emun egkezineg heini te gubirnedur, edlelag̵an dey para kenè kew zin mepeuki.” 15Ne midawat te menge sundaru haazà is selapì, ne midtuman dan haazà sumalà is migkag̵i kandan. Ne kemulu g̵untaan iyan edtudtulen te menge Hudiyu haazà is impepenudtul te menge punuan diyà te kandan.

Is Menge Telaan ni Jesus

(Mateo 28:16-20; Marcos 16:14-18; Lucas 24:36-49; Juan 20:19-23; Nengeulaula 1:6-8)

16Ne haazà is sepulù wey sevaha he menge sumusundan ni Jesus, midhendiyè dan te Geliliya, duen te vuvungan he migkag̵i kandan ni Jesus. 17Ne zutun neehè dan sikandin. Ne minsan te nezuwazuwa is duma kandan he edtuu mehitenged te kegkevanhew zin, dutun te kegkeahaa zan kandin, mid-azap dan kandin. 18Ne mid-uvayan sikandan ni Jesus, ne ke sikandin te, “Imbeg̵ey kedì is ke g̵ehem te kebayàbayà diyà te langit wey zini te tanà. 19Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin. 20Penurua niw sikandan he tumana zan sikan is langun he insug̵ù ku keniyu. Ne kenè niw lipati he layun a eduma keniyu taman te kenè pa egketapus heini is timpu.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index