Search form

Mateo 9

Is Kebewii Zuen te Etew he Mibinting

(Mateo 9:1-8; Marcos 2:1-12; Lucas 5:17-26)

1Ne zutun mid-untud en maan ensi Jesus te avang ne midlikù diyà te zehipag. Ne mid-ulì diyà te inged din. 2Ne nemekeuma is menge etew he ed-uwit diyà te ki Jesus te minatey is divaluy he lawa zin he ziyà ipehizeg̵à te zuyanà he ebintingen. Hein nesavut ni Jesus he zekelà is kedsarig dan kandin, migkeg̵iyan din haazà is minatey is divaluy he lawa te, “Mama, mebmeupiya is gehinawa nu, su nepesaylu en is menge salè nu.” 3Ne zuen dutun menge menunudlù te kesug̵uan; ne te kegkezineg̵a zan dutun, neisip dan he utew zekelà is supak ni Jesus te Megbevayà. 4Ne nesavut ni Jesus is diyà te isip dan ne migkeg̵iyan din sikandan te, “Maan is ed-isip kew te mezaat he iring keniyan? 5Hendei zapit is egkehimu te etew zà duen, iyan be is kebpesaylu te salè din wey ke iyan is kegkeulii kandin? 6Pinaag̵i te kebewii ku g̵untaan kayi te etew, ibpeehè ku keniyu he siak is Kakey te Menusiyà, duen ku keg̵ehem dini te lumpad te kebpesaylu te salà.” Ne zutun migkeg̵iyan din haazà is etew he minatey is divaluy he lawa te, “Sikew, Mama, enew ka; kuwaa nu heeyan is duyanè nu ne ulì ka.” 7Ne zutundutun mid-enew haazà is maama ne mid-ulì. 8Hein naahà heini te menge etew zutun, nengehandek dan ne midalig dan is Megbevayà tenged te mibeg̵ayan din is menusiyà te keg̵ehem he iring kayi.

Is Kedtewag̵a ki Mateo

(Mateo 9:9-13; Marcos 2:13-17; Lucas 5:27-32)

9Ne mid-ewaan sikandan ni Jesus ne zutun te ibayè din neehè din is menunukut te vuhis he egngezanan ki Mateo he zutun he timpu ebpimpinuu ziyà te upisina zin. Migkeg̵iyan ni Jesus te, “Sunud ka kedì.” Ne zutun midhitindeg si Mateo ne midsunud ki Jesus.

10Ne hein egkaan si Jesus wey is menge sumusundan din diyà te valey ni Mateo, mezakel is menge menunukut te vuhis wey menge etew he mesinupaken he nemekeuma ne nemengaan duma kandan. 11Duen menge Perisiyu he nekeahà dutun te menge etew. Ne migkeg̵iyan dan is menge sumusundan ni Jesus te, “Is egalen niw, maan is egkaan wey ed-inum duma te menge limbungan he menunukut te vuhis wey menge mesinupaken?” 12Nezineg haazà ni Jesus ne midtavak sikandin pinaag̵i te sempità, ke sikandin te, “Sikan is wazè din daru, ne kenà egkinahanglan he ebpevawì, kekenà, iyan dà sikan is duen din daru. 13Susiya niw ke hengkey is kehulug̵an duen te insurat he Lalag te Megbevayà he egkag̵i te, ‘Kenè ku iyan egkesuatan is kebpemuhat niw, kekenà, iyan egkesuatan ku is kebpekedhihizuwè niw.’ ” Ne mid-uman megkag̵i si Jesus te, “Siak, wazà a medhendini wey ku ikepeengked te ed-ulaula te mezaat is menge metazeng, kekenà, iyan is menge mesinupaken te Megbevayà.”

Is Insà Mehitenged te Kedsalang Kegkaan

(Mateo 9:14-17; Marcos 2:18-22; Lucas 5:33-39)

14Ne zutun nekeuma ziyà te ki Jesus is menge sumusundan ni Juan Megbebewtismu. Ne mid-insè dan te, “Is menge sumusundan nu, maan is kenè dan ebentayan is betasan tew he edsalang egkaan? Sikami mulà wey is menge Perisiyu, layun key edsalang egkaan wey zey mepurungi is ked-azap dey te Megbevayà.” 15Ne migkag̵i si Jesus diyà te kandan te, “Penenglitan, ke zuen eseweey kenà egkehimu he kenà edlipey is menge zuma te ebpengesawa ke kemulu zan pa zuma haazà is ebpengesawa. Ne zutun te timpu he ibpaawè en diyà te kandan sikan is ebpengesawa, human sikandan edsalang egkaan. Iring din ded daan is menge sumusundan ku su te kemulu e pa zini te kandan, kenè dan edsalang egkaan.”

16Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen. Ke sikandin te, “Is beg̵u he manggad he wazè pa megkenseng, kenà meupiya he idapi te kumbalà he merunut en, su emun ebpìpian, ne egkenseng ne egkevindas haazà is daan tenged dutun te veg̵u ne tuwas pa he meluag is kegkevindas dutun te kumbalà. 17Iring din ded daan sikan is binu he sikan pa ebeeli he idtag̵ù diyà te teleg̵uey te vinu he lundis te kambing, su kenà egkehimu he ziyà idtag̵ù te zaan he teleg̵uey su ebetu haazà is teleg̵uey ne egkeulaan is binu ne egkezeetan daan is teleg̵uey. Kinahanglan he is binu he sikan pa ebeeli, ne ziyà idtag̵ù te veg̵u he teleg̵uey. Ne zutun kenà egkezeetan haazà is binu wey haazà is teleg̵uey.”

Is Minatey he Vatà wey Sikan is Bahi he Zeruwanen

(Mateo 9:18-26; Marcos 5:21-43; Lucas 8:40-56)

18Ne te kemulu pa zutun egkag̵ikag̵i si Jesus, duen nekeuma he sevaha he pengulu te menge Hudiyu. Ne zutun midluhud sikandin diyà te etuvangan ni Jesus ne midhangyù he ke sikandin te, “Minatey g̵eina is anak ku he vahi, iyan, emun ebayaan nu ne edepenetan nu te velad nu ne egkevanhew sikandin.” 19Ne midhitindeg si Jesus ne miduma kandin, ne miduma zaan is menge sumusundan ni Jesus.

20-21Ne hein diyè dan en te zalan duen mid-uvey he sevaha he vahi ziyà te iniyug̵an ni Jesus. Ne haazà is bahi, duen din daru. Sepulù en wey zezuwa he tuig is kegkevusbusi kandin ne kenà ed-engked. Ne egkeisip din he emun egkekevit din is minsan kumbalè dà ni Jesus, egkeulian en sikandin. Ne zutun nekevit din is sidsid te kumbalà ni Jesus. 22Ne midlingì si Jesus ne neehè din haazà is bahi ne ke sikandin te, “Bayi, kenè ka mahandek; su umba neulian ka te zaru nu su midsarig ka kedì.” Ne zutundutun neulian haazà is bahi.

23Ne midlaus dan is edhipanew ne midseled si Jesus diyà te valey zutun te pengulu. Ne hein neehè din is menge memumulalà wey nezineg din is meg̵urub tenged te egkengeg̵isaweg he menge etew, 24ne migkeg̵iyan ni Jesus sikandan te, “Pemen-awè kew is langun. Wazà mebpatey heeyan is batà, kekenà, midlipezeng.” Ne mid-engitan dutun te menge etew si Jesus. 25Ne hein nemen-awè en haazà is menge etew, ne midseled si Jesus dutun te rug̵u te vatà. Ne migewezan din diyà te velad ne zutundutun mid-enew haazà is batà. 26Ne nevantug heini is neulaula ziyà te langun he menge siringan he menge inged dutun.

Is Kebewii Zuen te Zezuwa he Lakap

27Ne zutun te ked-awà ni Jesus dutun, midtelukun kandin is dezuwa he lakap. Ne haazà is menge lakap, mid-umew zan ki Jesus is edhangyù te, “Kehizuwi key kenikew, su iyan ka kes kevuwazan te hadì dengan he si David!” 28Ne hein mid-ulì en si Jesus diyà te valey zin, nekeuma zaan haazà is dezuwa he lakap. Ne migkeg̵iyan din sikandan te, “Edtuu kew ve he egkeulian ku is mata niw?” Ne midtavak dan te, “Uya, Datù, edtuu key.” 29Ne zutun midampà ni Jesus is mata zan ne ke sikandin te, “Berakat he meulii kew tenged te kedtuu niw.” 30Ne neulian is menge mata zan. Ne zutundutun nepuwasan is ked-ehè dan. Ne zutun migkeg̵iyan sikandan ni Jesus he kenè dan penudtula. 31Iyan, te ked-awè dan dutun nasì dan mibantug si Jesus diyà te langun he menge siringan dutun he inged.

Is Kebewii te Emew

32Ne zutun te wazè pa megenat haazà is menge lakap, nekeuma is menge etew he edumahan dan diyà te ki Jesus is maama he neemew su midsuukan te mezaat he mulin-ulin. 33Ne mibewian heini ni Jesus, ne segugunà dutun nekekag̵i haazà is etew. Ne nengeinuinu is langun he menge etew zutun, ne ke sikandan te, “Sikitew is menge kevuwazan ni Israyil, sikan tew pa maahà is iring kayi!” 34Iyan, migkag̵i is menge Perisiyu zutun te, “Is tekinan te menge mezaat he mulin-ulin, iyan mibeg̵ey kandin te g̵ehem wey zin mevewii is edlelungen te mezaat he mulin-ulin.”

Is Meluag he Legtayen

(Lucas 10:2)

35Ne neeneb ni Jesus is langun he menge inged dutun wey menge unayan. Mibpenurù din is menge etew zutun diyà te seled te menge simbahan dan wey impesavut din diyà te kandan is Meupiya he Tudtulanen te keag̵i te kedhadì te Megbevayà. Nengeulian din is menge etew te minsan hengkey he zaru wey ebpenggezamen dan. 36Ne kada zin egkeahà is mezakel he menge etew zutun, egkengehizuwan din sikandan su mezakel is menge seeng dan ne wazà ebpeketavang kandan. Iring sikandan te menge ayam he kerehidu he wazà ed-elima kandan. 37Ne migkag̵i si Jesus diyà te menge sumusundan din te, “Mezakel pezem is edawat te Meupiya he Tudtulanen. Iring sikandan te kamet he nelutuan en. Meluag heini is kamet, iyan, deisey kiw zà is ebpemenlegtey. 38Iampù niw ziyà te Nengazen he sug̵ua zin pa zini te kamet din is duma pa he ebpekelegtey.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index