Search form

Ruma 10

1Menge suled, utew ad egkesuat ke egkengelibri te silut te Megbevayà is menge zuma ku he Hudiyu ne iyan heini id-ampù ku layun te Megbevayà. 2Netuenan ku he utew mezesen is kedtumana zan te tuluuwen dan he kunaan dan ke egkesuatan te Megbevayà, iyan, wazè dan metueni is hustu he egkesuatan te Megbevayà. 3Su wazè dan dewata is paag̵i te Megbevayà te kebpeketerenga zin kandan. Ne iyan dan migamit is keugelingen dan he paag̵i he iyan is kedtumana te kesug̵uan ne wazè dan medsunud te paag̵i te Megbevayà te kebpeketerenga zin kandan. 4Su midhimu ni Kristu he wazè en pulus te kedsarig te kedtuman te kesug̵uan su wey is minsan hentei, pinaag̵i zà te kedtuu ki Kristu, ebpeketezengen sikandin te Megbevayà.

Is Kelibriyanan te Silut Para te Langun

5Iyan, duen insurat he lalag ni Moises mehitenged te kebpeketezenga te etew pinaag̵i te kedtumana te kesug̵uan he edhenduen te, “Is etew he iyan edserig̵an din is kedtumana zin te kesug̵uan, ne egkeveg̵ayan sikandin te untung he wazà pidtemanan emun wazà minsan hengkey he sayep dutun te kebpurungi zin kedtumana te minsan hengkey he insug̵ù dutun te kesug̵uan,” ke si Moises. 6Iyan, mehitenged te kebpeketezenga te etew he egkehimu pinaag̵i te kedtuu, duen daan insurat he lalag he edhenduen te, “Kenè niw isipa he wey ki zà ed-isipa te Megbevayà he metazeng ke zuen edhendiyà te langit wey meveyai si Kristu, 7ne kenè niw zaan isipa he kinahanglan he zuen edhendiyà te Iveyaan su ebenhawen si Kristu.” 8Su zuen duma pa he insurat he Lalag te Megbevayà he ebpesavut kenita he utew melemu is kebpeketuu ta te Lalag te Megbevayà su is Lalag te Megbevayà, daan dini te kenita, ne egkehimu he ibpenudtul ta te zuma. Ne heini is Lalag te Megbevayà mehitenged te kedtuu ki Kristu, ne iyan daan edtudtulen dey. 9Ne emun edtudtulen niw ziyà te zuma he iyan en Nengazen si Jesus, ne emun hustu is kedtuuwi niw he mibanhew sikandin te Megbevayà, egkelibri kew te silut te Megbevayà. 10Su pinaag̵i te isip ta ke edtuu ki ed-isipen ki te Megbevayà he metazeng, ne zutun ebpenudtulen ta ziyà te zuma is kedtuu ta ne human egkeheg̵et is kedlibriya kenita te silut. 11Su zuen insurat he Lalag te Megbevayà he edhenduen te, “Is minsan hentei he edsarig kandin, utew meupiya is edungguan din.” 12Su is Nengazen, wazè din ibpelavi te minsan hentei he etew, minsan ke Hudiyu wey ke kenà be Hudiyu, ne umba wazè din ibpelavi kayi su Nengazen sikandin te minsan hentei ne edtevangan din is minsan hentei he etew he ebpetavang kandin. 13Su zuen insurat he Lalag te Megbevayà he edhenduen te, “Is minsan hentei he ebpetavang te Nengazen, edlibriyen sikandin te silut te Megbevayà.”

14Iyan, kenà egkehimu he ebpetavang te Nengazen tew he si Jesu Kristu is menge etew he wazà meketuu kandin. Ne kenà daan egkehimu he edtuu te Nengazen is menge etew he wazè pa metudtuli mehitenged kandin. Ne kenà sikandan egkeumahan te tudtul ke wazà ebpenudtul ziyà te kandan. 15Ne wey zà egkehimu is ebpenudtul ke edsug̵uen sikandin te Megbevayà. Ne zuen iyan midsug̵ù te Megbevayà su iring te migkag̵i ziyà te insurat he Lalag te Megbevayà he “Utew igkeg̵alew is kebpekeuma te menge etew he edsangyew te Meupiya he Tudtulanen.” 16Iyan, dutun te kebpesevuta te Meupiya he Tudtulanen, mezelag dà is Hudiyu he edtuu su zuen menge lalag dengan ni Esaias diyà te Megbevayà he edhenduen te, “He Nengazen, henduen be te wazà edtuu te impesavut dey,” ke sikandin. 17Ne wey zà ebpeketuu is etew emun egkezineg din is kebpesevuta te tutuu he tuluuwen, ne is tutuu he tuluuwen, ne iyan is kebpesavut mehitenged ki Kristu.

18Ne siguradu zuen egkag̵i he umba ves wazà meketuu is menge Hudiyu su wazè dan mezineg heini is kebpesavut, iyan, kenà egkehimu he wazè dan mezineg, su zuen insurat he Lalag te Megbevayà he edhenduen te,

“Heini is lalag, ne nekeeneb is kebpenudtula kayi

te tivuuk he menusiyà ne wazà taman te kedsengyawa kayi,” ke sikandin.

19Ne kela ke kunaan ta ke wazà mesavut te menge kevuwazan ni Israyil is impenudtul kandan, iyan, nesavut dan en he zaan su zuen insurat he Lalag te Megbevayà dengan diyà te kandan pinaag̵i te lalag ni Moises he edhenduen te,

“Edhimuwen ku keuzemà he egkeima kew is menge Hudiyu te kedtevangi ku te menge etew he kenà menge pinilì ku.

Ne edhimuwen ku he egkepauk kew tenged te kegkehizuwi ku te menge etew he zengan wazè dan metueni ke hentei a,” ke sikandin.

20Ne keladu pa utew is Lalag te Megbevayà he impenudtul zengan ni Esaias su edhenduen te,

“Neturedu a te menge etew he kenà ebpen-ahà kedì,

ne minsan ke wazè e zan iinsà,

impesavut ku kandan ke hentei a,” ke sikandin.

21Ne zuen daan egkeg̵iyen te Megbevayà pinaag̵i te menge lalag ni Esaias mehitenged te menge etew he kevuwazan ni Israyil he edhenduen te, “Utew mezesen is gehinawa zan he menge etew wey utew zan mesinupaken su layun ku sikandan edhengyui he medtuu zan kedì, iyan, kenè dan ebpemineg.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index