Search form

Ruma 11

Is Kebarew te Menge Hudiyu

1Ne kenè tew ed-isipen he tenged te wazà medtuu is menge etew he kevuwazan ni Israyil, mid-engkezan en te Megbevayà is tivuuk he kehudiyuwan su siak, Hudiyu a zaan iring kandan; kepuun ku si Abraham su kevuwazan a he ebpuun duen te sevaha he kevuwazan din he si Benjamin. 2Is Megbevayà, ne kenà egkehimu he ed-engkezan din is menge etew he nepilì din dengan te wazè pa limbag̵a is minsan hengkey. Egkesavut ta heini ziyà te insurat dengan mehitenged ki Elias su hein mid-ampù sikandin diyà te Megbevayà tenged te menge mezaat he ulaula te menge zuma zin he menge kevuwazan ni Israyil, ke sikandin diyà te Megbevayà te, 3“He Nengazen, midhimetayan dan is menge ebpeneuven nu, ne midrundus dan is menge pemuhatà he zutun ka ed-ezapa, ne iyan e zà nesamà he ed-azap kenikew ne egkesuatan e zan daan te edhimatey.” 4Ne midtavak kandin is Megbevayà te, “Duen pitu pa he libu he menge etew he zuma nu he kevuwazan ni Israyil he wazè dan ezapa si Baal, is kenà tutuu he megbevayà.” Iyan heini Lalag te Megbevayà ki Elias. 5Ne iring din ded daan guntaan su zuen pa kenà utew mezakel he menge Hudiyu he nemeketuu su iyan sikandan sikan is nengepilì te Megbevayà tenged te g̵ag̵ew zin kandan. 6Umba mibpilì din sikandan su tenged dà te g̵ag̵ew zin kandan ne kenà tenged te mid-ulaula zan te egkesuatan din. Ne emun suhul kandan haazà is kebpilia zin kandan tenged te menge ulaula zan he meupiya, ne kenà egkehimu he tenged te g̵ag̵ew zin dà mibpilì din sikandan.

7Ne g̵eina te iyan haazà, egkesavut ta he is menge kevuwazan ni Israyil, ebpurungan dan pezem ebpenahaa is kegkehimu kandan he metazeng, iyan, wazà mebpulus heini ziyà te kandan. Ne minsan pa zutun, duen kenà utew mezakel he menge zuma zan he nepilì te Megbevayà ne heini mulà, midhimu en sikandan he metazeng. Ne is kezekelan, migkubalan is gehinawa zan, ne kenà ed-utengan te Lalag te Megbevayà. 8Su zuen insurat dengan he edhenduen te, “Midhimu te Megbevayà he mevevened is isip dan su wey zan kenà mekesavut. Ne taman en guntaan kenè dan egketuenan ke hengkey is tutuu, ne kenè dan egkesavut is hustu.” 9Ne tenged te kenà kedtuu te menge Hudiyu, duen daan migkag̵i zengan ni David he edhenduen te,

“Berakat he tenged te menge meupiya he intuvad kandan te Megbevayà meisip dan he wazè dan salà,

ne berakat he pinaag̵i kayi edsilutan sikandan.

10Berakat he lekapa is mata zan su wey zan mekeurambak,

ne verakat daan he wazà pidtemanan te kegkeveg̵ati zan te menge seeng dan.”

11Ne nekeurambak is menge zuma ku he Hudiyu pinaag̵i te kenè dan kedtuu ki Kristu, iyan, kenè niw isipa he kenà egkehimu te Megbevayà he mekelikù dan te kedtuu. Tenged te kenè dan kebpemineg te Lalag te Megbevayà nehimu he nengelibri te silut is menge kenà Hudiyu su wey meima is menge Hudiyu. Ne umba nehimu heini su wey likui te menge Hudiyu is kedtuu zan ke egkeehè dan he nengelibri en is kenà menge Hudiyu. 12Ne pinaag̵i te supak te menge Hudiyu he iyan is kenè dan kedtuu, midtuvazan te Megbevayà te utew meupiya is tivuuk he menusiyà. Ne pinaag̵i zaan te naawà diyà te menge Hudiyu is kedtuvazi kandan te Megbevayà, utew zekelà is kebpaahaa te Megbevayà te menge etew he kenà Hudiyu te g̵ag̵ew zin. Ne emun iyan heini, wey pe be kenà utew pa zekelà is meupiya he egkezawat te menge etew he kenà menge Hudiyu zutun te timpu keuzemà ke edlikuan te menge Hudiyu is kedtuu zan.

Is Kegkelibriya te Kenà Menge Hudiyu

13Ne sikiyu is menge etew he kenà menge Hudiyu, duen egkeg̵iyen ku keniyu. Siak, epustul a he mibpilì te Megbevayà wey ku ikesangyew ziyan te keniyu is lalag din. Ne umba ebpurungan ku te edtuman is ebpeveelan din kediey, 14su egkesuatan ku he meima is menge zuma ku he Hudiyu pinaag̵i te kedtevangi ku keniyu. Su kela ke pinaag̵i zutun duen duma kandan he edtuu ne egkelibri te idsilut te Megbevayà. 15Su emun dutun te kedsuwayi te Megbevayà te menge Hudiyu, nehimu he nekidsevaha is Megbevayà te menge kenà Hudiyu, ne wey pe be kenà lavew pa he utew meupiya is idtuvad dutun te menge kenà Hudiyu ke ebpekid-uliey en maan is Megbevayà diyà te menge Hudiyu. Utew meupiya is egkeulaula zutun su zutun he timpu iring is tivuuk he menusiyà te minatey he nevanhew en!

16Ne g̵eina te neg̵aked te Megbevayà si Abraham, si Isaak, wey si Hakub, is menge kepuun te menge Hudiyu, kenà egkehimu he kenà daan gaked te Megbevayà is menge kevuwazan dan. Emun gaked te Megbevayà is dalid te kayu, kinahanglan he g̵aked din daan is lawa. 17Is menge kevuwazan ni Israyil, ne iring sikandan te kayu he ulivu he ed-elimahan te Megbevayà. Ne zuen menge subpang dutun te kayu he midtamped te Megbevayà. Ne sikiyu is kenà menge Hudiyu, ne iring kew te menge subpang te wazà ipemula he ulivu he in-ilis te Megbevayà he impetuvù din dutun te midtempezan din te subpang. Ne iring ded daan guntaan utew meupiya is kedtuvazi keniyu te Megbevayà, iring te meupiya zaan is kedtuvazi zin dengan te menge Hudiyu. 18Ne kinahanglan he kenè niw isipa he lavew kew kenà is menge Hudiyu su menge subpang kew zà daan ne is sustansya te subpang, ne ziyà ebpuun te lawa te kayu ne kenà ebpuun diyà te menge subpang is sustansya te lawa.

19Ne egkehimu he zuen egkag̵i te, “Sikami is kenà menge Hudiyu, iyan key lavew su iyan key in-ilis te Megbavayà te menge Hudiyu.” 20Ne venar iyan he iyan kew in-ilis, iyan, umba in-awà is menge Hudiyu te Megbevayà su wazè dan medtuu. Ne umba in-ilis kew kandan su midtuu kew mulà. Ne minsan pa te iyan heini, kenè niw isipa he iyan kew lavew, kekenà, tegteg̵ami niw is menge ulaula niw. 21Su emun midtamped te Megbevayà is menge tutuu he menge subpang, he ke và dà egkeg̵iya, is menge Hudiyu, iyan kew pe be kenè din daan tempeza is subpang te wazà ipemula he ulivu ke kenè kew is kenà menge Hudiyu edtuu. 22Ne pinaag̵i kayi egkesavut ta is gag̵ew te Megbevayà wey ke maan is edsilut sikandin. Midsilutan din is wazà mebpemineg, iyan, igkehizu kew zin ke edhemenan niw is gag̵ew zin, su emun kenà, ne id-awè kew zin daan. 23Ne is menge Hudiyu, emun ed-engkezan dan is kenè dan kedtuu kandin, idlikù sikandan te Megbevayà duen te zaan he ebpuunan dan dutun te puun te kayu su egkehimu zin is kedlikua zin kandan. 24Ne sikiyu is kenà menge Hudiyu, kenè kew tutuu he menge subpang dutun te kayu su ziyè kew ebpuun te kayu he kenà pinemula, ne midhimu kew zin he subpang dutun te kayu he ed-elimahan din. Ne emun egkehimu heini keniyu te ebpuun te kayu he kenà pinemula, wey pe be kenè din egkehimu he idlikù din sikan is tutuu he menge subpang dutun te zaan he ebpuunan dan.

Is Hizu te Megbevayà te Kemenmenusiyaan

25Egkesuatan ku, menge suled, he mesavut niw is ed-ul-ulahan te Megbevayà he zengan wazà mesavut te menusiyà. Umba ibpesavut ku heini keniyu su wey kenè niw isipa he iyan kew lavew kenà is menge Hudiyu. Ne minsan pa te intug̵ut te Megbevayà te zuma he menge Hudiyu is kenè dan kedtuu, duen timpu keuzemà he ed-engkezan dan is kenè dan kedtuu te Megbevayà su taman dà heini zutun te timpu he egkeamin ebpeketuu is langun he kenà menge Hudiyu he imbanglis te Megbevayà kandan is kebpeketuu zan. 26Ne zutun egkeamin egkelibri te silut is langun he menge kevuwazan ni Israyil su zuen insurat he Lalag te Megbevayà he edhenduen te,

“Duen Menluluwas he ziyà ebpuun te menge Hudiyu

ne pinaag̵i kandin ed-engkezan te langun he menge kevuwazan ni Hakub is kenè dan ked-azap kediey te Megbevayà.

27Ne zutun te ked-ewaa ku

te menge ulaula zan he mezaat,

human egketuman is penaad ku zengan kandan,” ke sikandin.

28Ne is duma he menge Hudiyu, ne nehimu sikandan he menge kuntada te Megbevayà tenged te wazè dan medtuu te Meupiya he Tudtulanen. Ne tenged dutun nehimu he iyan kew is kenà menge Hudiyu, nelibri te silut. Ne minsan pa zutun, kemulu pa mahal ziyà te g̵ehinawa te Megbevayà is menge Hudiyu tenged te pinilì din sikandan wey tenged te menge penaad din dengan diyà te menge kepuun dan. 29Su kenà egkehalinhalin is ed-isipen te Megbevayà, kekenà, is ebpilien din he menge etew, ne iyan daan edtuvazan din te meupiya. 30Ne sikiyu zaan is kenà menge Hudiyu, dengan wazè kew mebpemineg te Megbevayà, iyan, guntaan nehizuwan kew zin tenged te kenà guntaan kebpemineg te menge Hudiyu. 31Ne iring din ded daan diyà te kandan, su minsan pa te kenè dan guntaan ebpemineg, egkehimu he iring te kegkehizuwi wey kebpeseyluwa keniyu te Megbevayà, egkehizuwan din daan sikandan keuzemà. 32Su is Megbevayà, ne impeehè din he mesinupaken wey zait he edsilutan is minsan hentei he menusiyà. Impeehè din heini su wey, pinaag̵i kayi, mehimu zaan he egkehizuwan din sikandan is langun.

Is Kegkemekeg̵eg̵ehem te Megbevayà

33Utew zekelà is gag̵ew te Megbevayà; kenà egketegkad is ketau zin wey kedsavut din. Kenà egkesavut te etew is menge ulaula zin ne kenà egkeseysey te minsan hentei is ed-ul-ulahan din. 34Su zuen insurat he Lalag te Megbevayà he edhenduen te,

“Wazà ebpeketegkad te ed-isipen te Megbevayà ne kenà daan kinahanglan he zuen edsambag kandin.

35Wazà kurang din te minsan hengkey, ne kenà egkehimu he zuen ibeg̵ey tew kandin he egkehimu he egkeutang din kenitew.”

36Iyan sikandin sikan is nenlimbag te minsan hengkey; ne iyan sikandin ed-uwit te minsan hengkey he linimbag, ne pinaag̵i zaan te minsan hengkey he linimbag edelig̵en sikandin. Berakat he zelig̵a is Megbevayà te wazè pidtemanan.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index