Search form

Ruma 3

1Ne emun iyan haazà, henduen be te wazà pulus te kegkehudiyu zey ne wazà daan pulus te tulumanen dey te kedsirkunsidar. 2Iyan, dekelà iyan is pulus su sikami is menge Hudiyu, insarig kenami is insurat he Lalag te Megbevayà. 3Ne minsan pa te zuen menge zuma zey te menge Hudiyu he wazà mebpemineg te Lalag te Megbevayà, kenà egkehimu he kenà edtumanen te Megbevayà is impenaad din dengan. 4Su minsan ke teruen is tivuuk he menusiyà, tutuu mulà is minsan hengkey he egkeg̵iyen te Megbevayà. Su zuen insurat dengan he lalag ni Hadì David te kedtistig̵usi zin te ketazeng te Megbevayà he edhenduen te,

“Kenà egkehimu he kenà hustu is kenikew he ketezengan,

su ke idsumbung ka, layun ebpekezaag is kenikew he ketezengan,” ke si David.

5Ne zuen menge pilusupu he etew he egkag̵i te, “Emun ed-ulaula ki te mezaat, meupiya zaan haazà su emun egkeisip te menge etew is menge ulaula ta he mezaat, wey is menge ulaula te Megbevayà, siguradu egkesavut dan he utew mulà meupiya is menge ulaula te Megbevayà ne ebpekezalig dan te Megbevayà, ne utew haazà meupiya. Ne emun,” ke sikandan, “nehimu is meupiya tenged te mezaat he mid-ulaula ta, kenà metazeng is kedsiluti kenita te Megbevayà tenged te mid-ulaula ta he mezaat.” Ne pilusupu is menge lalag he iring kayi. 6Su kenà egkehimu he kenà metazeng is Megbevayà su emun kenà sikandin metazeng, kenà egkehimu he iyan sikandin edhukum keuzemà te tivuuk he menusiyà.

7Ne zuen daan menge pilusupu he etew he egkag̵i te, “Deyzey ke egkag̵i ki te tarù su emun egketuenan te menge etew he teruen ki, egkeisip dan he kenà mulà teruen is Megbevayà ne edelig̵en dan sikandin ne utew meupiya haazà. Ne emun pinaag̵i te menge tarù ta ebpekelepew he tutuu mulà is menge Lalag te Megbevayà, maan is edsilutan ki pa tenged te menge tarù ta?” 8Ne zuen menge etew he egkag̵i he iring kayi is ibpenurù ku, iyan, kenè ku edewaten is menge ketezengan he iring kayi su ibpesavut dan he meupiya is ked-ulaula te mezaat emun pinaag̵i zutun egkehimu is meupiya. Is menge etew he iring kayi is ibpenurù dan, utew metazeng is kedsiluti kandan te Megbevayà.

Wazà Minsan Sevaha he Metazeng

9Ne sikami is menge Hudiyu, kunaan niw vuwa ke utew key zeyzey, kenà is menge etew he kenà menge Hudiyu, iyan, kenà heini venar. Daan ku en impesavut keniyu he is tivuuk he menusiyà, Hudiyu se kenà Hudiyu, ne pudu ebpemekeulaula te mezaat. 10Su zuen insurat he Lalag te Megbevayà he edhenduen te,

“Wazà minsan

sevaha

he etew he ed-isipen

te Megbevayà he metazeng.

11Wazà mesayud te hustu mehitenged te Megbevayà ne wazà daan etew

he ebpen-ahà te hustu he ibayà pehendiyà te Megbevayà.

12Su nemekesuwey zan pudu te hustu he ibayà;

mid-ulaula zan is langun te mezaat;

ne wazà minsan sevaha kandan he ed-ulaula te metazeng.

13Utew ebpekezezaat is kebpemèbè dan iring te nemahù diyà te leveng he wazà bumbuni.

Teruen dan ne is egkeg̵iyen dan, ne iring te hereg te uled

su utew ibmesakit te g̵ehinawa te menge zuma zan.

14Utew mesakit is kebpenrawak dan.

15Ne kenà duen dà taman su melemu zan ebpekevunù.

16Ke minsan hendei zan ebpekepevayà, ebpekezezaat dan

ne ebpekeuwit dan te kemeresayan.

17Wazè dan metueni is melinawen he ulaula.

18Ne kenè dan daan ed-isipen

he igkehandek dan

is kedsupak dan te Megbevayà.”

Iyan heini kes migkag̵i te insurat he Lalag te Megbevayà.

19Ne netuenan ta he is ibpesavut kenita kayi te Lalag te Megbevayà, ne ibpesavut daan diyà te menge etew he nesakup te kesug̵uan he iyan key is menge Hudiyu. Ne pinaag̵i kayi egketuenan ta he wazà minsan hentei he etew he ebpekekag̵i he kenà sikandin dait he edsilutan su nekesupak te Megbevayà is tivuuk he menusiyà. 20Su wazà minsan hentei etawa he egkeisip te Megbevayà he metazeng pinaag̵i te kedtumana zin te kesug̵uan su layun din egkesupak is kesug̵uan. Umba imbeg̵ey is kesug̵uan su wey tew mesavut he mesinupaken kiw ves te menge sug̵ù te Megbevayà.

Is Paag̵i te Kebmetazeng

21Ne g̵untaan, impezayag kenitew te Megbevayà is paag̵i wey kiw zin meisip he metazeng. Ne kenà heini pinaag̵i te kedtumana te kesug̵uan, asal migkag̵i heini is paag̵i zutun te insurat dengan he Lalag te Megbevayà. 22Ed-isipen kiw te Megbevayà he metazeng emun edtuuwan tew si Jesu Kristu. Is minsan hentei he etew, ne ed-isipen te Megbevayà he metazeng emun edtuuwan din si Jesu Kristu su wazà ibpelavi te Megbevayà te minsan hentei he etew. 23Nekesalà is tivuuk he menusiyà ne utew en sikandan meziyù te ketulusan he ibeg̵ey te Megbevayà. 24Iyan, tenged dà te g̵ag̵ew kenitew te Megbevayà ed-isipen kiw zin gihapun he metazeng he henduen be te wazè kiw mekeulaula te mezaat su midlibri kiw ni Jesu Kristu. 25Midsug̵ù sikandin te Megbevayà wey mehimu sikandin he pemuhat he elili kenitew, ne tenged te kegkepelisi kenitew te lengesa zin ebpeseyluwen te Megbevayà is menge salè tew emun edtuuwan tew sikandin. Midhimu heini te Megbevayà su wey tew mesavut he metazeng is hukum din, minsan pa zengan tenged te meinentusen sikandin, wazè din dè pa siluti is menge etew tenged te menge salè dan. 26Iyan, kinahanglan he zuen silut tenged te menge salà te menusiyà, umba midsilutan din si Jesus. Ne tenged dutun egketuenan tew he metazeng is kedhukum te Megbevayà ne tenged kayi egkehimu he ed-isipen din he metazeng is minsan hentei he edtuu ki Jesus.

27Umba, wazà igkezantal te minsan hentei. Kenè ki ebpekekag̵i he iyan ketezengan ke maan is ed-isipen ki te Megbevayà he metazeng su midtuman ta is kesug̵uan su iyan idewata kenita te Megbevayà is kedtuu ta ki Jesus. 28Tenged kayi migkag̵i ku en he iyan dà ketezengan ke maan is metazeng is ked-isipa kenita te Megbevayà, kenà iyan is kedtumana ta te kesug̵uan, kekenà, iyan is kedtuu ta ki Jesus. 29Ne siguradu zuen egkag̵i he is Megbevayà, ne Megbevayà te menge Hudiyu zà, iyan, kenà heeyan tutuu, su iyan sikandin Megbevayà te tivuuk he menusiyà, Hudiyu se kenà Hudiyu. 30Su sebsevaha zà is Megbevayà ne ed-isipen din is menge Hudiyu he metazeng emun edtuuwan dan si Jesus. Ne is menge etew he kenà Hudiyu, ed-isipen din daan sikandan he metazeng emun edtuuwan dan si Jesus. 31Ibpesavut ku he iyan dà ketezengan ke maan is ed-isipen ki zin he metazeng is kedtuu ta, iyan, kenè niw isipa he tenged kayi wazè en pulus te menge sug̵ù te Megbevayà su tenged te kedtuu ta ki Jesus, hustu en dutun is kegketumana ta te menge sug̵ù din.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index