Search form

Ruma 5

Is Kebpeked-uliey te Meupiya he Kedepità

1Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà. 2Tenged te kedtuu tew ki Jesus midhimu zin en he meg̵eg̵awi kenitew is Megbevayà. Umba zekelà is kelipey ta su egkeperateng ta he keuzemà ebpekeambit ki te utew kegkelavew te Megbevayà. 3Ne kenà duen dà taman su ebelesen te kelipey is menge kemereg̵enan he nengeseg̵azan ta su netuenan ta he pinaag̵i kayi edlumbazen ki wey ki mehimu he meinentusen. 4Ne emun meinentusen ki, igkesuat heini te Megbevayà, ne emun netuenan ta he igkesuat te Megbevayà is menge ulaula ta, ne kenà ebperis he zuen meupiya he egkeperateng ta. 5Ne umba kenà egkehimu he kenè tew egkekuwa keuzemà is impenaad kenitew te Megbevayà su pinaag̵i te Wag̵as he Mulin-ulin he imbeg̵ey zin kenitew, egketuusan ta he ingkeg̵ag̵ew ki te Megbevayà.

6Isipa nu is gag̵ew kenita te Megbevayà. Su zutun te timpu he intelaan te Megbevayà, hein wazà minsan hengkey he egkeulaula ta he ebpekehimu he melibri ki te silut, mibpehimatey si Kristu he elili kenita te mesinupaken. 7Mezelag dà buwa he zuen etew he ebpehimatey he elili te minsan metazeng he etew. Egkehimu vuwa he zuen etew he ebpekevurut he ebpehimatey he elili te etew he meupiya is ulaula zin. 8Iyan, is Megbevayà mulà, impeehè din is gag̵ew zin kenitew su mibpehimatey si Kristu he elili kenitew zutun te timpu zengan te kemulu kiw pa ed-ulaula te mezaat. 9Ne emun pinaag̵i te kedtig̵is te lengesa ni Kristu mid-isip kiw en te Megbevayà he metazeng, wey kiw pe be kenà melibri tenged ki Kristu te silut keuzemà te Megbevayà. 10Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin. 11Ne kenà duen dà taman su utew zekelà is kelipey ta tenged te g̵ag̵ew kenita te Megbevayà he impeehè din pinaag̵i te Nengazen tew he si Jesu Kristu, ne pinaag̵i zaan kandin nehimu ki en he emig̵u te Megbevayà.

Is Salà wey is Gag̵ew te Megbevayà

12Umba nehimu is mezaat he ulaula zini te kelibutan su pinaag̵i te kedsupak dengan te sevaha he etew he si Adan, ne midhimu te Megbevayà he ebpatey sikandin tenged dutun te mid-ulaula zin. Ne tenged daan dutun nekeeneb dini te kelibutan is kemetayen. Ne ebpatey is minsan hentei he etew su wazà minsan hentei he kenà ed-ulaula te mezaat. 13Ne minsan pa zengan te wazè pa iveg̵ey te Megbevayà is kesug̵uan, mezaat en dutun is menge ulaula te menge etew, iyan, geina te wazè pa is kesug̵uan, wazè pa isipa te Megbevayà he edsilutan sikandan. 14Ne minsan pa zutun, puun pa te timpu ni Adan taman te timpu he zutun imbeg̵ey en is kesug̵uan diyà te ki Moises, egketuusan he zuen mezaat he ulaula te menge etew su mibpematey g̵ihapun is langun he menge etew. Is ulaula zan he mezaat, ne kenà iring dutun te mid-ulaula ni Adan su midsupak din is sug̵ù te Megbevayà, iyan, sikandan mulà, wazè pa kesug̵uan he egkesupak dan. Ne si Adan, nehimu sikandin he alung te etew he ebpekeuma he iyan si Kristu.

15Iyan, kenè dan is dezuwa ebpeked-iring su is kedsupak dutun te sevaha, ne kenà iring te kebmetazeng he edhimuwen te Megbevayà. Sevaha zà he etew si Adan, iyan, tenged dutun te kedsupak din ebpematey is tivuuk he menusiyà. Ne minsan pa zutun, lavew pa he zekelà is nehimu pinaag̵i te g̵ag̵ew te Megbevayà su pinaag̵i te g̵ag̵ew te sevaha zà daan he etew he iyan si Jesu Kristu, imbeg̵ey te Megbevayà is ketazeng ne midhimu zin he metazeng is utew mezakel he menge etew. 16Ne iring din ded daan, is nehimu ni Jesus tenged te kebmetazeng he edhimuwen te Megbevayà, ne kenè man iring te nehimu te kedsupak te sevaha he etew he si Adan. Su tenged te kedsupak ni Adan te kesevaha zà, ne midhukuman is tivuuk he menusiyà he edsilutan te kemetayen. Ne zutun te timpu he utew en mezakel is menge kedsupak te menge etew, impaahà te Megbevayà is gag̵ew zin ne midhimu zin is paag̵i wey kiw zin meisip he metazeng he iring te wazè kiw mekesupak. 17Ne emun tenged te kedsupak dutun te sevaha zà he etew he si Adan, ebpematey is tivuuk he menusiyà, wey pe be kenà lavew pa he mekeinuinu is nehimu te sevaha zà daan he etew he si Jesu Kristu. Su is minsan hentei he edawat te zekelà he g̵ag̵ew kandin te Megbevayà pinaag̵i ki Jesu Kristu, ne ed-isipen sikandin he metazeng, ne ebeg̵ayan sikandin te untung he wazè din pidtemanan ne ebpekehadì sikandin duma te Megbevayà.

18Ne iring din ded daan, egkeehè ta he tenged te sevaha he mezaat he mid-ulaula ni Adan, nehukuman is langun he menge etew te silut, iyan, tenged te sevaha zaan he metazeng he mid-ulaula ni Jesu Kristu he iyan is kebpehimatey zin, egkehimu he ed-isipen te Megbevayà he metazeng is langun he menge etew he edtuu ne ibeg̵ey kandan is untung he wazà pidtemanan. 19Ne tenged te kedsupak te sevaha zà he etew nehimu is mezakel he mekesesalà, iyan, tenged daan te kebmetinumanen te sevaha zà he etew he si Jesus te ebpeveelan kandin te Megbevayà, egkehimu he ed-isipen te Megbevayà he metazeng is mezakel he menge etew.

20Ne umba imbeg̵ey te Megbevayà is kesug̵uan su wey med-iseg is kegketueni te menge etew te kezekelà te kedsupaka zan kandin. Ne zutun te mid-iseg mebmezakel is menge kedsupak, impeiseg ipezekelà te Megbevayà is gag̵ew zin te menge etew. 21Ne hein aney, sikitew is menusiyà, kenà egkehimu he kenè ki ebpekesalà, ne tenged kayi ebpatey ki, iyan, guntaan pinaag̵i te ked-isipa te Megbevayà kenitew he metazeng, impeehè kenitew te Megbevayà is gag̵ew zin su wey kiw zin meveg̵ayi te untung he wazè din pidtemanan pinaag̵i ki Jesu Kristu he iyan Nengazen tew.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index