Search form

Ruma 8

Is Untung Pinaag̵i te Wag̵as he Mulin-ulin

1Ne sikita is nekidsevaha ki Jesu Kristu, kenè ki en egkehukuman te silut. 2Su pinaag̵i te kebpekidsevaha ta ki Jesu Kristu imbeg̵ey kenita te Wag̵as he Mulin-ulin is beg̵u en he untung ne tenged kayi nelibri ki en te kebpekesalè ta he iyan edungguan din is kemetayen he wazè din pidtemanan. 3Wazà tavang he egkekuwà ta pinaag̵i te kedtumana ta te kesug̵uan geina te wazè ta mehimu te edtuman, iyan, is Megbevayà mulà, ne iyan neketavang kenita. Su midsug̵ù din sikan is Anak din he si Jesus he nehimu he etew. Ne si Jesus, duen lawa zin he iring te lawa ta su wey zin meseg̵azi ziyà te lawa zin is silut te Megbevayà tenged te menge salè tew. Ne pinaag̵i te kedsiluti zin ki Jesus, in-awè din is gehem te mezaat he kebayè ta. 4Umba mid-ulaula heini te Megbevayà su wey ki meketuman te hustu sumalà is insug̵ù te kesug̵uan. Ne egkehimu heini su wazè en kinahanglan he edtumanen ta is mezaat he suat te lawa ta, kekenà, ebpeketuman ki te hustu su edtevangan ki te Wag̵as he Mulin-ulin. 5Su is minsan hentei he iyan ebayàbayà kandin is mezaat he suat din, iyan din dà egkeisip is egkesuatan te menge mezaat he kebayà te lawa zin. Ne is minsan hentei mulà he iyan ebayàbayà kandin is Wag̵as he Mulin-ulin, iyan dekelà diyà te g̵ehinawa zin is egkesuatan te Wag̵as he Mulin-ulin. 6Ne emun iyan ebayàbayà te isip te etew is menge mezaat he suat te lawa zin, edsilutan sikandin te kemetayen he wazè din pidtemanan. Iyan, emun iyan mulà ebayàbayà te isip din is Wag̵as he Mulin-ulin, wazà pidtemanan te untung din, ne melinew en is kedepitè dan te Megbevayà. 7Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din. 8Is etew he ebeyveyaan te mezaat he suat te lawa zin, wazà ulaula zin he egkesuatan te Megbevayà.

9Ne sikita mulà, kenè ki en ebeyveyaan te mezaat he suat te lawa ta su emun dini ed-ubpà te kenita is Wag̵as he Mulin-ulin ebeyveyaan ki te Wag̵as he Mulin-ulin. Ne ke zuen etew he wazà diyà te kandin is Wag̵as he Mulin-ulin he midsug̵ù ni Kristu, kenà sikandin sakup ni Kristu. 10Iyan, emun diyà te keniyu si Kristu, minsan pa te ebpatey zed is lawa niw tenged te salà, duen niw en gihapun beg̵u he untung tenged te mid-isip kew en te Megbevayà he metazeng. 11Is Megbevayà, ne iyan mibanhew ki Jesu Kristu. Ne emun dini ed-ubpà te kenita is Wag̵as he Mulin-ulin he midsug̵ù din, ne ebenhawen ki zin daan pinaag̵i te Mulin-ulin he zini ed-ubpà te kenita.

12Umba, menge suled, utew kinahanglan he edtumanen ta is egkesuatan te Megbevayà ne kenè te en ebpezumdumahan is menge mezaat he kebayà te lawa ta. 13Su emun kenè niw iyan ed-iniyug̵an is menge suat te lawa niw, edsilutan kew te kemetayen he wazè din pidtemanan, iyan, ke pinaag̵i te kedtavang te Wag̵as he Mulin-ulin egkeiniyug̵an niw is menge mezaat he ulaula niw, ebeg̵ayan kew te untung he wazè din pidtemanan. 14Su emun ed-eg̵aken is minsan hentei te Wag̵as he Mulin-ulin tutuu en he anak sikandin te Megbevayà. 15Su is Wag̵as he Mulin-ulin he imbeg̵ey kenitew te Megbevayà, ne wazè kiw zin himuwa he menge uripen he utew egkengehandek te Megbevayà, kekenà, midhimu kiw zin he menge anak te Megbevayà. Ne pinaag̵i te g̵ehem te Wag̵as he Mulin-ulin egkehimu en he egkeamey tew is Megbevayà. 16Iyan is Wag̵as he Mulin-ulin is ebpesavut kenitew he menge anak kiw iyan te Megbevayà. 17Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

Is Ebperetengen Tew

18Ne netuenan ku he is kemereg̵enan he egkeseg̵azan ta g̵untaan dini te kelibutan, ne wazà mekesusuluwan te utew kegkelavew he ibeg̵ey kenita keuzemà. 19Ne utew meheg̵et is kebperetenga te langun he menge linimbag te timpu keuzemà he zutun ibpaahà te Megbevayà is menge anak din he edtulusen. 20Su is tivuuk he linimbag, tenged te iyan egkesuatan te Megbevayà, midhimu zengan te Megbevayà he maawà is hustu he pulus din. Iyan, ebperetengen ta is timpu keuzemà 21he edhimuwen te Megbevayà he wazè en kegkeredak kayi te tivuuk he linimbag, ne egkeveg̵u is langun iring te egkeveg̵u zaan is menge anak te Megbevayà he edtulusen. 22Ne netuenan ta he is tivuuk he linimbag, ne iring te vahi he ebeliliten he utew edlised su puun pa zengan taman en guntaan ne utew edlised is tivuuk he linimbag tenged te meheg̵et is kebperetenga zan te timpu he id-awà te Megbevayà is kegkezeeti zan wey kegkeredak dan. 23Ne kenà duen dà taman, su sikita zaan is nekezawat te Wag̵as he Mulin-ulin he iyan tuus he zuen pa keuzemà ibeg̵ey kenita te Megbevayà, utew egkeheg̵et is kebperetenga ta kayi. Su utew ta egkesuati he meume en haazà is timpu he zutun edhimesazen te Megbevayà is ked-anak-anak din kenita wey edtumanen din is kedtulusa zin te lawa ta. 24Daan en he nelibri ki te silut, iyan, edteg̵azan te pa is kedtumana te Megbevayà kayi. Ne emun egkag̵i ki he zuen edteg̵azan ta, ibpesavut ta he wazè pa meulaula heini is edteg̵azan. Su wazà etew he edteg̵azan din is daan he nehitavù. 25Iyan, emun wazè pa meulaula haazà is edteg̵azan ta, kinahanglan he edtigker ki is edtag̵ad.

26Ne elin daan baal te Wag̵as he Mulin-ulin is: sikita is kenà metau, edtevangan ki zin su kenè ta egketuenan is hustu he id-ampù, iyan, is Wag̵as he Mulin-ulin, ne iyan sikandin ebpengeetuvang te Amey tew he Megbevayà pinaag̵i te kedhangyù he kenà egkehimu te kineg̵iyan te etew. 27Ne is Amey tew he Megbevayà he nesayud te menge isip tew, netuenan din ke hengkey is diyà te isip te Wag̵as he Mulin-ulin. Ne haazà is idhangyù te Wag̵as he Mulin-ulin tenged kenitew te menge anak te Megbevayà, iyan daan egkesuatan te Megbevayà te ebeg̵ey kenitew.

28Sikitew is langun he mahal is Megbevayà diyà te g̵ehinawa zin, sikitew is midhimu zin he meketuu sumalà is tuyù diyà te isip din, netuenan tew he pinaag̵i te minsan hengkey he egkehitavù kenitew, edtuvazan kiw zin gihapun te meupiya. 29Su zengan te puunè pa te minsan hengkey, netuenan te Megbevayà ke hentei is egkehimu he menge anak din ne migkag̵i zin he edhimuwen din sikandan he iring te Anak din he si Jesus. Ne zutun, egkehimu si Jesus he kakey tew te utew mezakel he menge hazi zin. 30Ne zutun, sikitew is langun he mibpilì din wey mehimu he menge anak din, impetuu kiw zin daan. Ne kenà duen dà taman, su mid-isip kiw zin daan he metazeng he iring te wazè kiw mekesalà. Ne impenaad din daan he zuen timpu keuzemà he edtulusen kiw zin.

Is Kebmahala Kenitew ni Kristu

31Ne emun ed-isipen ta is langun kayi, egketuenan ta he tutuu iyan he iyan duma ta is Megbevayà ne wazà minsan hentei he ebpekekaid kenita. 32Su minsan is Anak din he si Jesus, wazè din menug̵uni, kekenà, midsug̵ù din wey mekepehimatey he elili kenita. Ne emun iyan haazà gag̵ew zin kenita, kenà egkehimu he kenè din daan ibeg̵ey kenita is langun he impenaad din kenita. 33Ne wazà ebpekesumbung kenita te mibpilì te Megbevayà su is Megbevayà, mid-isip ki zin en he metazeng. 34Ne wazà daan ebpekekag̵i he zait ki he edsilutan su edtevangan ki ni Jesu Kristu. Minatey sikandin he elili kenita ne kenà duen dà taman, su nevanhew en daan. Ne g̵untaan utew sikandin lavew su ziyà sikandin ebpinuu te zapit te egkekewanan te Megbevayà ne edtevangan ki zin diyà te etuvangan te Megbevayà. 35Ne emun iyan haazà ne wazà minsan hengkey he ebpekepesuwey kenita ziyà te ki Kristu. Minsan ke egkerasey ki te kemereg̵enan wey samuk wey pesipala; minsan ke egkereg̵enan ki te vitil ne wazè ta ugelingen; minsan ke egkekeizan ki ne edhimetayan ki; ne kenà egkeawà is kebmahal ta ziyà te g̵ehinawa ni Kristu. 36Su zuen insurat dengan he Lalag te Megbevayà he edhenduen te,

“Tenged te midtuuwan dey sikew,

layun key hapit edhimetayi te menge etew.

Iring key te ayam he kerehidu he in-andam te kedlepaa

su ebpespesesag̵ad key zà ke keenu key edhimetayi.”

37Ne minsan pa ke egkerasey ki kenè ki ebpetalew su ebpekeveg̵ey kenita te kelipey is ked-entusa ta kayi, ne pinaag̵i te g̵ehem ni Kristu, iyan ki ebpekezaag su utew zekelà is gag̵ew zin kenita. 38-39Ne netuenan ku he wazà minsan hengkey he ebpekepesuwey kenita ziyà te zekelà he g̵ag̵ew kenita he impaahà te Megbevayà pinaag̵i te Nengazen tew he si Jesu Kristu. Su minsan kayi te uuyag ki pa wey ke ebpatey ki en be, ne kenà egkeawà is gag̵ew zin kenita. Kenà egkeawà te menge velinsug̵uen din wey te menge mezaat he mulin-ulin. Kenà egkeawà te minsan hengkey he egkeulaula g̵untaan wey egkeulaula keuzemà. Kenà daan egkeawà te minsan hengkey he kedesenan. Is menge kedesenan he ziyà te utew metikang wey is menge kedesenan he ziyà te utew mezalem, wey is minsan hengkey he linimbag, ne kenè dan ebpekepesuwey kenita ziyà te g̵ag̵ew kenita te Megbevayà he ibpeehè din kenita pinaag̵i ki Jesu Kristu he iyan Nengazen tew.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index