Search form

Ruma 9

Is Megbevayà wey is Menge Hudiyu

1Duen egkeg̵iyen ku keniyu ne kenà tarù heini su sumusundan a ni Kristu. Ne netuenan ku zaan he kenà tarù heini su iyan ed-uwit te isip ku is Wag̵as he Mulin-ulin. 2Iyan is: utew a egkeseeng ne kenà egkeawà is kesakit te g̵ehinawa ku tenged te menge zuma ku he menge Hudiyu he kenà edtuu ki Kristu. 3Ne ke egkehimu, egkesuatan ku pezem he iyan a edsilutan he ilis kandan ne ewaa is kebpekidsevaha ku ki Kristu su wey iyan sikandan melibri te silut. 4Su menge kevuwazan daan sikandan ni Israyil; mid-anak-anak sikandan dengan te Megbevayà. Ne impeehè din kandan is mekeg̵eg̵ehem he anlag din, ne zuen menge midtukud din he paag̵i te kedtuvazi zin kandan, ne imbeg̵ey zin kandan is kesug̵uan, ne impenurù din kandan is paag̵i te ked-ezapa kandin. Ne mezakel pa is meupiya he penaad din kandan. 5Mibpilì din dengan is menge kepuun dan. Ne hein mibpeetew si Kristu he iyan Megbevayà he ebayàbayà te langun, in-anak sikandin he zuma zan he Hudiyu. Berakat he zelig̵a sikandin te wazè din pidtemanan.

6Ne kenè ku iyan egkeg̵iyen he wazà tumana te Megbevayà is penaad din kandan, kekenà, iyan egkeg̵iyen ku he zuen duma te menge kevuwazan ni Israyil he kenà sikandan tutuu he menge sakup te Megbevayà. 7Is langun he egngezanan he menge kevuwazan ni Abraham, kenà daan langun te sikandan ed-isipen te Megbevayà he tutuu he menge kevuwazan ni Abraham, he ke và dà egkeg̵iya, kenè dan is langun ebpekezawat te impenaad te Megbevayà. Su migkag̵i zengan is Megbevayà diyà te ki Abraham, ke sikandin te, “Pinaag̵i zà ki Isaak is tutuu he kevuwazan nu.” 8Ne ibpesavut kenita kayi he iring te in-anak si Isaak tenged te kedtuu ni Abraham te penaad te Megbevayà, ne egkehimu ki he tutuu he anak te Megbevayà, kenà pinaag̵i te kegkevuwad ni Abraham, kekenà, pinaag̵i te kedsarig ta te penaad te Megbevayà. Emun edsarig ki te penaad te Megbevayà egkehimu ki he tutuu he kevuwazan ni Abraham. 9Su migkag̵i is Megbevayà diyà te ki Abraham te, “Sengetuig pa g̵untaan edlikuan ku sikiyu ne ed-anak dutun si Sara te maama.”

10Ne kenà duen dà taman su haazà is anak din he si Isaak, hein meg̵urang en ne nevuwad pinaag̵i te esawa zin he si Rebecca te zezuwa he anak he maama he sereping he si Hakub wey si Esau. 11-12Ne si Rebecca, hein meg̵aan en ed-anak, migkeg̵iyan sikandin te Megbevayà, ke sikandin te, “Sulug̵uen is kakey te hazi zin.” Migkag̵i zin heini te wazè pa ianak haazà is sereping, ne wazè pa ulaula zan he mezaat wey meupiya. Ne umba neulaula heini su ibpesavut te Megbevayà he is kebpilia zin te menge etew, ne kenà tenged te menge meupiya he ulaula he nehimu zan, kekenà, tenged dà te iyan egkesuatan din. 13Ne zuen pa insurat he Lalag te Megbevayà he edhenduen te, “Mahal zini te g̵ehinawa ku si Hakub, kenà si Esau.”

14Ne egkehimu he zuen egkag̵i he kenè bes metazeng is paag̵i te Megbevayà su zuen ibpelavi zin. Iyan, kenà iyan haazà ibpesavut ku. 15Su migkag̵i zengan is Megbevayà diyà te ki Moises te, “Iyan a ebayàbayà ke hentei is egkehizuwan ku wey ke hentei is ebmahalen ku zini te g̵ehinawa ku,” ke sikandin. 16Ne egkesavut ta zutun he is tuvad te Megbevayà te menusiyà, ne kenà pinaag̵i te kebayà te menusiyà, wey menge meupiya he ulaula te menusiyà, kekenà, pinaag̵i zà te hizu te Megbevayà. 17Iyan, emun iyan egkesuatan din egkehimu he kenè din egkehizuwan is etew, su penenglitan kes hadì dengan diyà te Ihiptu, wazà sikandin mehizuwi te Megbevayà su migkeg̵iyan sikandin te Megbevayà te, “Umba midhimu ku sikew he hadì su wey pinaag̵i te kegkezaag̵a ku kenikew ibpeehè ku is dekelà he g̵ehem ku ne wey mevantug a zini te tivuuk he kelibutan.” 18Ne egketuenan ta zutun he is Megbevayà, ne iyan ebayàbayà ke hentei is igkehizu zin sumalà is egkesuatan din te minsan hentei. Ne iyan daan sikandin ebayàbayà ke hentei is idtug̵ut din he kenà ebpezumazuma kandin sumalà is egkesuatan din te minsan hentei.

Is Hizu te Megbevayà

19Ne siguradu zuen egkag̵i he emun iyan haazà ulaula te Megbevayà ne maan is egkepeukan din is menge etew tenged te menge salè dan te ebpekepezumazuma zè man sikandan te egkesuatan te Megbevayà. 20Ne iyan egkekag̵i ku kayi is: ebpeketavak ki ve te Megbevayà is linimbag din dà? Egkehimu ve he ebpekeinsè ki is mibeelan te mibaal kenita te, “Maan is mibeelan a kenikew he iring kayi?” 21Iring te ebpendiyun su ke ediyunen din is dezuwa he kuzen, iyan sikandin ebayàbayà ke hendei zapit dutun te zezuwa is edhimuwen din he utew mekempet he ed-ehaan su edeyzeyanan din, wey ke hendei zapit is edhimuwen din he kenà utew mekempet su kuzen dà duen.

22Ne iring din ded daan is mid-ulaula te Megbevayà su zutun te ibpelepew zin en is rerangit din wey is mekeg̵eg̵ehem he silut din, mid-isip din he edtigkeren din dè pà is pauk din dutun te menge etew he kinahanglan he edsilutan din. 23Ne iyan heini mid-ulaula zin su wey sikita is egkehizuwan din, ikepesavut din kenita ke hengkey is utew meupiya he kebpekesavuk din su midteg̵enahan ki zin wey ki zin keuzemà metulus. 24Iyan ki impetuu zin, iyan, is menge etew he impetuu zin, ne kenà menge Hudiyu zà, kekenà, elin daan is menge etew he kenà menge Hudiyu. 25Su ziyà te libru he insurat ni Oseas duen Lalag te Megbevayà he edhenduen te,

“Is menge etew he kenè ku menge sakup,

edhimuwen ku he menge sakup ku.

Ne sikandan is kenà mahal zengan dini te g̵ehinawa ku,

ebmahalen ku en guntaan.”

26Ne zuen daan Lalag te Megbevayà, he edhenduen te,

“Ne heini is menge etew he kenà Hudiyu,

egkehimu he zutun te inged he migkeg̵iyan ku sikandan he kenè dan menge sakup ku,

egngezanan ku sikandan gihapun he menge anak ku te wazè din kemetayen

he Megbevayà.”

27Ne zuen daan lalag ni Esaias dengan mehitenged te menge etew he kevuwazan ni Israyil, he ke sikandin te,

“Utew zan mezakel, ne kenè en sikandan egkevilang

su iring te menge pantad diyà te veyvey te zag̵at,

ne minsan pa zutun,

deisey zà kandan is egkelibri te silut te Megbevayà.

28Su kenà duwazuwa he egkeuma haazà is andew

he segugunà edtumanen te Megbevayà is kedlimasa zin te tivuuk he menusiyà.”

29Ne iring heini te zaan he netagnà he migkag̵i ni Esaias he edhenduen te,

“Angin ke wazè kiw is menge Hudiyu

mehizuwi te mekeg̵eg̵ehem he Megbevayà su wazà

minsan deisey zà he egkesamà kenitew

su midlimas kiw zin en pezem iring te menge meg̵inged

dutun te menge inged

he Suduma wey Gumura.”

30Ne iyan ibpesavut ku kayi is: is menge etew he kenà menge Hudiyu, minsan pa te wazà metag̵ù diyà te isip dan he egkehimu he meisip sikandan he metazeng te Megbevayà, duen menge zuma kandan he pinaag̵i te kedtuu zan mid-isip sikandan gihapun he metazeng. 31Iyan, is menge kevuwazan ni Israyil, kunaan dan ke egkehimu sikandan he metazeng pinaag̵i te kedserig̵i zan te kedtumana te kesug̵uan, ne nasì wazà heini mehimu. 32Ne maan is wazà heini mehimu? Su iyan dan midserig̵an is keugelingen dan he menge ulaula he meupiya ne wazè dan medtuu ki Jesu Kristu. Ne tenged kayi nehimu sikandan he iring te menge etew he nekesipà te zekelà he vatu ziyà te zalan. 33Su zuen insurat he Lalag te Megbevayà he edhenduen te,

“Duen idsavuk ku he vatu ziyà te inged te menge Hudiyu he Siyun.

Egkesipà heini te menge etew ne ebpekeurambak dan,

iyan, ke zuen edsarig kayi te vatu,

kenè en ebkepeel-elezan.”

Is begu he paagi: ang pulong sa Dios

© Wycliffe Bible Translators, Inc. 

More Info | Version Index