Search form

Ruma int

Is Mehitenged te Surat Diyà te TigRuma

Hengkey is paag̵i wey mezawat te Megbevayà is etew? Iyan heini he insà midtavak ni Pablo kayi te surat din he para te menge tumutuu ziyà te Ruma.

Is duma egkag̵i te iyan dà egkezawat te Megbevayà is etew he egketuman din is langun duen te kesug̵uan he imbilinbilin ni Moises dengan. Iyan, iyan mulà impesavut ni Pablo he wazà minsan sevaha he egkezawat te Megbevayà tenged te meupiya he menge vaal zin etawa tenged te menge kepuun din, su mekesesalà is langun he menge etew ne zait he ebpekesuwey te Megbevayà ne edsilutan te silut he wazè din pidtemanan. Ne zuen sevaha zà he paag̵i wey mezawat te Megbevayà is etew he iyan is kedtuuwi wey kedserig̵i ki Jesu Kristu.

Utew ingkeseeng ni Pablo is duma zin he menge Hudiyu su kenà sikandan edtuu ki Jesu Kristu. Neug̵et en is kebperetenga zan te hadì he ibpahadì te Megbevayà kandan, piru kenè dan edtuu he iyan en si Jesus sikan is hadì he midsug̵ù te Megbevayà he edhadì kandan wey edlibri kandan. Impesavut ni Pablo he egkeuma zed is timpu he ebpesakup en human ki Jesus is menge Hudiyu, ne g̵untaan iyan pa edhimuwen ni Jesus he menge sakup din is kenà menge Hudiyu. Ne egkeuma zaan is timpu he edsevahaan te Megbevayà is menge Hudiyu wey is kenà menge Hudiyu su pudu zin edhimuwa he sakup din. Emun idsarig te etew ziyà te Megbevayà is untung din, egkehimu zin is kebpezumazuma te Megbevayà pinaag̵i te g̵ehem te Wag̵as he Mulin-ulin. Egkeveg̵u is untung din, wey egkehimu zin is kebmahal te zuma, su is etew he midawat en te Megbevayà, kinahanglan daan he edewaten din is duma he etew wey edtevangan din.

Is begu he paagi: ang pulong sa Dios

© Wycliffe Bible Translators, Inc. 

More Info | Version Index