Search form

Nenged-ulaula 13

Intail dut te Menge Mibperetiyaya te Inged ne Antiyuka si Bernabe wey si Saulo te Ebpesabut te Lalag te Eleteala

1Diyà te menge mibperetiyaya ne riyà te Antiyuka ne ruen menge ebpelambas te Lalag te Eleteala wey ebpenurù te Lalag din. Ketà ne si Bernabe, si Simeon (ke ed-imukuen te Meitem), si Lucio (ne riyà ebpuun te Sirini), ne si Menain (ne riyan en medekelà te ki Hirudis ne gubinedur) wey si Saulo. 2Gewii ran te ebpengarap te Kerenan wey edlimpas te egkaan su ebpengeningeni ran, ne ruen impesabut kandan dut te Kedesenan ne Ebpetuntul te Menusiyà. Ke sikandin te, “Idtail niyu kediey si Bernabe wey si Saulo su apey ran egelevek dut te ebpeveelan ku.” 3Ketà ne midlimpas dan maa te egkaan su mibpengeningeni ran, ne indampen dan ke velad dan ki Bernabe wey si Saulo ne arà pà ne impeipanew ran.

Nekeuma si Bernabe wey si Saulo Riyà te Punul ne Sipri

4Geina te impeipanew si Bernabe wey si Saulo rut te Kedesenan ne Ebpetuntul te Menusiyà, ne mibpendiyà dan te inged ne Selusiya diyà te beyvey te rahat te mid-untud te kapal te ebpependiyà te punul ne Sipri. 5Guna ne nekerunggù dan en diyà te inged ne Selamis ketà te punul te Sipri, ne impesabut dan ke Lalag te Eleteala diyà te menge valey ne ebpengedian te menge Hudiyanen te penduan dan. Iyan miduma kandan si Juan ne ed-ingaranan dema ki Marcos ne edtavang kandan.

6Neeneb dan ini se punul ne Sipri egenat te inged ne Selamis taman te inged ne Papus. Ketà ne neuma ran ini se etew ne ed-ingeranan ki Barhisus ne metau ne ebaal te malik mata. Hudiyanen ini ne uvag kun ne ebpelambas te Lalag te Eleteala. 7Ne sepekat sikandin ni Sergio Peulu ne gubinedur te ini ne punul. Metampas ne ebpegitung si Sergio, ne impepengkayi te turuhan din si Bernabe wey si Saulo su egkesuat sikandin ne ebpemineg te Lalag te Eleteala. 8Ugaid ne mibelavag kandan ini se metau ne ebaal te malik mata ne ed-ingeranan ki Barhisus ne ed-ingeranan ded maa ki Elimas (su ini se ngaran din dut te kinehiyan ne Gerisiyanen) su kiyug din ne kenà ebpekeperetiyaya ke gubinedur ki Hisus. 9Ne si Saulo, ne ed-ingaranan dema ki Pablo, ne midlumunan dut te Kedesenan ne Ebpetuntul te Menusiyà ne midtengtengan din arà se metau te malik mata 10ne migkehiyan din te, “Anak ka rut te datù te pekaid! Ne kunterà ka rut te langun ne meupiya! Nepenù ke itungan nu te ulaula ne menge limbung! Ne ebpehintarù ka te benar ne Lalag te Kerenan! 11Na guntaani,” ke si Pablo, “edtebpien ka te Kerenan. Egkepisek ka ne meuhet ne kenà ka ebpekekita te rayag te andew.”

Arà dà ne mibmerusirem en se kedtengteng ni Elimas ne kenà en ebpekekita. Nekeyangapyangap sikandin se ebuyù te ebpikit kandin. 12Guna su nekita rut te gubinedur arà se ned-ulaula ni Elimas ne mibperetiyaya en sikandin. Su negeyip nevenar dut te impesabut ni Pablo kandin mekeatag dut te Lalag te Kerenan.

Nekeuma si Pablo wey si Bernabe Riyà te Inged ne Antiyuka Lusud te Inged ne Pisidya

13Mid-awà ensi Pablo ketà te inged ne Papus ne mid-untud dan te kapal te ebpependiyà te inged ne Pirga lusud te inged ne Pempilya. Nekeuma ran ne si Juan ne ed-ingaranan dema ki Marcos ne midsuwey kandan su midlivid sikandin diyà te Hirusalim. 14Ne mid-awà en si Pablo ki Bernabe riyà te inged ne Pirga ne midlaus dan diyà te inged ne ed-ingaranan maa te Antiyuka diyà te lusud te Pisidya. Dut te Hewii ne Id-imeley ne midlusud dan diyà te baley ne ebpengedian te menge Hudiyanen te penduan dan ne mibpinuu ran dutun. 15Duen mibasa rut te insurat ne penduan ni Moises wey ingkesurat dut te menge ebpelambas te Lalag te Eleteala dengan. Neipus ketà ne ruen midsuhù dut te pekilukesen diyà te baley ne ebpengedian dan te migkahi te, “Menge suled, embiya ruen egkehiyen niyu kayi te menge etew ini ne nevurun ne ebpekepevag-et te hinawa ran ne leleha niyu en.”

16Ketà ne mid-itindeg si Pablo ne mid-uyew te belad din ne migkahi te,

“Menge ruma ku ne menge kevuwaran ni Israyil abpeg dut te menge etew ne kenà Hudiyanen ne nevurun kayi su ebpengarap te Eleteala, pemineha niyu ini se egkehiyen ku keniyu. 17Ini se menge keep-epuan dut te sikami ne menge Hudiyanen,” ke si Pablo, “ne nepemilì te Eleteala, ke Eleteala ne ebpengerapen dut te sikami ne bansa te Israyil. Ne mibmerakel ke kevuwaran dan te gewii ne riyà dan med-ubpà te inged ne Ihiptu, inged ini te ruma pà ne bansa. Ne midtevangan dan dut te gehem te Eleteala su nekeliyu ran ketà ne inged. 18Lusud te neked-epat nepulù ne rahun diyà te tanà ne kenà egkeubpaan te etew se kinetigker dut te Eleteala kandan, misan warà dan medtuman te menge lalag din. 19Ne pitu ne bansa se midereetan din diyà te lusud te inged ne Kenaan,” ke si Pablo, “ne impeangkun din ini se tanà dut te menge etew rin ne kevuwaran ni Israyil. 20Ne inggenat dut te hewii ne mibpendiyà dan te inged ne Ihiptu taman dut te hewii ne ked-ubpà dan diyà te inged te Kenaan ne neked-epat ne hatus wey lelima nepulù ne rahun.

“Neipus arà,” ke si Pablo, “ne ruen en menge perekukum ne netendù te Eleteala ne ed-ewit kandan taman dut te hewii ne si Samuel en se ebpelambas te Lalag te Eleteala. 21Ketà ne mibuyù dan te Eleteala te ruen datù ne ed-ewit kandan. Ne midtendù din si Saulo, ke anak ni Kis, ne kevuwaran ni Benjamin, ne midatù kandan taman te epat nepulù ne rahun. 22Guna su in-awà sikandin te Eleteala ne si David en maa se imperatù te Eleteala kandan. Ne ini se migkahi te Eleteala mekeatag ki David, ke sikandin te, ‘Si David ini, ke anak ni Isai, se ebpekesuhat te hinawa ku. Su edtumanen din ke langun ne idsuhù kandin.’ 23Na,” ke si Pablo, “si Hisus ini ne kevuwaran ni David ne nepemilì te Eleteala ne impasad din ne ebpekepelihaun keytew ne menge kevuwaran ni Israyil. 24Ne rutun te warà pà medrudsù te ebpenurù si Hisus, ne nekeuma si Juan se ebpesabut dut te langun ne menge kevuwaran ni Israyil te mebpedsendit dan wey ebpebunyag su tuus te ed-engked dan en dut te meraat ne ulaula ran. 25Guna su mehaan en ebpekeipus si Juan dut te helevek ne imbehey kandin te Eleteala, ne ruen migkahi rin dut te menge etew. Ke sikandin te, ‘Engkey a diyà te itungan niyu? Kunaan niyu vuwa ke siaken en ke ebpenerengen niyu, ugaid ne kenà siak. Ugaid ne arà se ebpenerengen niyu ne ebpeketundug kedì, ne kenà a edait te misan edluung dà te telumpà din.’

26“Na menge ruma ku ne menge kevuwaran ni Israyil,” ke si Pablo, “wey ke menge etew ne kenà Hudiyanen ne nevurun kayi su ebpengarap te Eleteala, sikita ke mibpeewitan te Eleteala dut te menge lalag din su apey kiyu ebpekeliyu rut te keberedusaan mekeatag dut te salà tew. 27Su ke menge etew riyà te Hirusalim wey misan ke egkeunutan dan ne warà dan metueni te iyan bes ebpekepeliyu kenitew ne si Hisus. Ne warà dan mesebuti ke menge lalag ne ingkesurat dut te menge ebpelambas te Lalag te Eleteala rengan, misan uman Hewii te Id-imeley ne egkerineg dan te kebesaa diyà te menge baley ne ebpengedian dan te penduan dan. Ugaid ne misan iring ketà te warà dan mesebuti ini, ne netuman dan arà se ingkesurat dut te menge ebpelambas te Lalag te Eleteala rengan ketà te in-isuhat dan ne kewagib te ebpeimetayan dan si Hisus. 28Ne misan warà netuen dan ne ibenar ne salà ne dait ne ebpeimetayan si Hisus, ne mibuyù dan ki Pilatu ke gubinedur te ebpeimetayan kandin. 29Guna su neipus arà se nenged-ulaula te kegketuman dut te ingkesurat neraan te menge ebpelambas te Lalag te Eleteala rengan ne ibped-ulaula ki Hisus, ne in-awà dut te menge mibperetiyaya ke bangkey ni Hisus ketà te pinebelavag ne kayu ne inleveng dan. 30Ugaid ne mibanew sikandin te Eleteala, 31ne guna su nevanew en sikandin ne taman te pipira ne hewii ne mibpekitakita sikandin dut te menge nekeruma kandin ne egenat te lusud te Geliliya taman te Hirusalim. Ne guntaani ne sikandan se titihus ne ebpenudtul mekeatag ki Hisus diyà te langun ne menge kevuwaran ni Israyil.

32“Na sikami,” ke si Pablo, “ne mibpengkayi su ibpesabut dey keniyu ke Meupiya ne Tudtul. Ini se Meupiya ne Tudtul ne mekeatag dut te impasad te Eleteala te menge keep-epuan tew rengan. 33Na ini se impasad din kandan dengan ne netuman en kayi te kenitew ke menge kevuwaran dan ketà te kinebanew ki Hisus. Su ruen impesurat te Eleteala riyà te riberù ne ed-ingaranan te Salmu ketà te ikeruwa ne bayuk ne egkahi te,

‘Sikuna ke Anak ku

ne guntaani ne ibpekita ku te Amey a nikuna.’

34Ne ruen dema impesurat te Eleteala mekeatag te kebanew kandin ne kenà egkeredak ke lawa rin su migkahi te,

‘Ini se penaub ne impasad ku ki David dengan

ne edtumanen ku kayi te keykew.’

35Ne ruen pà lavew impesurat te Eleteala ki David ne migkahi ni Hisus te,

‘Siaken se metulanged ne sugsuhuen nu

ne kenà nu idtuhut ne ini se lawa ku

ne egkeredak diyà te leveng.’

36“Na netuenan ta, menge suled,” ke si Pablo, “ne midtuman ni David arà se mibpeveelan kandin te Eleteala, ne guna su neipus din na minatey en. Ne inleveng sikandin diyà te ulid te midlevengan te menge apù din, ne neredak ke lawa rin. 37Ugaid ne si Hisus, arà se mibanew te Eleteala, ne warà mulà meredak ke lawa rin.

38-39“Tembù be menge suled, langun niyu ne menge ruma ku ne kevuwaran ni Israyil, ketueni niyu ne kayi ebpuun te ki Hisus ini se lalag ne ibpesabut ku keniyu ne kebpekeliyu ta te kedusa te Eleteala keyta mekeatag dut te menge salà ta. Su piya engkey ne etew se ebperetiyaya kandin ne ebpekeliyu dut te kedusa te Eleteala kandin, ugaid ke kedtuman ta rut te menge penduan ni Moises ne kenà ebpekegaga ne ebpeliyu keyta. 40Na uram kew su apey kenà egked-ulaula kayi te keniyu ini se impesurat te menge ebpelambas te Lalag te Eleteala rengan ne egkahi te,

41‘Sikiyu ne menge edsumpalit su kenà kew ebperetiyaya,

ne uram kew!

Su egkegeyip kew te ebeelan ku,

ne ebpematey kew, ke se Eleteala.

Su ruen ebeelan ku te biviyag kew pà

ugaid ne kenà niyu ebperetiyayaan,

misan duen ebpemenudtul keniyu.’”

42Nekeipus si Pablo te edlalag ne gewii te edlihawang dan en ki Bernabe dut te baley ne ebpengedian te menge Hudiyanen te penduan dan, ne migkehiyan dan dut te menge etew te medlived dan te edtundug ne Hewii ne Id-imeley su apey ran mekeuman mekepesabut mekeatag te ini. 43Ne guna su midlihawang en ke menge etew ne nevurun ketà, ne ruen midtundug ki Pablo wey si Bernabe. Ini se midtundug kandan ne menge Hudiyanen wey kenà Hudiyanen ne midruyud te peretiyaya te menge Hudiyanen. Ne migkehiyan dan ni Pablo wey si Bernabe te mibag-et dan ke hinawa ran te kenà dan medlekà dut te kebperetiyaya ran te Eleteala ne midlimù kandan.

44Guna su neuma en ke edtundug ne Hewii te Id-imeley ne malùmalù langun ne menge etew te inged ne Antiyuka ne nevurun su ebpemineg te Lalag te Kerenan. 45Guna su nekita dut te menge Hudiyanen te denda ne menge etew ne nevurun, ne nesihi ran midsumpalit dan ke impenurù ni Pablo ne midtempelà dan dema sikandin.

46Ugaid ne nasì en ne mid-iseg si Pablo wey si Bernabe te edlalag ne egkahi te, “Iyan iya se ed-unaan dey sikiyu ne menge Hudiyanen te ebpesabut dut te Lalag te Eleteala. Ne geina te warà niyu telimaa ini wey ne warà niyu mepegitung te sikiyu se dait ne ebpeketelimà te umur ne warà edtemanan din, ne ed-ewaan dey sikiyu su ebpendiyà key te menge etew ne kenà Hudiyanen. 47Su ini rema ke insuhù te Kerenan ne ebpeveelan kenami ne ingkesurat ne Lalag din ne egkahi te,

‘Iring kew te menge sulù ne intahù ku

ne ebpekevehey te rayag

dut te menge etew ne kenà Hudiyanen,

su apey ebpekeuma ini se Meupiya ne Tudtul

diyà te epat ne pediyulu te dunya

te siaken se ebpekepeliyu te menge etew

rut te kedusa te Eleteala kandan!’ ”

48Guna su nerineg ini dut te menge etew ne kenà Hudiyanen ne nengehalew ran wey mideyù dan ke Eleteala mekeatag dut te lalag din. Ne langun ne menge etew ne nepemilì te Eleteala ne ebehayan te umur ne warà edtemanan din ne mibperetiyaya en ki Hisus.

49Nekeeneb ini se impesabut ne Lalag te Kerenan diyà te langun ne menge inged ketà. 50Ugaid ne migkehiyan dut te menge Hudiyanen ke menge unuten wey ke menge egkeedatan ne menge meritan ne kenà Hudiyanen ne ebpengarap te Eleteala se ebaal te igkeepesi su apey ran ebpekesekiti si Pablo ki Bernabe. Ketà ne impeawà dan arà se deruwa rut te inged dan. 51Ne ketà te ked-awà ni Pablo ki Bernabe ne midagdag dan ke lipupuk dut te menge paa ran su tuus ini te kenà en kilid kandan kegkeuma arà se hewii ne kedtimbang te Eleteala te menge etew. Ne midlaus dan en diyà te inged ne Ikunya. 52Ne ke menge mibperetiyaya ki Hisus ne netetahak diyà te Antiyuka ne midlumun kandan ke Kedesenan ne Ebpetuntul te Menusiyà ne nehalew ran nevenar.