Search form

Nenged-ulaula 6

Ke Pitu ne Etew ne Nepemilì dut te Menge Kedserihan ne Nevehayan te Helevek

1Ketà te arà ne hewii te ed-iseg-iseg en ke kerakel dut te menge mibperetiyaya ki Hisus, ne ruen nevaluy ne kewehaan dan dut te teleinged ne menge Hudiyanen ne Hibruwanen se kinehiyan din wey ke menge Hudiyanen ne Gerisiyanen se kinehiyan din. Iyan migkahi dut te menge Hudiyanen ne Gerisiyanen se kinehiyan din ne kenà egkevehayan ke menge balu ne meritan te kureta ne ed-um-umunen dan te uman gewii. 2Dutun ne impetawag dut te sepulù wey deruwa ne menge kedserihan ke langun ne mibperetiyaya ki Hisus ne migkahi ran te, “Kenà meupiya te sikami ne menge kedserihan se ed-engked ne ebpemesabut dut te Lalag te Eleteala apey rey egketuganur ke kurang dut te balu ne menge meritan. 3Tembù be menge suled,” ke sikandan, “pemilì kew te pitu ne etew kayi te keniyu, ke etew ne midlumunan dut te Kedesenan ne Ebpetuntul te Menusiyà wey ruen ketau rin. Ne ini ne helevek ne idsarig dey riyà te kandan. 4Ketà,” ke sikandan, “ne sikami ke menge kedserihan ne kenà en egkeseletan ke hewii te kebpengeningeni rey wey kebpemesabut dey dut te Lalag te Eleteala.”

5Nerineg dan ini se menge lalag dut te menge kedserihan ne nesuatsuat ke langun ne nevurun ketà. Ne mibpemilì dan en si Esteban su ini ne etaw ne dekelà se kebperetiyaya rin wey midlumunan dut te Kedesenan ne Ebpetuntul te Menusiyà. Ne ke ruma ne mepemilì dan dema ne si Felipe, si Procuru, si Nicanor, si Timun, si Parmenas, wey si Nicolas ne riyà ebpuun te Antiyuka. Si Nicolas ini ne kenà Hudiyanen, ugaid ne nekeruyud sikandin dut te tuluuwen dut te menge Hudiyanen. 6Ne ini se nepemilì dan ne impeitindeg dan ne impekilala rut te menge kedserihan. Ne gewii ran te ebpengeningeni ne indampen dan ke menge belad dan dut te nepemilì dan su ebuyù dan te ebpeneuven dan te Eleteala.

7Ketà ne ed-iseg-iseg se kebpekeeneb dut te ibpesabut dan ne Lalag te Eleteala. Ne ed-iseg-iseg dema se kerakel dut te mibperetiyaya ki Hisus kayi te Hirusalim, ne merakel dema se menge terebpelengesa ne mibperetiyaya ki Hisus.

Ke Kinesigkema ki Esteban

8Ne si Esteban ini, ne mibpenaub te Eleteala ne ruen gehem te Eleteala ne imbehey kandin su riyà te etuvangan te menge etew ne ruen neveelan din ne mekegeyip nevenar wey ulaula ne mekeinuinu. 9Ugaid ne ruen menge Hudiyanen riyà te senge valey ne ebpengedian te penduan dan ne ed-ingaranan te “Menge Uripen ne Nevelukasan” ne migkunterà ki Esteban. Ini se menge Hudiyanen ne riyà ebpuun te inged ne Sirini wey Elihendriya wey riyà ebpuun te lusud te inged ne Silisya wey Asiya ne mibaal te kebpekidlewanà ki Esteban. 10Ugaid ne mibehayan si Esteban te ketau dut te Kedesenan ne Ebpetuntul te Menusiyà, tembù be warà mekeatu ke ebpekidlawan kandin.

11Ketà ne ini se menge etew ne ebpekidlawan, ne ruen midselipsip kandan te kureta te egkahi te, “Nerineg dey ke meraat ne menge lalag ni Esteban mekeatag ki Moises wey ke Eleteala!”

12Sabap dut te tarù dan ne nehuvut ke menge etew, ke menge pekilukesen, wey ke menge meyterù dut te penduan. Ne arà dà iyan ne migsigkem dan en si Esteban ne mid-ewit dan sikandin su ibpeetuvang diyà dut te menge Perekukum. 13Ne ruen dema impelusud dan ne edlalag te tarù mekeatag ki Esteban. “Ini se etew,” ke sikandan, “ne layun edlalag te meraat ne ebpekesuhat dut te egkeedatan ne Nekebpuru ne Valey te Eleteala wey mekeatag dut te menge penduan ni Moises. 14Su nerineg dey te egkahi sikandin,” ke sikandan te, “si Hisus ini ne ebpuun te Nesarit ne edrundusen din kun ini se Nekebpuru ne Valey te Eleteala wey edsembian din ke langun ne betasan ne intahak keyta ni Moises rengan!”

15Ne langun dut te menge Perekukum ne nevurun ketà ne midtengteng ki Esteban, ne nekita ran ke paras din ne iring dut te paras te suluhuen te Eleteala.