Search form

Lucas 1

1Diyà te ki Teofilo:

Merakel en se menge etew ne migeram midsurat te guhud mekeatag te ned-ulaula ni Hisus kayi te kenami. 2Iyan dan insurat ke nengeguhud kandan dut te menge etew ne nekekita en iya kayi te ned-ulaula igenat te rudsuan wey iyan dan dema mibpesabut te Lalag te Eleteala. 3Na Teofilo, langun ini ne ned-ulaula ne midsusi ku up-upiani, tembù be netahù te itungan ku se edsuratan ku sikuna kayi te ned-ulaula endei se kegkeatur din. 4Idsurat ku ini su apey nu metueni en iya te benar ini langun se impenurù keykew.

Impesabut Ke Ked-anak Ki Juan ne Ebpembunyag

5Iyan ku egkepengguhud ne timpu te iyan pà edatù si Hirudis dut te pruvinsiya te Hudiya ne ruen etew ketà ne ed-ingaranan ki Zacarias. Si Zacarias ini ne senge etew ne terebpelengesa rut te kevuwaran te keep-epuan dan dengan ne ed-ingeranan ki Ebiha su ke kevuwaran te Ebiha se menge terebpelengesa te Eleteala. Iyan din esawa ne ed-ingeranan ki Elisabet ne kevuwaran te bansa te Arun ne terebpelengesa rema te Eleteala. 6Ne ini se senge tiwelayan ne metidtu se hinawa ran diyà te etuvangan te Eleteala ne warà igkesawey kandan dut te kedtuman dan te langun ne suhù wey penduan te Eleteala. 7Ugaid ne warà anak dan su kenà ed-anak si Elisabet su elin dan en nelukes.

8Ne neuma en ke menge gewii te iyan ebpekepelengesa ne si Zacarias wey ke menge ruma rin ne kevuwaran ni Ebiha diyà te Nekebpuru ne Valey te Eleteala. 9Na duen betasan dut te menge terebpelengesa te Eleteala ne engkey ki ngaran se egemew ne sikandin se edlusud diyà te Nekebpuru ne Valey te Eleteala su edtutung te rukut. Ne arà ne hewii ne ki Zacarias se migemew ne midlusud en sikandin diyà te Nekebpuru ne Valey te Eleteala su edtutung te rukut. 10Ne gewii rin te edtutung te rukut kayi te lusud, ne riyà te luwal ebpengeningeni ke merakel ne etew.

11Kemulu pà ne ed-ulaula si Zacarias kayi ne ruen suluhuen te Eleteala ne mibpekita kandin, kayi nekeitindeg te rapit te egkekewanan dut te edtutungan te rukut. 12Nekita rà ni Zacarias ne netekawen sikandin ne neandek-andek nevenar. 13Ugaid ne migkahi ke suluhuen te Eleteala te, “Kenà ka meandek, Zacarias, su nerineg te Eleteala ke pengeningeni nu ne ke esawa nu ne ebpekeanak te meama, ne iyan nu iingaran ne si Juan. 14Egkehalew ka nevenar kandin, ne kenà ketà dà taman su kehelawan dema dut te ruma ne etew ketà te ked-enaka kandin. 15Su egkevaluy sikandin ne mepurù ne etew diyà te etuvangan te Eleteala. Kenà sikandin ed-inum te piya engkey ne ebpeketevereg ne ed-inumen. Ne misan igenat te kenà pà sikandin id-anak ne edlumunan en sikandin dut te Kedesenan ne Ebpetuntul te Menusiyà. 16Ne kayi te kebpenurù din ne ebpekepelilived te merakel ne Hudiyanen riyà te Kerenan dan ne Eleteala ne andang ne ebpengeningeniyan dan. 17Ini se anak nu si Juan,” ke se suluhuen te Eleteala, “ne edsuhuen te Eleteala ne ibpeuna te ebpeketuenan te mehaan ne ebpekeuma ke Kerenan. Ne ebehayan sikandin te baher wey edlumunan dut te Kedesenan ne Ebpetuntul te Menusiyà iring ki Elias ke etew ne mibpelambas te Lalag te Eleteala rengan. Kayi ebpuun te kebpenurù ni Juan ne ebpemeked-ulitey ke hinawa rut te menge amey wey ke menge anak. Ne ke menge etew ne warà mebperumaruma te suhù te Eleteala ne ebpekedsendit ne arà pà ne ebpekeulit te metidtu ne itungan. Ne kayi te penurù din ne ebpekepenehana ke menge etew dut te kebpekeuma ni Hisus ke Kerenan.”

18Mighahi si Zacarias diyà te suluhuen te Eleteala te, “Maan engkey ve se idtuus ku te benar ini se migkahi nu? Su siaken ne lukes en, ne lukes en dema ke esawa ku.”

19Migkahi ke suluhuen te Eleteala maa te, “Siak imbe si Gabriel ke suluhuen te Eleteala ne layun diyà te etuvangan din. Sikandin iya se midsuhù kedì su ebpeketuenan keykew ini se meupiya ne egked-ulaula. 20Ne warà ke ma mibpehimbenar dut te migkahi ku, Zacarias,” ke se suluhuen te Eleteala, “ugaid ne egkeuma ke enget ne hewii ne egketuman imbe iya. Na geina te warà ka mibpehimbenar, ne egkeemew ka taman te egked-ulaula ini se migkahi ku.”

21Ne ini se menge etew ne mibpulung midtahad ki Zacarias diyà te luwal, ne neinuinu ran su malù neuhet sikandin diyà te lusud te Nekebpuru ne Valey te Eleteala. 22Guna su midlihawang en si Zacarias ne kenà en ebpekekahi riyà te menge etew su ebpenguyew-uyew rè be ne ketà ne neemew en sikandin. Ne netuenan dut te menge etew te ruen en impekita kandin te Eleteala diyà te lusud te valey te Eleteala.

23Neipus ni Zacarias ke kandin ne hewii te egelevek diyà te Nekebpuru ne Valey te Eleteala ne mid-ulì en. 24Warà meuhet ne mibpenehipuun en ke esawa ni Zacarias, ne nekedlelima ne vulan ne mid-ubpaubpà sikandin te valey. 25“Ne ini pè be ne ingkeyru a te Eleteala su ebpekeanak ad,” ke sikandin. “Ne ebpekeengked en ke menge etew ne edtekudì kedì.”

Impesabut ke Ked-anak Ki Hisus

26Guna su ikeenem en ne vulan te kehingeyan dut te esawa ni Zacarias ne midsuhù te Eleteala ke suluhuen din ne si Gabriel diyà te inged ne Nesarit lusud te Geliliya. 27Iyan mibpeveyaan kandin ne riyà te senge etew ne raha ne nepesaran en se ed-esawaen te kenakan ne ed-ingeranan ki Jose, ke kevuwaran dut te ratù dan dengan ne si David. 28Nekeuma ke suluhuen te Eleteala riyà te ki Maria ne migkahi en te, “Na kehalew ka, Maria! Bebegian ka ne etew su kayi en ke Eleteala te kenikew.”

29Guna su nerineg ni Maria ke lalag dut te suluhuen te Eleteala ne neliveg nevenar sikandin, ne mibpegpegitung din te engkey vuwa se meana rin. 30Ne migkahi ke suluhuen te Eleteala kandin te, “Kenà ka meandek, Maria, su midtuvaran ka te Eleteala. 31Ebmehingey ka ne ed-anak ka te meama ne iyan nu iingeran ne si Hisus. 32Ebmepurù sikandin ne iyan duma ne id-umew kandin ne Anak en iya te Eleteala ne pinekemepurù te langun. Iyan ebpepurù kandin ne Eleteala,” ke se suluhuen, “su ibehey rin kandin ke edetuan dut te apù din dengan ne si David. 33Ne ini se anak nu ne edatù te langun ne menge Hudiyanen, ke menge kevuwaran ni Jacob. Uya, ini se kegkeratù din ne warà ketepusan din.”

34Migkahi si Maria riyà te suluhuen te, “Egkemenumenu be buwa ini? Su siaken ne matag nepasad se selenggunì ne warà key pà mepakey ketà te meama.”

35Migkahi maa ke suluhuen te Eleteala te, “Iyan ma edalandalan keykew ke Kedesenan ne Ebpetuntul te Menusiyà, ne ke gehem te Eleteala ne ini en te keykew. Tembù be ini se igkeanak nu ne berekat ne vatà ne iyan id-ingaran kandin ke Anak te Eleteala. 36Ne kenà ini rà se tudtul ku,” ke se suluhuen te Eleteala, “su arà se ayà nu si Elisabet ne kenà kun ed-anak ne ikeenem din en ne vulan te kehingeyan din misan lukes en sikandin. 37Su embiya Eleteala, ne egkeveelan din ke misan engkey en.”

38Nerineg dà ni Maria ne migkahi en te, “Berekat ne ed-ul-ulaan din en ini se migkahi nu kayi te kedì. Su siaken, ne Eleteala se ebayàbayà kedì.” Arà dà ne mid-ewean en dut te suluhuen te Eleteala si Maria.

Mibpendiyà si Maria Diyà te ki Elisabet

39Warà meuhet ne mibpenines si Maria ne migaangaan migenat su ebpendiyà te senge inged diyà te buvungan lusud te Hudiya. 40Nekeuma si Maria riyà te valey en ni Zacarias ki Elisabet ne mibpenehetiat sikandin ki Elisabet. 41Guna su nerineg ni Elisabet ke penehetiat ni Maria ne midwaleng ke vatà kayi te hetek din. Ne ke Kedesenan ne Ebpetuntul te Menusiyà se midlumun ki Elisabet. 42Ne ruen impekahi rin ki Maria ne mibmerahing ke suwara rin te nekepemensag sikandin su kegkehalew rin se egkahi te, “Warà idsan nu ne meritan ne midtuvaran te Eleteala ne iring kayi! Ne engketà ded se kedtuvari dut te egkeanak nu! 43Maan buwa ke midekdekelà a te hinawa te Eleteala se iyan en ebpeengkayi te kedì ke iney rut te Kerenan ku? 44Su nerineg ku rà sikew se ebpenehetiat ne midlehuwat te kegkehalew rin ini se kayi te hetek ku. 45Tembù be midtuvaran ka, Maria,” ke si Elisabet, “su mibperetiyaya ka te egketuman iya ke impesabut kenikew dut te suluhuen te Eleteala.”

Ke Bayuk ni Maria te Edeyù te Eleteala

46Migkahi si Maria te,

“Mesarig se kedeyù ku rut te Kerenan ku,

47ne dekelà se kegkehalew ku

dut te Eleteala ne ebpeliyu kedì;

48Su mibpemilì a nikandin ne edtuvaran din,

misan engkayi te kevevaan a ne edsugsuhuen din.

Igenat guntaani ne ini se kevuwaran,

ne idtitinudtulà dan te siaken kun

se midtuvaran te Eleteala

dut te langun ne memeritan,

49su mekegeyip ke menge mid-ulaula

dut te Eleteala kediey.

Su Eleteala ne mekegegehem

ne warà repeng din ke ngaran din.

50Igenat dut te pehaney ne kevuwaran

taman te ketepusan ne kevuwaran,

ne ibpekita rin ke kegkeyru rin

dut te langun ne ebperumaruma kandin.

51Impekita rin ke gehem din dut te mid-ulaula rin,

ne miburehey rin ke menge etew ne mepereyù

su apey kenà dan en metuman ke intahù te itungan dan.

52Ruen menge ratù ne metehel ne mibpekevavà din,

ne ke mepeembavà ne menge etew ne mibpekepurù din.

53Ke menge etew ne layun en neirui,

ne mibehayan te Eleteala te kurang dan;

ugaid ke menge etew ne kewasa,

ne pineulì din te kuyaskuyas.

54-55Warà melipati te Eleteala ke pasad din dengan

dut te keep-epuan tew si Abraham

wey ke menge kevuwaran din.

Su midtevangan kiyu rin,

ini se menge sugsuhuen din

ne kevuwaran ni Israyil.

Egkeyruwan kiyu rin dema

te warà edtemanan din,” ke si Maria,

“ini se menge kevuwaran ni Abraham ne nepemilì din.”

56Nekedtetelu buwa ne vulan se ked-ubpà ni Maria riyà te engki Elisabet ne arà pà ne mid-ulì sikandin.

Ke Kineanak Ki Juan Ke Ebpembunyag

57Neuma ke hewii ne mid-anak si Elisabet ne iyan din anak ne meama. 58Guna su nerineg dut te menge etew riyà te menge valey ne uvey ran wey ke menge suled dan ini se keupiya te Eleteala ki Elisabet ne nengehalew ran dema.

59Neuma ke ikewalu ne hewii ne miburun dan kayi te valey su edtumanen dan ini se betasan dan te menge Hudiyanen te ed-etus. Iyan dan perem id-ingaran kayi te vatà ne si Zacarias, idsangey red dut te amey rin, 60ugaid ne migkahi ke iney rin te, “Kenà egkepakey! Si Juan se ngaran din!”

61Ne migkahi ran kayi te ki Elisabet te, “Ini se id-ingaran nu ne warà suled nu ne egkesangayan.”

62Ne mid-uyawan dan ke amey rin ke engkey se kandin ne id-ingaran. 63Mid-uyew rema si Zacarias te ebpevehey sikandin te egkesuratan te ngaran, ne iyan din insurat se “Si Juan se ngaran din.” Guna su insurat din arà ne neinuinu nevenar ke menge etew. 64Arà dà iya ne nekelalag en si Zacarias ne nereyù din ke Eleteala. 65Langun dut te ruma rin ne neandek, ne nekeeneb en ke tudtul dan dut te langun ne menge etew ne mid-ubpà ketà te buvungan lusud te Hudiya. 66Langun te nekerineg ne neketahù te itungan dan ne mid-insà te, “Engkey buwa se ebuwatan kayi te batà ini?” Su mepayag nevenar se Eleteala se mibpengelintau kayi te vatà.

Ke Bayuk ni Zacarias

67Midlumunan dut te Kedesenan ne Ebpetuntul te Menusiyà si Zacarias ne ini se impelambas din ne lalag din, ke sikandin te,

68“Edeyù kiyu te Kerenan,

ke Eleteala tew te menge kevuwaran ni Israyil.

Su mibpengkayi sikandin te edtavang

dut te sikitew ne menge etew rin,

ne ebehey kenitew te kebpekepeliyu kenitew.

69Ibpepengkayi rin en te keytew

arà se mekegehem ne ebpelihaun keytew,

ne kayi egketuntun te kevuwaran

dut te edsugsuhuen din

ne ratù tew rengan ne si David.

70Ini ve ke migkahi rin rengan

impepevayà dut te menge etew ne ebpelambas te lalag din.

71Su migkahi rin te ibpelihawang kiyu

rut te menge kunterà tew

wey riyà te edtingkungan te palad

dut te menge etew ne egkeepes kenitew.

72Migkahi rin dema te igkeyru rin

ke menge keep-epuan tew,

ne kenà din edlipatan ke pasad din kandan dengan.

73Mevaher ke pasad din dengan

dut te keep-epuan tew ne si Abraham,

74su impasad din te ibpeliyu kiyu

rut te palad te menge kunterà tew,

su apey edtuman kiyu te kiyug din te warà kegkeandek,

75su apey egkelunsey se ked-erapa tew kandin

wey metidtu kiyu riyà te etuvangan din

taman te biviyag kiyu pà.”

Ne migkahi maa si Zacarias kayi te anak din te,

76“Ne sikew ini ne anak ku,

iyan idtawag keykew ne ebpelambas te Lalag

te Eleteala ne warà repeng din.

Su edsuhuen ka nikandin

te ibpeuna dut te Kerenan tew,

su ebpeketuenan te menge etew

te ebpenehana rut te kebpekeuma rin.

77Sikuna ke ebpesabut

te menge kevuwaran ni Israyil

te igkepeliyu dan

dut te kedusai kandan

embiya ebuyù dan te Eleteala

te kebpesehad te menge salà dan.

78Su ke Eleteala tew ne iiruwen wey melimù.

Ne ini se kebpeliyu rin kenitew te kerusaan tew,

ne iring te kedsilà te andew

ne egkesilaan ke kerusireman.

79Ebpekereyahen te Eleteala ke kerusireman tew

su apey kenà kiyu en ed-elungen te kepepatey;

su apey langun tew ne melintad se kegingginawa.”

80Ne nekeiseg-iseg en ke kerekelà te anak en ni Zacarias ne mid-iseg en dema ke ketau rin mekeatag te Eleteala. Guna su dekelà en sikandin ne mibpendiyan en te tanà ne kenà egkeubpaan te etew, ne ketà mid-ubpà taman te neuma ke hewii te kebpenurù din te menge kevuwaran ni Israyil mekeatag te Lalag te Eleteala.