Search form

Lucas 4

Ke Kinepenggeram ki Hisus

(Mateo 4:1-11; Marcos 1:12-13)

1Guna su nebunyehan en si Hisus diyà te wayig te Hurdan, ne mid-awà dutun ne midlumunan nevenar dut te Kedesenan ne Ebpetuntul te Menusiyà ne mid-ewit en sikandin diyà te tanà ne kenà egkeubpaan te menge etew. 2Ne ketà ne lusud te neked-epat nepulù ne hewii ne mibpenggeraman en si Hisus ni Setanas ke datù te pekaid. Ne ini ne menge hewii ne warà bulug mekekaan sikandin ne ketà ne nevitil nevenar si Hisus.

3Ne migkehiyan ni Setanas ke datù te pekaid si Hisus te, “Embiya sikuna en ke Anak te Eleteala ne pebeluya nu ini se batu ne pan.”

4Ne migkahi si Hisus te, “Iyan insurat ne Lalag te Eleteala ne egkahi te, ‘Kenà egkeenen dà se igkeuyag te etew.’”

5Ne ketà ne mid-ewit ni Setanas si Hisus te edtegkereg ne seperek mata ne impekita rin ki Hisus ke langun ne inged kayi te ampew te dunya. 6“Ini se kebayàbayà kayi te langun ne inged ini ne ibehey ku keykew,” ke se datù te pekaid, “wey langun ini ne kekewesai, su langun imbe kayi ne imbehey kedì ne igkevehey ku te piya engkey ne egkesuatan ku. 7Langun din ini ne kenikew en embiya ed-arap ka kedì.”

8Ne migkahi si Hisus te, “Ruen impesurat ne Lalag te Eleteala ne egkahi te, ‘Iyan niyu rà erapa ne Kerenan ne Eleteala niyu, ne sikandin dà se ebperumdumaan niyu.’”

9Ne ketà maa ne mid-ewit dut te datù te pekaid si Hisus diyà te inged ne Hirusalim dutun te migketikangan dut te Nekebpuru ne Valey te Eleteala ne migkahi sikandin te, “Embiya benar ne sikew ke Anak te Eleteala ne umpak ka ruen. 10Su ruen impesurat ne Lalag te Eleteala ne egkahi te,

‘Edsuhù ke Eleteala te menge suluhuen din

ne ebpetugenuren keykew.’

11Ne ruen dema ketà ne egkahi te,

‘Edsepirawen ka nikandan

su apey kenà egkerudruri

ke menge paa nu te batu.’”

12Ne migkahi si Hisus te, “Ugaid ne ruen dema Lalag ne impesurat te Eleteala ne egkahi te, ‘Kenà kew baal te ralan ne ibpenggeram niyu te gehem dut te Kerenan ne Eleteala niyu.’”

13Guna su netuenan dut te datù te pekaid te kenà din egkepenggeraman si Hisus ne mid-ewaan din pà.

Midrudsù si Hisus te Helevek Din

(Mateo 4:12-17; Marcos 1:14-15)

14Mid-ulì en si Hisus diyà te Geliliya ne ke gehem te Kedesenan ne Ebpetuntul te Menusiyà ne ini en te kandin. Ne nekeeneb en dut te langun ne nekelingut ne inged ke tudtul mekeatag ki Hisus. 15Mibpenurù sikandin diyà te menge valey ne ebpengedian te menge Hudiyanen ne nekereyù kandin ke langun ne menge etew.

Warà Mibperetiyaya te Penurù ni Hisus Diyà te Inged Din ne Nesarit

(Mateo 13:53-58; Marcos 6:1-6)

16Ne arà pà ne midlaus si Hisus diyà te Nesarit, ke inged ini ne kayi en mibukelid sikandin. Neuma se Hewii ne Id-imeley ne mibpendiyà sikandin te valey ne ebpengedian te Hudiyanen te penduan dan su ini se kandin ne ulaula. Guna su nevurun dan en ne mid-itindeg en si Hisus su ebasa te Lalag te Eleteala. 17Induwal dan en kandin ke insurat ni Isayas, senge etew ne mibpelambas te Lalag te Eleteala rengan. Ne mibekar ni Hisus ini se insurat ketà te egkahi te,

18“Ke Kedesenan ne Ebpetuntul te Menusiyà

ne riyà ebpuun te Kerenan ne Eleteala

ne midlumun en kediey,

ne mibpemilì a te Kerenan ne Eleteala

su apey ku ibpesabut

dut te menge etew ne ayuayu

ke Meupiya ne Tudtul.

Ne mibpeveyaan din kedì

apey ku mepenudtuli te egkevelukasan

ke menge etew ne nevakù ni Setanas;

ne ebpengeulian ke menge pisek

su apey ran ebpekekita;

ne ebpelihawang dut te menge edtekutaken.

19Midsuhù a rin dema su apey ku mepenudtul

te ini en ke timpu te kebpeliyu te Kerenan ne Eleteala

te kandin ne menge etew.”

20Ne midlulun ni Hisus ke ebesaan ne in-ulì din diyà te mibehey kandin ne mibpinuu sikandin se ebpenurù kandan. Ne langun ne menge etew ketà ne rutun dà mepuhuy ke mata ran te kandin su ebpemineg. 21Ne migkahi sikandin kayi te kandan te, “Ini se nekahi rut te impesurat te Eleteala ne mibasa ku ne netuman en gunteani te ini ini en iya ne nerineg niyu.”

22Langun dut te nevurun ketà ne nevenaran dut te kebpenurù din, ne negeyip dan dut te keupiya te kedlalag din, ke sikandan te, “Maa, kenà anak ni Jose ayan?”

23Migkahi si Hisus te, “Ruen beseenan tew ne igkesuati niyu ves te egkahi kayi te kedì ini se egkahi te, ‘Embiya ebpemawì ka ne etew, ne bawii nu ke lawa nu.’ Ne seveka maa buwa ne egkekahi niyu te, ‘Ruen nerineg dey ne mid-ulaula nu riyà te inged ne Kapirnawum, ne kun imbe ul-ulaa nu rema kayi te keykew ne inged.’ 24Ugaid,” ke si Hisus, “ini se igkahi ku keniyu, warà etew ne ebpelambas te Lalag te Eleteala ne ebpeminehen te menge etew diyà te kandin ne inged. 25Benar ini se egkehiyen ku keniyu, iring ini se ed-ul-ulaan niyu guntaani rut te timpu rengan ne biviyag pà si Elias ke mibpelambas te Lalag te Eleteala. Su nekedtetelu ne rahun wey enem ne vulan ne warà uran, ne nesuhat te bitil ke langun ne inged din, ne merakel se menge ruma tew ne Hudiyanen ne nevalu ne meritan ne ebpengerehenan ketà te bitil. 26Ugaid ne warà ma suhua te Eleteala si Elias te ebpetevangan te senge etew kandan, nasì ne impependiyà si Elias te senge etew ne valu ne ed-ubpà te Seripta, lusud te Sidun. 27Ne ruen pà maa,” ke si Hisus, “gewii rema ni Eliseo te mibpelambas te Lalag te Eleteala ne merakel se menge Hudiyanen ne mibpendaru te kevuwa ne muna te it-it. Ugaid ne warà seveka kandan ne mibpevawian te Eleteala ki Eliseo, nasì ne impependiyà si Eliseo te senge etew ne kenà Hudiyanen ne si Naaman lusud te inged ne Siriya.”

28Nerineg dut te menge etew ne nevurun ketà se migkahi ni Hisus te edtavang ke Eleteala te kenà Hudiyanen, ne neepes-epes dan nevenar. 29Mid-itindeg dan ne migeweran dan si Hisus ne midtuyuk dan se ebpependiyà te puntur te tuhar su ketà metahù ke inged dan, ne idtimbag dan perem si Hisus diyà te dempilas. 30Ugaid ne mibpeniyuksiyuk si Hisus diyà te kandan ne midlevundus en se ed-ipanew.

Midsegseg ni Hisus ke Vusew ne Midsuuk te Meama

(Marcos 1:21-28)

31Ne midlaus si Hisus diyà te Kapirnawum, inged ne lusud te Geliliya. Ne neuma ke Hewii ne Id-imeley ne mibpenurù din ke menge etew. 32Nerineg dan ke kebpenurù din, ne neinuinu ran nevenar su ruen gehem te kebpenurù din.

33Ketà te valey ne ebpengedian dan te penduan dan ne ruen senge etew ne midsuukan te vusew. Nekita rin dà si Hisus ne migkuleyì te, 34“Hey Hisus ne riyà ebpuun te Nesarit, engkey se kememeniyà nu kayi te sikami ne vusew? Maa, edereetan key nikuna? Egkekilala ku sikuna su sikuna ke Berekat ne Anak te Eleteala!”

35Ne pineengked en ni Hisus ke vusew se egkahi te, “Engked ka rà, ne awà ka keniyan te meama ayan!” Ne intimbag pà dut te vusew ini se meama kayi te etuvangan te menge etew, ne mid-awà sikandin ugaid ne warà din mekeiri ini se meama.

36Ne rekelà se kinekegeyip dut te langun ne menge etew ketà ne mibpein-inseey ran te, “Engkey ve vuwa ini? Su utew rekelà se gehem din te ebpeawà te menge vusew, ne ebpemineg dan kandin.” 37Arà dà ne nekeeneb en ke tudtul te mid-ulaula ni Hisus diyà te langun ne nekelingut ne inged.

Neulian ni Hisus ke Mibpenderaru ne Etew

(Mateo 8:14-17; Marcos 1:29-34)

38Guna su mid-awà si Hisus kayi te valey ne ebpengedian te menge Hudiyanen te penduan dan, ne mibpendiyà te valey ni Simon. Seretà din ketà ne edetengen ke enuhang ni Simon ne meritan, ne mibuyù dan ki Hisus te bawii rin. 39Mid-uvey si Hisus dut te meritan ne pineawà din ke rateng. Arà dà ne neawà en ke rateng din ne mid-enew sikandin ne mid-ilutù en te ibpekaan kandan.

40Guna su ebpengirum-irum en ne langun ne menge etew ne ruen duma ran ne ebpenderaru te misan engkey en ne daru ne mibpeneheewit dan kayi te ki Hisus. Ne midampen din ke uman senge etew ne neulian en. 41Ne misan ke menge vusew ne impeawà din dut te menge etew ne edteverehen dan. Ne embiya ebpeewaen en ini se vusew ne egkuleyì dan te, “Sikuna ke Anak te Eleteala!”

Ugaid ne pineengked ni Hisus sikandan su kenà din idluhut ne edlalag dan su netuenan dan te sikandin ke Impasad te Eleteala rengan ne Ebperetuen te langun.

42Guna su egkeriwaswas en ne mid-awà si Hisus ketà te inged ne mibpendiyà sikandin te sibsiveyan. Mibpemengà sikandin dut te menge etew ne guna su netuen dan sikandin ne imbangen dan perem su apey kenà mekeawà diyà te kandan. 43Ugaid ne migkahi si Hisus kandan te, “Kenà egkepakey ne kenà ku ibpendiyà te menge etew diyà te ruma ne inged su ibpesabut ku rema kandan ini se Meupiya ne Tudtul mekeatag dut te Impasad te Eleteala ne Ebperetuen te langun su ini ke insuhù kediey te Eleteala.” 44Ketà ne midlevundus en mebpenurù si Hisus diyà te menge valey ne ebpengedian te Hudiyanen diyà te lusud te Hudiya.