Search form

Lucas 6

Ke Insà Mekeatag te Hewii ne Id-imeley

(Mateo 12:1-8; Marcos 2:23-28)

1Senge hewii ne Sepetu, ke Hewii ne Id-imeley, ne midtarà si Hisus wey ke menge edumdumaan din diyà te pareyanan. Ne gewii ran te edtarà ne ebpengurib ke menge edumdumaan ni Hisus te parey ne idsungit dan. 2Ne ruen ketà menge Peresiyu ne migkahi te, “Meambe ke ed-ul-ulaan niyu ini se ebpekesurang te Penduan tew ne egkahi te warà egelevek te hewii ne id-imeley?”

3Ne migkahi si Hisus te, “Maa, warà niyu mevasa ke impesurat te Eleteala mekeatag te mid-ulaula ni David, ke datù tew rengan? Su ruen hewii ne sikandin wey ini se menge sundaru rin ne nengevitil dan. 4Ne midlusud si David diyà te insivey ne Valey te Eleteala ne migkuwa rin ke egkeenen ne indenà diyà te Eleteala ne migkaan sikandin ne mibehayan din ke menge ruma rin. Ugaid ne kayi te penduan tew ne kenà arà egkekaan te piya engkey ne etew su ke menge terebpelengesa rà te Eleteala.” 5Ne migkahi pà maa si Hisus te, “Ke Impeanak te Menusiyà ke ebayàbayà te egkahi te engkey se edait ne ed-ul-ulaan dut te Hewii ne Id-imeley.”

Ke Meama ne Nekeyengkeng se Belad Din

(Mateo 12:9-14; Marcos 3:1-6)

6Senge Hewii maa ne Id-imeley ne mibpendiyà si Hisus te valey ne ebpengedian te menge Hudiyanen ne mibpenurù. Ne ruen ketà senge etew ne meama ne nekeyengkeng se kewanan ne velad din. 7Duen dema ketà menge Peresiyu wey menge meyterù te penduan ne ebpenipat ki Hisus embiya egkeulian din ini se etew te arà ne hewii ne id-imeley su ebpemengaan dan ke engkey se kegkesuhat dan ki Hisus te kevenar. 8Ugaid ne netuenan en ni Hisus ke netahù te itungan dan ne migkehiyan din en ke meama ne nekeyengkeng se velad din te, “Mama, itindeg ka kayi te uvey ku.” Ne mid-itindeg en ke meama ne mid-uvey en ki Hisus.

9Ne migkahi en si Hisus dut te menge etew ne nevurun ketà te, “Duen id-insà ku keniyu: Engkey ma se nekahi te penduan tew ne idtuhut ne ed-ul-ulaan tew te hewii ne id-imeley? Maa, edtavangan tew ke menge ruma tew etawa ebpemekeiran tew sikandan? Maa, edsumpatan tew ke umur te menge ruma tew etawa ed-imetayan tew?”

10Ne insihid din ke mata rin dut te langun ne menge etew ne migkehiyan din ke meama ne nekeyengkeng se velad din te, “Mama, ketenga nu ayan se velad nu.” Ne ketà ne migketeng dut te meama ke velad din, ne neulian en. 11Ketà ne neregreg te langet dan ke menge Peresiyu wey ke menge meyterù te penduan ne mibpein-inseey ran en ke engkey se ed-ul-ulaan dan ki Hisus.

Mibpemilì ni Hisus Ke Sepulù wey Deruwa ne Edumdumaan Din

(Mateo 10:1-4; Marcos 3:13-19)

12Nengepiraan ketà ne midtekereg si Hisus diyà te buvungan su ebpengeningeni, ne nepewpewaan se kebpengeningeni rin te Eleteala. 13Nepawà ne miburun din ke langun ne menge etew ne edurumaruma kandin ne mibpemilì sikandin te sepulù wey deruwa ne edumdumaan din ne mid-ingeranan din te Apustulis. 14Iyan dan ngaran ini se nepemilì din ne si Simon (ke ed-ingaranan dema ki Pedro) wey ke ari rin ne si Andres, si Santiago wey si Juan, si Felipe wey si Bartolome, 15si Mateo wey si Tomas, si Santiago ne anak ni Alfeo, wey si Simon (ne ed-ingaranan dema te Patriat ne iyan din meana ne diralem se lengesa rin dut te inged din), 16si Hudas ne anak ni Santiago wey si Hudas Iskeriyuti ne ed-ulug ki Hisus diyà te menge kunterà din.

Neulian ni Hisus Ke Menge Ebpenderaru

(Mateo 4:23-25)

17Ne midtupang si Hisus wey ke menge nepemilì din ne mid-engked dan ketà te malù mepatag. Ne ketà ne ruen nevurun ne merakel ne etew ne edurumaruma kandin wey menge etew ne riyà ebpuun te langun ne menge inged lusud te Hudiya, ne riyà ebpuun dema te Hirusalim, wey riyà ebpuun te menge inged ne Tiru wey Sidun diyà te beyvey te rahat. 18Mibpengkayi ran su ebpemineg te kebpenurù ni Hisus wey ebpevawì dema te menge raru ran. Duen kayi te menge etew ini midtevereg te vusew ne neulian ni Hisus. 19Ne langun ne menge etew ne migeram midsinagkew ki Hisus su ruen gehem din ne ketà ebpuun te kandin ne ebpekeulì te menge raru dut te langun dan.

Ke Benar ne Kehelawan

(Mateo 5:1-12)

20Ne midtengtengan ni Hisus ke menge edumdumaan din ne migkahi en te,

“Dayirayi kew ne menge ayuayu,

su sikiyu ke edetuan te Eleteala.

21Dayirayi kew ne menge egkevitil guntaan,

su ebpekevulungan kew te Eleteala keuremà.

Dayirayi kew ne menge egkemutu guntaan,

su egkehalewhalew kew keuremà.

22Dayirayi kew ke egkeepesan kew te menge etew

ne kenà kew nikandan edsehipaan,

ne ebpenempelaen kew,

wey egkahi ran te mereatey kew

su kayi egenat dut te keduma niyu

ke Impeanak te Menusiyà.”

23“Su iring kayi ke imped-ulaula te keep-epuan dan dut te menge etew ne mibpelambas te Lalag te Eleteala rengan. Egkehalew kew ke ini se egketemanan niyu ne id-idangdang kew su dekelà se lalew ne ebpenerengen niyu diyà te langit.

24Ugaid ne mekeruanduan kew ne menge kewasa guntaan,

su nepehinlelawan niyu ke meupiya ne egketemanan niyu kayi.

25Mekeruanduan kew ne ebpengevulung guntaan,

su ruen timpu ne egkevitil kew keuremà.

Mekeruanduan kew ne nengehalew guntaan,

su ruen timpu ne egkemutu kew

wey ebpekesinehew kew keuremà.

26Mekeruanduan kew ke edeyuen

dut te langun ne menge ruma niyu,

su ini se mid-ulaula te keep-epuan dan dengan,

su mibpendeyù dan ke mibèbeelan dà

ne mibpelambas te Lalag te Eleteala.”

Ke Penurù ni Hisus Mekeatag te Kedlimù Ta te Menge Kunterà Ta

(Mateo 5:38-48; 7:12a)

27Ne migkahi pà maa si Hisus te, “Iyan ku igkahi keniyu, langun niyu ne edtaan te telinga niyu, ne limui niyu ke menge kunterà niyu, ne upiani niyu ke hinawa niyu rut te egkengeepes keniyu. 28Ipengeningeni niyu te ebpeneuven te Eleteala ke menge etew ne ebpenrawak keniyu, ne ke menge etew ne ed-ayuaya keniyu ne ipengeningeni niyu sikandan. 29Embiya ruen etew ne edtabpì te naping niyu ne kenà kew bangen ke edtebpien din ke divaluy. Embiya ruen etew ne ed-ahew te kumbalà niyu ne kenà kew bangen ke egkuan din ke belagkas niyu ne kemisita. 30Embiya ruen etew ne ebuyù keniyu ne behayi niyu, ne embiya ruen etew ne egkuwa te keleglehan niyu ne kenà niyu en ewia. 31Ne misan engkey ne egkiyuhan niyu ne ibped-ulaula te menge etew keniyu, ne iring ketà dema se ul-ulaa niyu riyà te kandan.

32“Embiya iyan niyu rà igkelimù ke menge etew ne egkelimù keniyu, ne meambe ke ebpenareng kew te kebpenaub te Eleteala keniyu? Su misan ke menge beredusa ne igkelimù dan dema ke menge etew ne egkelimù kandan. 33Ne embiya iyan niyu rà ed-upianan ke menge etew ne ed-upiya keniyu, ne meambe ke ebpenareng kew te kebpenaub te Eleteala keniyu? Su misan ke menge beredusa ne ed-upiya ran dema rut te menge etew ne ed-upiya kandan. 34Ne embiya iyan niyu rà ebpeutangen ke menge etew ne kenà duwaruwa ne ebpekevayad, ne meambe ke ebpenareng kew te kebpenaub te Eleteala? Su misan ke menge beredusa ne ebpeutang dema rut te menge beredusa embiya kenà duwaruwa ne ebpekevayad. 35Ugaid ne sikiyu, iyan ku igkahi keniyu ne limui niyu ke menge kunterà niyu ne upiani niyu ke ed-ul-ulaan niyu kandan. Embiya ebpeutang kew ne kenà niyu pegitunga te kebpevayad ne ketà ne rekelà se idlalew keniyu. Su embiya ini se ed-ul-ulaan niyu, ne egkekita kayi te keniyu te sikiyu ne menge anak en te Eleteala ke mepmepurù te langun. Su melimù ke Eleteala misan diyà te menge etew ne warà te hinawa ran ke tavang din wey ke menge etew ne meraat se ulaula ran. 36Tembù be keyru kew te ruma ne etew iring dut te kegkeyru te Amey niyu riyà te langit kayi te langun niyu.”

Ke Penurù ni Hisus Mekeatag te Kedsawey ta

(Mateo 7:1-5)

37Ne migkahi pà maa si Hisus te, “Kenà kew edsawey te ruma ne etew, ne kenà kew edsewayan te Eleteala. Kenà niyu imesara te egkahi te nevenaran ke ruma ne etew ne kenà ed-imasad ke Eleteala te egkahi te nevenaran kew. Pesehara niyu ke salà te ruma ne etew ne ebpeseharen te Eleteala ke salà niyu. 38Behayi niyu ke ruma ne menge etew ne ebehayan kew rema te Eleteala. Ne iyan din ibehey keniyu ne ed-ip-ipenuen din ne ed-es-eseken din ne arà pà ne eberundtuwan din ke ibusbus ketà te edtehuan niyu. Su ke kerekelà te ibehey niyu te ruma ne etew ne iyan ded kerekelà te ibehey te Eleteala keniyu.”

39Ne mibpenempità si Hisus te, “Embiya ruen etew ne pisek, ne kenà egkepakey ne edtuyuk te etew ne pisek ded dema. Su embiya elin dan pisek ne ebpeked-unung dan se egkeulug diyà te lepak. 40Ne warà etew ne ebpepenurù pà ne iyan en mepurù dut te ebpenurù kandin, ugaid ne embiya netamat din en ke langun ne impenurù kandin ne ebpekeiring en dut te mibpenurù kandin.”

41Ne ruen pà maa migkahi ni Hisus, ke sikandin te, “Meambe ke edturikan nu ke salà te ruma nu ne iring te pesek, ugaid ne warà ma te hinawa nu te ruen salà nu ne iring te gedgeran kerekelà din? 42Engkey se kedtikà nu te egkahi riyà te ruma nu te id-awà nu ke pesek din, ugaid ne ruen ma nekepesek kenikew ne iring te gedgeran kerekelà din ne kenà nu egketuusan? Engkey en ayan ne kedtarùtarù! Unai nu pà te ed-awà ke nekepesek kenikew ne iring te gedgaran ne an pà ne ebpekekita ke en ne ebpengawà te pesek te ruma nu.”

Ke Ulaula te Menge Etew ne Ebpekeiring te Bahas te Kayu

(Mateo 7:16-20; 12:33-35)

43Duen pà maa migkahi ni Hisus, ke sikandin te, “Ke kayu ne meupiya se kegueyhuey rin, ne kenà ebahas te meraatey. Ne iring ded maa ke kayu ne ruen sakit din, ne kenà ebahas te meupiya. 44Su piya engkey ne kayu ne kayi nu egketueni te bahas din. Su kenà ebahas ke sepinit te paras, ne kenà ebahas ke merevuaya te igira. 45Ne engketà ded dema se menge etew,” ke si Hisus, “su ke etew ne meupiya se ulaula rin, ne meupiya rema se kedlalag din su meupiya se intahù te hinawa rin. Ugaid ke etew ne mereatey se ulaula rin, ne mereatey rema se kedlalag din su iyan din intahù te hinawa rin ne mereatey. Su piya engkey se intahù te etew te hinawa rin ne ini se egemew te bèbà din.”

Ke Deruwa ne Etew ne Ebevaley

(Mateo 7:24-27)

46Ne ruen pà lavew migkahi ni Hisus, ke sikandin te, “Meambe ke layun a niyu ed-ingerani te ‘Kerenan’, ugaid ne kenà kew ma eduma rut te igkahi ku keniyu? 47Idtarem ku keniyu ke engkey se egkeiringan dut te menge etew ne ed-uvey kedì ne ebpemineg te lalag ku ne ebperumdumaan dan. 48Embiya idsempita ta ne iring sikandin te etew ne riyà mebevaley te mevaher. Pehaney ne migkekalut sikandin te meralem ne midtehuan din te rekelà ne batu ne arà pà ne imbunsud din ke pelaus. Nepasad ini se valey ne midalem ke wayig ne nerumpak te wayig ini se valey, ugaid ne warà mekugal ke valey su midtegtehaman ma. 49Ugaid ne ke etew,” ke si Hisus, “ne ebpemineg kedì ne kenà din ebperumdumaan ke lalag ku ne iring sikandin te etew ne riyà mebevaley te ebpengesal-esalen dà diyà te pantad. Nepasad ini se valey ne nerumpak te dalem, ne arà dà ne nerundus en ne newahey en.”