Search form

Marcos 14

Mibentaan ke Menge Mepurù te Terebpelengesa wey ke menge Meyterù te Penduan te Kedsigkem ki Hisus su Ebpeimetayan

(Mateo 26:1-5; Lucas 22:1-2; Juan 11:45-53)

1Deruwa pà ne hewii ne egkeuma ke kevurunan ne edtenuran tew ne ed-ingaranan te Pista te Kedsehari te Suluhuen dut te menge apù tew rengan wey ke Pista te Kegkaan dan te Pan ne Warà Idsawug ne Ibpelevag. Ne ebpemengà ke menge mepurù te terebpelengesa wey ke menge meyterù te penduan te ralan te kedsigkem dan ki Hisus te kenà egketuenan dut te menge etew apey ebpeimetayan dan en. 2Ne mibpelelelahey ran te, “Kenà ta ini ed-ul-ulaan dut te kevurunan te pista su kema ke egkekita rut te menge etew ne egkeepes dan keytew ne egkehuvut en ketà.”

Mibperiyemutan en Neraan Ke Lawa ni Hisus te Kedleveng Kandin

(Mateo 26:6-13; Juan 12:1-8)

3Guna su riyà si Hisus te inged ne Bitanya ne riyà sikandin te valey ni Simon, senge etew ini ne kevuwaen muna pà te it-it ne neulian. Gewii te egkaan si Hisus ne nekeuma en ini se meritan ne mid-ewit te pelenaan ne mibeelan te elibastru, ne midtehuan te periyemut ne mepurù nevenar su mibeelan dut te lunsey ne Nardu. Ne mid-uvey en kandin, ne imbusbus din en ke periyemut kayi te ulu ni Hisus.

4Ne ruen menge etew ketà ne neepes ne mibpelelelahey ran te, “Babeba! Meambe ke midereetan din dà ini se periyemut? 5Iyan tumù ne indahang din ini ne igkepemehey pà diyà te menge ayuayu su labi tetelu nehatus ne pirak se elehà din!” ke sikandan. Ne nesewayan dan ini se meritan.

6Ugaid ne migkahi si Hisus te, “Pedteraya niyu sikandin! Meambe ke edsewayan niyu sikandin? Su meupiya nevenar ini se mid-ulaula rin kediey! 7Su ke menge ayuayu ne lelayun kew red ebpemekeduma ne egketevangan niyu sikandan, ugaid ne siaken ne kenà ad meuhet kayi te keniyu. 8Su ini se meritan,” ke si Hisus, “ne mid-ulaula rin en ke taman ne egkegaga rin, su mibperiyemutan din en ke lawa ku te kebpenehana te kedleveng kediey. 9Sevenarbenar ini se egkehiyen ku keniyu,” ke si Hisus, “te misan endei kayi te ampew te dunya ibpesabut ini se Meupiya ne Tudtul mekeatag kediey, ne egkepenudtul ded dema ini se mid-ulaula rin kediey ne kenà egkelipatan.”

Mibpendiyà si Hudas Iskeriyuti te Menge Mepurù te Terebpelengesa su Ebpekidsabut ke Ebmemenuwen Din te Ed-ulug si Hisus

(Mateo 26:14-16; Lucas 22:3-6)

10Ne ketà ne si Hudas Iskeriyuti, seveka rut te sepulù wey deruwa ne edumdumaan ni Hisus, ne mibpendiyà te menge mepurù te terebpelengesa su igkahi rin kandan te egkeulug en si Hisus diyà te kandan. 11Guna su nerineg dan ne nengesuatsuat dan nevenar, ne impasad dan kandin te ebehayan te pirak. In-awà dè be ketà ne ebpemengaan en ni Hudas ke ralan te kegkeulug din ki Hisus su apey mesigkem dan en.

Mibpekidseveka te Egkaan si Hisus dut te Menge Edumdumaan Din te Kedlavung te Pista te kedtenuri ran te Kedsehari te Suluhuen te Menge Apù dan

(Mateo 26:17-25; Lucas 22:7-13, 21-23; Juan 13:21-30)

12Ne ketà te egkeuma ne hewii te Pista te menge Hudiyanen te kegkaan dan te Pan ne Warà Insawug ne Ibpelevag, ne edsusumbalì dan te nati te bilibili ne egkeenen dan te kedtenuri ran dut te hewii rengan te Kedsehari te Suluhuen dut te menge Apù dan. Ne mid-insaan si Hisus dut te menge edumdumaan din te, “Endei rey ve ini ebpegetura se idlavung tew te Pista te Kedsehari te Suluhuen?”

13Ne ketà ne midsuhù ni Hisus se deruwa rut te menge edumdumaan din se egkahi te, “Una kew en be riyà te inged ne ruen ne edsinuhung keniyu ne meama ne ed-utuk te kelalew ne ruen wayig din. 14Tundug kew en be kandin, ne embiya ebpekeuma kew riyà te ed-ubpaan din ne kehiyi niyu ve ke kemuney te valey te, ‘Ibpeinsà dut te meyterù tew te, Endei ne ruhu ke edlevungan ku wey ke menge edumdumaan ku dut te Pista te Kedsehari te Suluhuen?’ 15Ne ketà ne ibpekita rin keniyu ke meluag ne ruhu diyà te ikeruwa ne pangkat ne saag ne nepegediran en, ne ketà kew be pegatur te idlavung tew.”

16Arà dà se nerineg dan ne mid-ipanew en ini se deruwa ne edumdumaan ni Hisus se ebpendiyà te inged, ne langun dut te ingkahi kandan ni Hisus ne arè en iya rema se nekita ran. Ne ketà dan en mibpegatur te idlavung dan te Pista te Kedsehari te Suluhuen.

17Guna su merukilem en ne nekeuma en si Hisus wey ke sepulù wey deruwa ne menge edumdumaan din ketà te valey. 18Ne gewii ran te egkaan ne migkahi si Hisus te, “Benar ini se egkehiyen ku keniyu, ruen senge etew kayi te keniyu se ed-ulug kediey su apey a meimetayi.”

19Guna su nerineg dut te menge edumdumaan din ini, ne mibmerungkug dan ne uman senge etew ne mid-insà te, “Entei, kenà ma siaken?”

20Midtavak si Hisus te, “Senge etew keniyu rut te sepulù wey deruwa ne ebpekidtuhen te edeluwit te pan din kayi ke ed-ulug kediey. 21Su egkeimetayan ke Impeanak te Menusiyà iring dut te nekahi te impesurat ne Lalag te Eleteala rengan, ugaid ne meraat nevenar se egketemanan din ini se etew ne ed-ulug kandin su iyan pà tumù ne warà sikandin ianak.”

Ke Ketepusan ne Kinelavung te Kerenan Tew Wey Ke Edumdumaan Din

(Mateo 26:26-30; Lucas 22:14-20; 1 Kurintu 11:23-25)

22Gewii te egkaan dan ne migkuwa ni Hisus ini se egkeenen dan ne pan ne impeselamat din te Eleteala, ne mibpenevìtevì din ne imbehey rin diyà te menge edumdumaan din se egkahi te, “Kua niyu ini, su ini ke lawa ku.”

23Ne ketà ne migkuwa ni Hisus ke ed-inumen ne impeselamat din te Eleteala ne imbehey rin kandan, ne langun dan ne mid-inum ketà. 24“Ini ke lengesa ku,” ke si Hisus, “ne ebpeketudà ne ibavas te menge etew, su tuus ini te egketuman en ke impasad te Eleteala rengan te ebpekepelihaun en ke menge etew dut te keberedusaan dan. 25Benar ini se egkehiyen ku keniyu te kenà ad maa ed-inum kayi te ed-inumen ini taman te kenà egkeuma ke hewii keuremà te kedatù te Eleteala ne egkevehu en ke ed-inumen tew.”

26Arà dà ne mideyù dan ke Eleteala te kanta ran ne midlihawang dan en ne riyà dan en mebpesinaru te buvungan ne ed-ingaranan te Ulivuwen.

Impayag neraan ni Hisus ke Kebparew ni Pedro te Teleduma Ran

(Mateo 26:31-35; Lucas 22:31-34; Juan 13:36-38)

27Ne migkahi pà maa si Hisus dut te edumdumaan din te, “Langun niyu ne ebpelahuy ne edtehaken a niyu su ruen Lalag te Eleteala ne impesurat din ne egkahi te,

‘Ebpeimetayan ku ke tumetuganur

dut te menge bilibili,

ne egerunsuwey ke menge bilibili rin.’

28Ugaid,” ke si Hisus, “embiya egkevanew ad, ne ed-una ad keniyu riyà te inged ne Geliliya.”

29Ne migkahiy si Pedro te, “Misan edtehaken ka rut te langun dan, ne siaken ne kenà!”

30Ugaid ne migkehiyan sikandin ni Hisus te, “Tentenuri nu ini te kenà pà ed-ukarà ke manuk te kereruwa te ini en ne kerukileman, ne ketetelu nu en ibparew te kenà a nu ruma.”

31Ugaid ne warà mebpehimbenar si Pedro se egkahi te, “Kenà a ebpekekahi te iring ketà te kenà ki teleduma misan ebpekeunung a keykew te ed-imetayan.” Ne iring ded dema ketà ke migkahi rut te menge ruma rin.

Mibpengeningeni si Hisus diyà te Gitsimani

(Mateo 26:36-46; Lucas 22:39-46)

32Nekeuma ran en diyà te inged ne ed-ingaranan te Gitsimani ne migkehiyan ni Hisus ke menge edumdumaan din te, “Pinuu kew rè be kayi gewii ku te ebpengeningeni.” 33Ne miduma rin si Pedro ki Santiago wey ki Juan diyà te unaan. Ne nemutu nevenar sikandin wey nerurunù ke hinawa rin. 34Ne migkahi sikandin kandan te, “Merasey nevenar ini se hinawa ku su iring te egkevidtew en. Kayi kew rè be ne kenà kew lipereng kediey.”

35Ne midlaus pà sikandin diyà te unaan dan ne midlangkeb en se ebpengeningeni te Eleteala te embiya egkepakey rà ne kenà ibpepevayà kandin ini se kemeresayan. 36Ne ini se migkahi rin te kebpengeningeni rin, “Amà, su sikew se Amey ku, netuenan ku te egkegaga nu ke langun! Ne embiya egkiyug ke rà ne iawà nu ini se keresayan ku, ugaid ne misan iring en ketà se kiyug ku ne iyan nu tumana ke keykew ne kiyug.”

37Neiseg-iseg ketà ne midliveran din ke tetelu ne etew ne edumdumaan din ne iyan din neumaan se nekelipereng dan. Ne migkehiyan din en si Pedro te, “Simon, maa nekelipereng ke ves? Maa, kenà ka ebpeketigker misan mehaan dà? 38Kenà kew edlipereng, ugaid ne pengeningeni kew,” ke si Hisus, “su apey kenà kew ebpekeruma kayi te ebpenggeram keniyu. Su mevaher perem ke hinawa niyu te edtuman te lalag ku, ugaid ne midtaman dè be te kenà eduma ke lawa niyu.”

39Ne mid-awà en maa si Hisus se ebpengeningeni te iring ded ketà te neuna ne pengeningeni rin. 40Ne ketà ne midlived maa sikandin kayi te tetelu ne edumdumaan din ne iyan din neumaan se nekelipereng dan su midseharan dan te turug. Ne warà dan metau ke engkey se egkehiyen dan.

41Guna su midlived en sikandin kayi te menge edumdumaan din te iketelu rin en te ebpengeningeni ne migkahi en te, “Maa, nekelipereng kew pè bes lavew? Sesangen en ayan! Su ini en ke ked-uluha dut te Impeanak te Menusiyà diyà te palad te menge etew ne beniyagà. 42Enew kew,” ke si Hisus, “su ini en ke etew ne ed-ulug kediey. Kuwa kew en su edtelavuk ki.”

Ke Kedsigkem ki Hisus

(Mateo 26:47-56; Lucas 22:47-53; Juan 18:3-12)

43Gewii te edlalag pà si Hisus ne nekeuma en si Hudas, senge etew ini rut te sepulù wey deruwa ne edumdumaan din. Ne nerumaan dut te merakel ne menge etew ne midmemetarem dan te menge sundang wey menge behuval, su midsuhù dan dut te menge mepurù te terebpelengesa, ke menge meyterù te penduan, wey ke menge egkeunutan te menge Hudiyanen. 44Ugaid ketà te warà den pà med-ipanew ne ruen ingkahi ni Hudas kandan te, “Ke etew ne ed-uveyan ku ne ed-erekan ku ne arà imbe ke ebpemengaan niyu. Sigkema niyu ne pekeventayi niyu nevenar te ked-ewit niyu.”

45Nekeuma rà si Hudas, ne mid-uvey rin si Hisus se egkahi te, “Na Meyterù!” Ne arà pà ne mid-erekan din. 46Ketà ne migeweran dan en si Hisus ne midsigkem dan en. 47Ugaid ne ruen senge etew diyà te uvey ran ne mid-ulavut te sundang din ne midtibas din en ke sugsuhuen dut te Pinekebmepurù te Terebpelengesa ne nesempingan en te telinga rin.

48Ne migkahi si Hisus dut te menge etew ne midsigkem kandin te, “Maa, tulisan a ne ebmetereman niyu te sundang wey behuval te edsigkem kediey? 49Su uman ded ma hewii ne riyan a te Nekebpuru ne Valey te Eleteala se ebpenurù,” ke si Hisus, “ne warà a ma nikiyu sigkema ketà. Ugaid ne egked-ulaula ini su apey egketuman en ke Lalag te Eleteala ne impesurat dengan.” 50Arà dà ne mibpelahuy en ke menge edumdumaan din ne mintahaky dan en sikandin.

51Ne ruen kenakan ketà ne migkukumbung te malung dà se edtundugtundug ki Hisus. Gewii te ked-ewita ran ki Hisus ne idragkes dan perem te edsigkem sikandin. 52Ugaid ne mibpelahuy sikandin te warà seseberen din su neluung ke malung din te kineheweri ran kandin.

Mibpeneheewit si Hisus Diyà te Valey te Kukuman

(Mateo 26:57-68; Lucas 22:54-55, 63-71; Juan 18:13-14, 19-24)

53Ne mid-ewit dan si Hisus diyà te baley te pinekemepurù dut te menge terebpelengesa su rutun egkevurun ke menge mepurù te terebpelengesa, ke menge egkeunutan te menge Hudiyanen, wey ke menge meyterù te penduan. 54Ne midtutundugtundug en si Pedro kandan taman te nekeuma sikandin diyà te lama te valey dut te pinekemepurù te menge terebpelengesa. Na kayi mibpekid-amur en mibpinuu dut te menge bantey te valey se ed-inarang.

55Ne ini se menge mepurù te terebpelengesa wey ke menge egkeunutan te menge Hudiyanen ne nevurun kayi, ne mibpegelep dan mibpemengà ke engkey se id-isuhat dan ne kewagib ki Hisus su apey ran egkeimetayi, ugaid ne warà netuen dan. 56Merakel se in-isuhat dan ne kewagib kandin, ugaid ne warà memeked-ayun su mibèbeelan dan dè ma.

57Ne ruen en maa menge etew ne mid-etuvang ki Hisus su ed-isuhat kandin te kenà benar se egkahi te, 58“Nerineg dey,” ke sikandan, “se egkahi ini se etew te, ‘Egkerundus ku ini se Nekebpuru ne Valey te Eleteala ne mibeelan te etew, ugaid ne ketà te tetelu ne hewii ne igkepeitindeg ku en ke behu ne valey ne kenà bineelan te etew.’” 59Ugaid ne misan engkey en kandan se egkahi ne kenà ebpemeked-ayun.

60Ketà ne mid-itindeg en ke pinekemepurù te menge terebpelengesa ne migkehiyan din si Hisus te, “Engkey ve se keykew ne egkekahi? Engkey, benar ini se id-isuhat dan ne kewagib keykew?” 61Ugaid ne mibpeeneng-eneng dà si Hisus.

Ne migkahi pà maa ini se pinekemepurù dut te menge terebpelengesa te, “Maa, sikuna en iya ini ke Anak te Eleteala ne midtendù din ne ebperetuen din?”

62Ne midtavak si Hisus te, “Uya, siaken en iya. Ne egkekita niyu red keuremà ke Impeanak te Menusiyà ne ebpekepinuu riyà te egkekewanan te Eleteala ne warà repeng te gehem din. Ne ketà te kedlived din a kayi ne egkekita niyu en te edumaan te sehulapun.”

63Nerineg dà dut te pinekemepurù te menge terebpelengesa ke migkahi ni Hisus ne mibisey rin ke velegkas din te kegkeepes din ne migkahi en te, “Kenà ki en ebpemengà te ruma pà ne titihus! 64Su nerineg niyu en ini se kedsumpalit din! Ne engkey en be se keniyu ne kukuman?”

Ne langun dan ne mid-isuhat kandin te kewagib ne ebpeimetayan. 65Ne ruen en ketà se mibpengileb ki Hisus, ne ruen duma ne mibegkesan ke mata rin ne midsuntuk dan en se egkahi te, “Entuka nu ke entei se midsuntuk keykew.” Ne migkuwa sikandin dut te menge sundaru ne ebantey kandin ne mibpenabpì dan en sikandin.

Imparew ni Pedro Te Teleduma ran ki Hisus

(Mateo 26:69-75; Lucas 22:56-62; Juan 18:15-18, 25-27)

66Ne riyà pà lavew te lama te valey te Pinekemepurù te Terebpelengesa si Pedro, ne ruen meritan ne edsugsuhuen ketà te valey ne mid-uvey kandin. 67Nekita rin si Pedro se ed-in-inarang ne mibpeut-utengan din te edtengteng se egkahi te, “Sikuna rema ne ruma ka ni Hisus ke ebpuun te Nasarit.”

68Ugaid ne mibparew sikandin se egkahi te, “Kenà ku egketuenan, kenà ku egkesebutan ayan se egkehiyen nu.” Ne mid-ip-ipanew sikandin se ebpependiyà te bengawan te lama ne arà dà ne ruen mid-ukarà ne manuk.

69Nekita en maa si Pedro dut te meritan ne migkahi en sikandin diyà te menge etew ne nevurun ketà te, “Ayan se etew ne teleduma ki Hisus.” 70Nerineg ni Pedro ne mibparew rin ded maa.

Neiseg-iseg manen ne migkahi ke menge etew ketà ki Pedro te, “Benar iya ne teleduma kew su egketuusan te riyà ka ebpuun te Geliliya.”

71Ne migkahi si Pedro te, “Dusa kedì te Eleteala embiya teleduma key keniyan te etew ne egkehiyen niyu!”

72Arà dà iya ne mid-ukarà en ke manuk te ikeruwa. Ketà ne netenuran ni Pedro ke migkahi ni Hisus kandin te, “Kenà pà ed-ukarà ke manuk te kereruwa te ini en ne kerukileman ne ketetelu a nu en ibparew te kenà ki teleduma.” Ne midrahukrahuk en si Pedro te kedsinehew rin.