Search form

Mateo 10

Mibpemilì ni Hisus ke Sepulù wey Deruwa ne Edumdumaan Din

(Marcos 3:13-19; Lucas 6:12-16)

1Ne miburun ni Hisus ke sepulù wey deruwa ne edumdumaan din ne mibehayan din te gehem te kebpekesegseg te vusew ne ed-amung-amung te menge etew, wey gehem ne ebpekeulì te misan engkey ne daru wey sakit.

2Ini ke menge ngaran dut te sepulù wey deruwa ne edumdumaan din ne mid-ingaranan ni Hisus te epustulis: ke egkeuna ne si Simon (ke ed-ingaranan dema ki Pedro) wey ke ari rin ne si Andres; si Santiago wey ke ari rin si Juan ke menge anak ni Sibidiyu; 3Si Felipe wey si Bartolome; si Tomas wey si Mateo ke ebpevayad te buwis; si Santiago ke anak ni Alpiyu, wey si Tediyu; 4si Simon ke Patriat ne iyan din meana ne diralem se lengesa rin dut te inged din, wey si Hudas Iskeriyuti ke ed-ulug ki Hisus te ked-imetayi.

Impeipanew ni Hisus ke Sepulù wey Deruwa ne Edumdumaan Din

(Marcos 6:7-13; Lucas 9:1-6)

5Ini se sepulù wey deruwa ne impeipanew ni Hisus ne midteleenan din te, “Kenà kew ebpendiyà te menge inged te menge etew ne kenà Hudiyanen wey menge inged te Semeriya. 6Ugaid ne diyà kew te menge ruma tew ne menge kevuwaran ni Israyil ne iring te menge bilibili ne nelaag. 7Diyà kew pesabut kandan te mehaan en ebpekeuma ke Kedetui te Eleteala te menge etew. 8Bewii niyu ke menge ederaru, benawa niyu ke menge minatey, bewii niyu ke menge kevuwaen, wey penegseha niyu ke menge vusew ne ed-amung-amung te menge etew. Ini se netelimà niyu ne riyà ebpuun te Eleteala ne warà niyu mevayari, ne kenà niyu rema buyui ke egketevangan niyu. 9Kenà kew ewit te bulawan, pirak etawa pelatà kayi te kemuyut nu. 10Kenà kew ewit te kempiru te ked-ipanew niyu, etawa idsambì ne belegkas wey telumpà, wey misan tuked. Su ke egelevek ne dait ne ebehayan te igkeuyag din.

11“Piya endei ne inged ne egkeumaan niyu, misan dekelà ne inged etawa deisek dà, ne pemengà kew te etew ne ebpepemenayik keniyu, ne ketà kew rà rateng taman te ked-awà niyu ketà te inged. 12Embiya ebpemenayik kew te valey ne penubtuvari niyu ke ed-ubpà ketà te valey te, ‘Ebpeneuven kew te Eleteala!’ 13Ne embiya edtelimaen kew rut te etew ketà te valey, ne ke kinepenuvadtuvad niyu ne egketuman ketà te kandan. Ugaid ne embiya kenà dan edtelimà keniyu, ne ke kinepenuvadtuvad niyu ne keniyu red. 14Ne embiya ruen inged ne warà ketà ne edtelimà keniyu etawa kenà dan ebpemineg dut te ibpesabut niyu, ne ewai niyu sikandan wey pendegdeha niyu ke lipupuk diyà te menge paa niyu. 15Sevenarbenar ini se idtarem ku keniyu,” ke si Hisus, “muna pà ke kedusai te Eleteala kandan ketà te hewii ne kedtimbang din te menusiyà dut te kinerusa rin te menge mehinged ketà te Sudum wey Gemura.”

Migkahi ni Hisus ke Keresayan wey Kebpekesakit ne Ebpekeuma kayi te Menge Etew

(Marcos 13:9-13; Lucas 21:12-17)

16“Pemineg kew,” ke si Hisus, “su edsuhuen ku sikiyu riyà te menge etew ne ebpekekaid, ne iring kew te menge bilibili ne ebpekeseruk diyà te senge ingeren en ne mewalew ne asu. Tembù be ingat kew ne pekeibpes kew iring te uled, ugaid ne kayi te ulaula niyu ne iring kew te melepati ne meamuk. 17Uram kew su ebpenigkemen kew te menge etew ne ibpepemenayik kew diyà te kukuman. Ne ebpenruuhen kew riyà te valey ne ebpengedian te penduan te menge Hudiyanen. 18Ne edtuyuken kew riyà te menge egkeunutan wey menge mepurù su atag dut te kedsarig niyu kediey, ugaid ne ini en imbe ke ralan te kebpesabut niyu kandan wey ke menge kenà Hudiyanen dut te Meupiya ne Tudtul mekeatag kediey. 19Ketà te ibpepemenayik kew riyà te kukuman, ne kenà kew meuru ke ebmenmenuwen niyu se kedlalag niyu te kedtindeg te hinawa niyu wey engkey se ralan te kegkahi niyu, su ketà ne iyan niyu egkekahi ne lalag ne ibpekahi keniyu. 20Su iyan niyu egkekahi ne kenà keniyu ne lalag, ugaid ne lalag ne riyà ebpuun te Kedesenan ne Ebpetuntul te Menusiyà ne midsuhù te Amey tew ne Eleteala.

21“Su ketà ne hewii ne ruen menge etew ne misan ke temperà dan te pused ne ed-uluhen dan su ebpeimetayan, ne iring din ded dema ke ed-ul-ulaan te amey dut te menge anak din. Ne ruen menge anak ne ebpekid-atu te menge lukes dan su ebpeimatayan dan. 22Ne egkunteraan kew te langun su atag te keduma niyu kediey, ugaid ne ke etew ne kenà edsuwey te keduma rin kediey taman te kayi pà sikandin te ampew te dunya ne ebpekehaked te umur ne kenà edtaman. 23Embiyà ebpekesekitan kew nikandan diyà te senge inged su sabap te kebpesabut niyu ne pelahuy kew riyà te ruma pà ne inged. Su sevenarbenar ne igkahi ku keniyu te kenà niyu pà egkepasad ke helevek niyu riyà te langun ne menge inged te Israyil ne edlived en ke Impeanak te Menusiyà.

24“Su warà etew,” ke si Hisus, “ne ebpepenurù pà ne iyan en mepurù dut te ebpenurù kandin, ne warà uripen ne iyan en mepurù dut te mibpengunguripen kandin. 25Tembù be ebmehalew ke etew ne ebpepenurù pà ke egketamat din en ke ibpenurù kandin su apey ebpekeiring en sikandin dut te ebpenurù kandin. Ne iring din ded dema ke uripen ke ebpekeiring en dut te mibpengunguripen kandin. Ne embiya ke pengulu dut te telteleanak ne ed-ingaranan ki Bilsibul ke egkeunutan te busew ne iyan pè be kenà tuwas pà ne meraat ke id-ingaran dut te menge anak din.”

Ke Engkey se Dait ne Igkeendeki

(Lucas 12:2-7)

26“Iyan se kenà kew meandek,” ke si Hisus, “dut te menge etew.

Su langun te netelevan guntaani,

ne ebpekepehawahawa red keuremà.

Ne langun ne impegelesà,

ne egkepayahan ded.

27Ini se ingkahi ku keniyu te merusirem,

ne ipenudtul niyu en diyà te kerayahan.

Ne ini se lalag ku ne sikiyu rà se nekerineg,

ne ibpesabut niyu riyà te langun ne menge etew.

28Ne kenà kew meandek dut te menge etew ne iyan dà egkepatey se lawa niyu, ugaid ne kenà dan ebpekepatey te himukud niyu. Ugaid ne iyan niyu ikeandek ne Eleteala, su kenà lawa niyu rà se egkepatey rin su ruen gehem din te kebpekeantug te himukud niyu riyà te apuy nerakà. 29Su ruen deisek ne pepenuk ne egkepemasa te lelima ne timan ne deruwa rà ne tumbaha. Ne misan iring ketà se kevavà te elehà din, ne warà seveka kandan ne egkeulug diyà te tanà embiyà kenà egkiyug ke Amey niyu ne Eleteala. 30Ne iyan kew pè be melipati te Eleteala su misan ke edtiweruwan te bulvul niyu ne nevirang din en. 31Engketà be ne kenà kew meandek su iyan kew pà belielehà diyà te kandin dut te merakel ne pepenuk.”

Ke Imbaag ni Hisus Mekeatag Dut te Menge Etew ne Ebparew Kandin

(Lucas 12:8-9)

32“Piya engkey ne etew,” ke si Hisus, “se ebpayag diyà te menge etew se ebpesakup kediey, ne iyan ku rema ibpayag diyà te suluhuen te Amey ku ne Eleteala diyà te langit ne ed-engkunen ku sikandin te kediey ne sakup. 33Ugaid,” ke si Hisus, “piya engkey ne etew se ebparew riyà te menge etew te sakup ku sikandin, ne kenà ku rema ed-engkunen te sakup ku sikandin diyà te menge suluhuen te Amey ku ne Eleteala diyà te langit.”

Ke Kebperetiyaya ki Hisus ke Puunan te Kebpemekedsinggey te Hinawa Dut te Telteleanak

(Lucas 12:51-53; 14:26-27)

34“Maa, iyan niyu kunaan,” ke si Hisus, “ke ini se kinepengkayi ku ne ed-ewit a te kebmelinew kayi te kelibutan? Kenà iring ketà! Su idtarem ku keniyu te kenà kebmelinew, ugaid ne kayi ebpuun te kinepengkayi ku ne ebpekunkuntereey ke itungan dut te menge etew. 35Su sabap te mibpengkayi a

ne egkunterà ke menge anak ne meama dut te amey ran,

ne egkunterà ke menge anak ne meritan dut te iney ran,

ne egkunterà ke enuhang ne meritan dut te ambey ran,

36ne iyan mepasang ne egkekunterà te menge etew

ke megeget ne sikandan ded ne ebpenusuled.

37“Embiyà ruen etew ne iyan pà dekelà se limù din dut te amey rin wey iney rin kenà siaken, ne kenà edait sikandin ne edumdumaan ku. Iring din ded dema ke etew ne iyan pà dekelà se limù din dut te anak din kenà siaken, ne kenà edait sikandin ne edumdumaan ku. 38Ke etew ne egkiyug ne eduma kediey ne iyan iya se lipati rin ke kandin ne kiyug ne tianga rin ke kandin ne pinebelavag ne kayu ne ed-ingaranan te krus ne iyan din meana ne tumana rin ke menge suhù ku misan ibpatey rin. Su embiya kenà, ne kenà edait sikandin ne edumdumaan ku. 39Su ke etew ne egkenuhun te umur din, ne ebpatey lavew. Ugaid ke etew ne iyan din ibpatey se keduma rin kediey te kebpemesabut dut te Meupiya ne Tudtul, ne ruen umur ne ibehey kandin ne warà edtemanan din.”

Mekeatag te Kebehey te Eleteala te Lalew

(Marcos 9:41)

40“Piya entei ne etew,” ke si Hisus, “ne edtelimà keniyu, ne midtelimà dema kediey. Ne misan entei ne etew ne edtelimà kediey, ne kenà siak dà se midtelimà din su ke Amey ku rema ne Eleteala ne midsuhù kediey ne midtelimà din ded. 41Ne piya entei ne etew ne edtelimà te etew ne ebpelambas te Lalag te Eleteala su midtendù te Eleteala ini se etew ne ebpelambas te lalag din, ne egkevehayan te Eleteala arà se etew te lalew iring dut te lalew te midtendù din ne ebpelambas te lalag din. Ne iring din ded dema ke etew ne edtelimà te metidtu ne etew su sabap te ketidtu rin, ne egkevehayan te Eleteala te lalew iring te lalew dut te metidtu ne etew. 42Ne benar ini se egkehiyen ku keniyu, misan meadsil dà ne wayig se ibpeinum dut te senge etew ne edumdumaan ku su atag dut te keduma rin kediey, ne ruen lalew rin. Misan ke kevevaan en dut te edumdumaan ku ini se pineinum din.”