Search form

Mateo 21

Ke Kinelusud ni Hisus Diyà te Hirusalim ne Mid-untud te Nati ne Kudà su Tuus ini te Datù Sikandin Dut te Menge Hudiyanen

(Marcos 11:1-11; Lucas 19:28-40; Juan 12:12-19)

1Guna su ebpelundani ran en te Hirusalim ne nekeuma ran en te inged ne Bitpahi ne egkelingakà ke buvungan ne ed-ingaranan te Ulivuwen. Midsuhù en ni Hisus ke deruwa ne edumdumaan din te ebpeunaan dan, 2ke sikandin te, “Una kew en be ketà te inged ne an te unaan ta, ne ketà te kebpekeuma niyu ne egkekita niyu se in-iket ne kudà wey ke nati rin. Ekari niyu be ne ewita niyu kayi,” ke si Hisus. 3“Ne embiya ruen ed-insà keniyu ke maan ke ed-ekaran niyu ne iyan niyu kehiya te, ‘Ke Kerenan dey se ebpegingawà kayi te egkeunturan din’ ne seguguneey ne ibehey rin keniyu.”

4Ne ned-ulaula ini su apey metuman ke impesurat te Eleteala dut te senge etew ne mibpelambas te lalag din rengan ne egkahi te,

5“Kehiya niyu diyà te menge etew te Hirusalim te,

‘Ebpekeuma en ke datù niyu!

Meamuk sikandin

ne ed-untud te nati te kudà,

uya, ed-untud te anak te kudà, ke binatang ne eduranan.’ ”

6Tembù mid-una mid-ipanew ini se deruwa ne edumdumaan din ne midtuman dan ke migkahi ni Hisus. 7Ne mid-ewit dan en ini se kudà wey ke nati rin kayi te ki Hisus, ne midebpasan dan te kumbalà dan ne mid-untud en ketà si Hisus. 8Merakel ne menge etew ketà se midtulid te menge kumbalà dan te ebpepevayaan ki Hisus, ne ke ruma ne mibpenibpù dan te menge subpang ne rawunen su intulid dan diyà te ralan su ini ke tuus te adat te menge Hudiyanen dut te menge mepurù dan. 9Ne ke menge etew ne mid-una ki Hisus wey engketà ded ke midtundug kandin ne migkerag te,

“Edeyuen tew ke inenakan ni David!

Menu ma ke ebpeneuven te Eleteala

ini se midtendù din ne edatù te langun!

Edeyuen tew ke Eleteala!”

10Ketà te kedlusud en ni Hisus te Hirusalim, ne mibmehurub ke langun ne menge etew dutun. “Engkey ini etawa?” ke sikandan.

11Midtavak ini se menge miduma ki Hisus te, “Si Hisus ini ne ebpelambas te Lalag te Eleteala ne riyà ebpuun te Nesarit diyà te lusud te Geliliya.”

Mibpenegseg ni Hisus ke Ebpemendahang Diyà te Nekebpuru ne Valey te Eleteala

(Marcos 11:15-19; Lucas 19:45-48; Juan 2:13-22)

12Guna su nekeuma en si Hisus diyà te Hirusalim, ne midlusud sikandin diyà te Nekebpuru ne Valey te Eleteala ne mibpemenegseg din en ke menge etew ne ebpememasa wey ke menge ebpemendehang ketà. Ne mibpenunggad din ke menge lemisaan dut te menge etew ne ebpenambì te kureta wey ke menge ebpeminuuwan dut te menge etew ne ebpemendahang te menge melepati ne ibpemelengesa rut te menge Hudiyanen diyà te Eleteala. 13Ne migkehiyan din sikandan te, “Duen en ura impesurat ne Lalag te Eleteala ne egkahi te, ‘Ini se baley ku ne ed-ingaranan te baley ne ebpengeningeniyan te menge etew.’ Ugaid ne sikiyu,” ke si Hisus, “ne mibaluy niyu en ini ne ubpaan te menge tenlimbungen!”

14Ne gewii te diyà si Hisus te Nekebpuru ne Valey te Eleteala ne mid-uvey kandin ke menge pisek wey menge pungkù ne neulian din. 15Ne nengeepes nevenar ki Hisus ke menge mepurù te terebpelengesa wey ke menge meyterù te penduan te nekita ran ini se mekegeyip ne mid-ulaula ni Hisus wey ke menge vatà ne egkerag te kedeyù dan kandin te, “Edeyuen tew ini se inenakan dut te datù tew rengan ne si David!”

16Tembù be migkehiyan dan si Hisus te, “Menu, nerineg nu red ayan se migkahi ran?”

“Nerineg ku,” ke si Hisus. “Ne maa, warà niyu bes mevasa ke impesurat ne Lalag te Eleteala ne egkahi te,

‘Misan ke deisek ne menge vatà

ne mibpenurù te Eleteala te edeyù kandin.’ ”

17Ketà ne mid-awà en si Hisus se ebpependiyà te inged ne Bitanya ne dutun en mid-irehà.

Ke Kayu ne ed-ingaranan te Igira ne Mibpenrewakan ni Hisus

(Marcos 11:12-14, 20-24)

18Nepawà ketà te kedlived dan diyà te Hirusalim, ne nevitil si Hisus. 19Ne nekekita sikandin te kayu ne igira uvey te ibpevayà dan. Mid-uvey rin su ed-inteng sikandin ke ruen bahas din, ugaid ne warà nekita rin su tibal rawun. Ne migkehiyan ni Hisus ke kayu te, “Igenat guntaani ne kenà ke en imbe ebpekevahas!” Arà dà ne nehangu en ke kayu.

20Nekita ini rut te menge edumdumaan din ne negeyip dan. Ke sikandan te, “Meambe ke megmehaan nehangu ke kayu?”

21“Sebenarvenar ne ini se egkehiyen ku keniyu,” ke si Hisus, “embiya edsarig kew te Eleteala te warà keduwaruwa te hinawa niyu, ne ebpekegaga kew te iring kayi te mid-ulaula ku ini kayi te kayu. Ne kenà ketà dà taman su misan ke kenà egkegaga te menusiyà ne egkegaga niyu iring te egkehiyan niyu ini se buvungan te, ‘Awà ka keniyan ne riyà ka te rahat,’ ne egketuman ini se egkehiyen niyu. 22Tembù be,” ke si Hisus, “idtarem ku keniyu te embiya ruen ebuyuen niyu te Eleteala, ne eheta niyu ke hinawa niyu te warà keduwaruwa rin ne egketelimà niyu ini.”

Mid-insaan si Hisus Mekeatag te Kewagib din dut te Mibpenegseg Din ke Menge Ebpemendahang Diyà te Nekebpurù ne Valey te Eleteala

(Marcos 11:27-33; Lucas 20:1-8)

23Guna su nekeuma ran en maa diyà te Hirusalim, ne midlived en maa si Hisus ketà te Nekebpuru ne Valey te Eleteala. Gewii rin te ebpenurù kayi te lusud ne ruen menge mepurù te terebpelengesa wey menge pekilukesen te Hudiyanen ne mid-uvey kandin ne mid-insaan dan si Hisus te, “Ini se mid-ulaula nu kayi te Nekebpuru ne Valey te Eleteala, engkey se kewagib nu te ed-ulaula te iring kayi? Ne engkey se mibehey keykew te kewagib?”

24Midtavak si Hisus te, “Duen seveka rà ne id-insà ku keniyu, ne embiya egketavak niyu ne idtarem ku keniyu ke engkey se mibehey kedì te kewagib kayi te mid-ulaula ku. 25Entei se mibehey ki Juan ke Ebpembunyag te kewagib te ebpembunyag, diyà be te Eleteala etawa kayi rà dè duen te menusiyà?”

Ne mibpein-inseey ran te, “Engkey se idtavak tew? Su embiya iyan tew egkehiyen se, ‘Riyà ebpuun te Eleteala,’ ne ed-insà maa sikandin te, ‘Meambe ke warà kew mebperetiyaya ki Juan?’ 26Ugaid ne embiya egkahi ki te, ‘Kayi red ebpuun te menusiyà,’ ne egkekeiran ki su mibperetiyaya ke langun ne menge etew te mibpelambas te Lalag te Eleteala si Juan.” 27Ketà be ne midtavak dan ki Hisus te, “Kenà dey egketuenan.”

Ne migkahi rema si Hisus kandan te, “Embiya iring ketà, ne kenà ku rema egkehiyen ke engkey se mibehey kedì te kewagib te mid-ulaula kayi.”

Ke Sempità ni Hisus Mekeatag te Deruwa ne Teleari ne Meama

28Mibpenurù pà maa si Hisus te, “Peg-pegitunga niyu ke engkey se meana rin ini se sempità ku. Duen senge etew ne deruwa se anak din me meama. Mid-uvey rin ini se kakey ne migkahi te, ‘Gelevek ka, Mama, diyà te pemulaan ta.’

29“‘Ah, kenà a!’ ke se anak din. Ugaid ne nekepegpegitung ded ne ketà ne mibpendiyà te pemulaan dan.

30“Ne mid-uvey rut te meama ini se ari ne anak din ne engketà ded maa ke migkahi rin. ‘Uya, Amà,’ ke se anak din, ‘ebpendiyan a.’ Ugaid ne warà medtuman.

31“Na, endei ve rapit kayi te deruwa ne teleari,” ke si Hisus, “se midtuman dut te suhù te amey ran?”

“Ke kakey,” ke sikandan.

“Idtarem ku keniyu,” ke si Hisus, “te ini se menge etew ne kenà meupiya kayi te etuvangan niyu iring te menge ebpevayad te buwis wey menge meritan ne warà en keeleran din ne ebpekeiring dut te kakey dut te teleari su edtuman dan guntaan te Lalag te Eleteala ne tembù be egkeuna ran keniyu ne ebpekelusud dut te menge etew ne Edetuan te Eleteala. 32Su mibpengkayi te keniyu si Juan ke Ebpembunyag,” ke si Hisus, “su ebpenurù te metidtu ne ralan diyà te Eleteala, ne warà kew mebperetiyaya. Ugaid ne ini se ebpevayad te buwis wey ke menge meritan ne warà en keeleran din ne mibperetiyaya ran mulà. Ne sikiyu, misan nekita niyu en te nesembian dan ke ulaula ran su sabap te kebperetiyaya ran, ne warà kew mebpedsendit wey mebperetiyaya kandin.”

Ke Sempità ni Hisus mekeatag te Menge Etew ne Pinetuganur te Pemulaan

(Marcos 12:1-12; Lucas 20:9-19)

33“Pemineg kew pà,” ke si Hisus, “te ruma pà ne sempità ku. Ruen senge etew ne ruen tanà din ne mibpemulaan din te wahed ne ed-ingaranan te paras. Ne mid-alad din arà, ne mibaal te edtehuan dut te egkekeres ne bahas te paras, ne midsebungan din te ebpeubpaan dut te ebpeventayen din. Ne ruen pinekamal din dut te impemula rin, ne arà pà ne mid-ipanew se ebpendiyà te meriyù ne inged. 34Guna su midsabpet en ke pinemula rin, ne midsuhù din ke menge edsugsuhuen din su ibpekuwa ke kandin ne umun. 35Ugaid ne nekeuma ini se midsuhù din, ne migeweran dut te pinekemal din ne mibedasan dan ne ruen mid-imetayan dan ne ruen mibpenrumbag dan te vatu. 36Ne misan iring ketà, ne ruen pà maa midsuhù din ne merakel pà dut te neuna. Nekeuma ran ketà ne engketà ded lavew ke imped-ulaula rut te pinekamal te pemulaan.

37“Ketà te ketepusan en ne iyan din en midsuhù ne ke anak din. Ke hingginawa rin te, ‘Kenà egkepakey ne kenà dan ed-edatan ini se anak ku.’

38“Ugaid ne guna su nekeuma ini se anak din ne mibpeleglelahey ke menge pinekamal din te, ‘Ini en bes ke anak dut te kemuney kayi te tanà. Kuwa kew en su ed-imetayan tew su apey sikitew en se ebpekegkemuney kayi te tanà.’ 39Arà dà ne migeweran dan ne miguyud dan diyà te luwal dut te pemulaan ne mid-imetayan dan en.

40“Na,” ke si Hisus, “ketà te ked-ulì dut te kemuney te tanà, ne engkey ve se ibped-ulaula rin dut te pinekamal din?”

41Midtavak dan te, “Ebeyaan din arà se menge meraat ne etew ne ebpengimetayan din ne ebpekemalan din te ruma ne etew ne ebehey kandin te umun din ke egkeuma te kedsebpet.”

42Ne migkahi pà maa si Hisus te, “Maa, warà niyu ves mevasa ke impesurat ne Lalag te Eleteala mekeatag te ini? Su nekahi ketà te,

‘Ke pelaus ne mid-eng-engkeran

dut te menge etew ne ebpemevaley

su kunaan dan ke warà rantek din,

ne iyan en iya ini

nepemilì ne segkad te valey.

Ini se mid-ulaula te Kerenan,

ne mekegeyip nevenar!’

43“Igkahi ku keniyu,” ke si Hisus, “te ini se umun niyu kayi te Edetuan te Eleteala ne id-awà kayi te keniyu ne ibehey diyà te ruma ne menge etew ne ebperumaruma te Lalag te Eleteala.

[ 44Ne geina te siaken ini se segkad ne egkerupet ke langun ne egkeulug ketà, ugaid ne egkepipinì ke langun ne egkepilayan din.]”

45Guna su nerineg dut te menge mepurù te terebpelengesa wey ke menge Peresiyu ini se sempità ni Hisus, ne netuenan dan te sikandan ke nesuhat ketà, 46tembù be ibpesigkem dan perem si Hisus. Ugaid ne neandek dan dut te merakel ne etew su mibperetiyaya ini se menge etew te ebpelambas te Lalag te Eleteala si Hisus.