Search form

Genesis 20

Si Abraham aw si Abimelec

1Nayan, minalin si Abraham lekat te Mamre doton te Negeb, aw mig-ogpà dan doton te tengà-tengà te lonsod te Cades aw Sur. Peglegeb din doton te lonsod te Gerara, 2minikagi si Abraham diyà te menge tege Gerara te etebay din se esawa din si Sara. Yan se doun te impeangay si Sara te selotan te Gerara si Abimelec amon inangen din esawa din. 3Meneng migpekità se Timanem diyà ki Abimelec pineokit te tegeinep, aw minikagi sikandin, “Matay ka den tandà te pegpengabat no te bayi sìyan, so tapay doen esawa din.”

4Meneng so wedà pa pegpedapag si Abimelec diyà ki Sara, minikagi sikandin diyà te Timanem, “Wedad palos salà ko diyà kandin. Eked kepakay aw imetayan a no sipat te menge sakop ko. 5Si Abraham se minikagi diyà kanak te etebay din sikandin, aw minikagi heman se bayi te telekedowa dan. Pegpengabat ko kandin, wedad palos medaet ibeg te pedowan ko, aw wedad palos salà ininang ko.”

6Minikagi se Timanem diyà kandin pineokit te tegeinep, “Ee. Netegahan ko te wedad medaet ibeg te pedowan no te peg-inang no kenyan, aw yan se doun te migsagda a kamno amon eked ka peg-inang te salà diyà kanak. Binelebagan ko se pegpedapag no diyà kandin. 7Nayan, olii se bayi diyà te esawa din. Si Abraham se telekeliwat te kagi ko, aw megtawal-tawal sikandin tepad kamno amon eked ka kematay. Meneng aw eked no sikandin olii, metoman ka matay sipat te kedita te sakop nikaw.”

8Pegkeiselem niyan, limapos si Abimelec migtipon te kedita te opisyal din, aw mig-indan sikandin diyà kandan tepad te kedita neinang. Yan ontò dan migpeso. 9Penga niyan, impeangay i Abimelec si Abraham, aw minikagi sikandin, “Medaet se peg-akal no kenami. Eden lay se salà ininang ko diyà kamno amon ipedateng no se kededàtan diyà kanak aw menge sakop ko? Ininang no den diyà kanak se eked kepakay inangen. 10Nengà lay ininang no ini?”

11Timaba si Abraham, “Mig-aneng-aneng a te wedad otaw dini egsagman te Timanem, aw yan doen otaw mengimatay kanak amon egawen dan se esawa ko. 12Benal se inikagi ko te etebay ko sikandin, so batà te amay ko sikandin, meneng sebad se inay din, aw yan pinengognan ko sikandin. 13Kedengan te pegpekesayo te Timanem kanak lekat te lonsod inogpaan te amay ko, minikagi a diyà te esawa ko aw ontò a din egkeidowan, yan keilangan mikagi sikandin diyà te kedita te otaw te telekedowa kay.”

14Penga niyan, in-olì i Abimelec si Sara diyà ki Abraham. Doen heman imbegay din diyà kandin, menge karniro, baka, aw allang. 15Minikagi heman si Abimelec, “Tengteng ka den diyà te kebelad te tanà ko. Pemellii se ibeg nikaw ogpaan pengkey kenan.”

16Minikagi heman sikandin diyà ki Sara, “Sebad melalan se kwarta plata imbegay ko den diyà te kedowa nikaw. Yan se pengilala amon metaga-taga se kedita te sakop no te wedad salà ko diyà kamno, aw ontò ka den neosayan.”

17Penga niyan, migtawal-tawal si Abraham diyà te Timanem, aw pinegolì te Timanem si Abimelec, aw esawa din, aw menge allang din bayi amon todà dan megbatà. 18Pinegolì dan te Timanem, so doen tapay ininang din diyà kandan amon eked dan peglaman tandà te pegpengabat i Abimelec te esawa i Abraham si Sara.

Se kaling peokit

© 1982, Wycliffe Bible Translators, Inc. All rights reserved. More Info | Version Index