Search form

Genesis 22

Pegtandà te Timanem ki Abraham

1Pegkenamay-namay, migtandà se Timanem te pegsalig i Abraham diyà kandin. Timawal se Timanem, “E Abraham.”

Timaba si Abraham, “Seini a.”

2Minikagi se Timanem, “Petekingi se batà no temisa si Isaac ontò no egkedekelan te pedowan, aw doton kaw te tanà te Moria. Tikedeg kaw te bontod tedoan ko kamno kidoen, aw imetayi sikandin aw sonogi se lawa din, so ibegay no sikandin diyà kanak.”

3Pegkeiselem niyan, limapos si Abraham nengayo, aw inlolan din iyan diyà te asno din. Impetaking din se batà din si Isaac aw dowa sineligan din, aw nesayo dan pesalo doton te tanà sinogoan te Timanem kandin. 4Pegdateng te iketelo te aldaw te peg-ipanaw dan, kinità i Abraham se bontod doton te mediyò-diyò. 5Minikagi si Abraham diyà te didowa sineligan din, “Peg-ogpà kaw dini sipat te asno, so domeleg kay pa te batà ko doton sida amon megtawal-tawal kay diyà te Timanem. Penga niyan, lomikò kay dini kenyo.”

6Impeibing i Abraham ki Isaac se kayo itabon, aw inibing i Abraham se pemala aw tigtig bato iantay te apoy. Peg-ipanaw dan, 7minikagi si Isaac, “Amà.”

Timaba si Abraham, “Eden lay, Atò?”

Minikagi si Isaac, “Doen tigtig bato aw itabon ta. Meneng kenan lay se nati te karniro sonogen aw ibegay diyà te Timanem?”

8Timaba si Abraham, “Timanem se memegay kenyan diyà kenita.”

Penga niyan, dimeleg dan minipanaw.

9Pegdateng dan doton te bontod sinogoan te Timanem ki Abraham, mig-inang si Abraham te sonogan din te ayam-ayam ibegay diyà te Timanem, aw insawol din se kayo itabon kidoen te lanto niyan. Penga niyan, ginapos din se batà din aw insawol din heman sikandin diyà te lanto te kayo itabon. 10Penga niyan, nemaed sikandin te pemala amon mengimatay te batà din. 11Meneng timawal se anghil te Timanem diyà kandin lekat te langit, “E Abraham, Abraham.”

Timaba sikandin, “Seini a.”

12Minikagi se anghil, “Ikà egmeno te batà nikaw. Ikà egpeeleg kandin. Netegahan ko den te ontò ka egtolò te Timanem, so pengkey batà no temisa, meneng yan se ibegay no diyà kanak.”

13Penga niyan, doen karniro kinità i Abraham. Nekesaeng se seka din te sagbet. Inangay iyan i Abraham, aw inimetayan din aw sinonog din iyan inselilin te batà din. 14Penga niyan, iningedanan i Abraham se bontod sìyan “Timanem se Egpemegay.” Pengkey songkani, doen eg-ikegiyen seini, “Doton te bontod te Timanem, Timanem se egpemegay.”

15Todà timawal se anghil te Timanem diyà ki Abraham lekat te langit, 16aw minikagi sikandin, “Ontò metoman se pakang ko seini, so siaken se Timanem minikagi diyà kamno. Ontò mèpiya se ibegay ko diyà kamno. So timolò ka kanak aw wedà no temengi se batà no temisa meneng imbegay no sikandin diyà kanak, 17yan mèpiya se ibegay ko diyà kamno, so inangen ko ontò medita se bowad-bowad nikaw iling te kedita te menge bitoen doton te langit, aw iling heman te kedita te enay doton te dagat. Mekedaeg se menge bowad-bowad no te menge lonsod te poon dan. 18Tebangan ko se kedita te otaw te keneyonan pineokit te bowad-bowad nikaw. Yan se inangen ko, so timolò ka te impunù ko kamno.”

19Penga niyan, limikò si Abraham aw si Isaac doton te didowa sineligan, aw minolì dan doton te Berseba, aw mig-ogpà dan kidoen.

Menge batà i Nahor

20Nayan, pegkenamay-namay, inindanan si Abraham te doen den menge batà te kedowa din si Nahor, so tinebawan se nayi din si Melca. 21Si Hus se penganay batà din, si Bus se inolid din, si Camuel amay i Aram, 22si Cased, si Asau, si Feldas, si Jedaf, aw si Betuel. 23(Si Betuel se amay i Rebecca.) Yan se ngadan te walo batà i Nahor timebaw diyà ki Melca nayi i Abraham. 24Doen heman allang i Nahor pig-esawa din ngadan din si Roma tinebawan i Teba, si Gaam, si Taas, aw si Maaca.

Se kaling peokit

© 1982, Wycliffe Bible Translators, Inc. All rights reserved. More Info | Version Index