Search form

Genesis 30

1Pegketaga-taga i Raquel te wedad batà timebaw diyà kandin, miningà sikandin te kakay din. Minikagi sikandin diyà ki Jacob, “Aw eked a no pebetai, matay a.”

2Neopal si Jacob diyà ki Raquel, aw minikagi sikandin, “Kenà a man Timanem! Sikandin se wedà pemebatà kamno.”

3Minikagi si Raquel, “Ibegay ko diyà kamno se allang ko si Bilha. Layok ka den diyà kandin amon doen peden batà tomebaw diyà kandin pegbetaen ko. Yan doen peden menge batà ko pineokit kandin.”

4Yan imbegay i Raquel se allang din si Bilha diyà ki Jacob amon inangen din esawa din. Pegpeleyokay dan, 5miglaman si Bilha, aw tinebawan sikandin te batà meama. 6Penga niyan, minikagi si Raquel, “Impelangkaw a den te Timanem. Nenenalan sikandin te pinemoyò ko, aw binegayan a din te batà meama.” Yan se doun te iningedanan din se batà din ki Dan (kelebadan niyan, impelangkaw).

7Todà miglaman si Bilha aw tinebawan sikandin te ikedowa batà din meama. 8Minikagi si Raquel, “Kedengan dinaeg a te kakay ko, meneng songkani dinaeg ko heman sikandin.” Yan iningedanan din se batà din ki Neftali (kelebadan niyan, bolaw).

9Na, pegketaga-taga i Lea te wedà todà sikandin pegbatà, imbegay din heman se allang din si Zilfa diyà ki Jacob amon meinang heman sikandin esawa din. 10Penga niyan, doen batà meama timebaw diyà ki Zilfa. 11Minikagi si Lea, “Neidowan a te Timanem!” Yan iningedanan din se batà din ki Gad (kelebadan niyan, neidowan).

12Doen ikedowa batà meama i Jacob timebaw diyà ki Zilfa. 13Minikagi si Lea, “Ontò neluba se pedowan ko! Mikagi se menge doma bayi te ontò a neluba.” Yan iningedanan din se batà din ki Aser (kelebadan niyan, keluba).

14Dalem te peglegani te trigo, dimoton si Ruben te pawà, aw neketalà sikandin te menge pongo te sagbet iningedanan mandragora egpengànen te bayi meibeg megbatà. Inibing din iyan doton te inay din si Lea. Minikagi si Raquel diyà ki Lea, “Begayi a heman te menge mandragora inibing te batà nikaw.”

15Minikagi si Lea, “Pengkey inagaw no se esawa ko, meneng kenà besi botong se medaet ininang no sìyan, so egawen no den heman se menge mandragora inibing te batà ko diyà kanak!”

Minikagi si Raquel, “Aw ibegay no den diyà kanak se menge mandragora netelaan te batà nikaw, mepakay diyà kanak aw sikona se leyokan i Jacob kwani delem.”

16Peg-olì i Jacob lekat te pawà te meapon, simongon si Lea kandin, aw minikagi sikandin, “Keilangan lomayok ka diyà kanak kwani delem, so netelaan te batà ta se menge mandragora, aw yan se imbayad ko kamno diyà ki Raquel.”

Yan se doun te si Lea se lineyokan i Jacob te delem sìyan. 17Nenenalan se Timanem te pinemoyò i Lea, aw yan miglaman sikandin, aw tinebawan te ikelima batà meama i Jacob. 18Minikagi si Lea, “Mèpiya se ontong imbegay te Timanem diyà kanak, so imbegay ko se allang ko diyà ki Jacob.” Yan iningedanan din se batà din ki Isacar (kelebadan niyan, ontong).

19Todà miglaman si Lea, aw tinebawan sikandin te ikeenem batà meama i Jacob. 20Minikagi si Lea, “Ontò meelagà se imbegay te Timanem diyà kanak. Na, segmanen a den besi te esawa ko, so enem den se batà din meama timebaw diyà kanak.” Yan iningedanan din se batà din ki Sabulon (kelebadan niyan, sagman).

21Pegkenamay-namay, tinebawan si Lea te batà bayi, aw iningedanan din se batà din ki Dina.

22Wedà kelibeli te Timanem si Raquel, so nenenalan se Timanem te pinemoyò din, aw impebatà din sikandin. 23Miglaman sikandin aw tinebawan heman te batà meama. Minikagi sikandin, “Inabat den te Timanem se nekeyàyà kanak.” 24Iningedanan i Raquel se batà din ki Jose (kelebadan niyan, dogangan), so minikagi sikandin, “Ibeg ko begayan a pa te Timanem te doma batà meama.”

Pegpepekangay i Jacob aw si Laban

25Penga te pegtebaw i Jose, minikagi si Jacob diyà ki Laban, “Pekeseyowi a lekat dini amon mekeolì a doton te tanà tinebawan ko. 26Ikà egtameng te menge esawa ko aw menge batà ko, so yan se ontong tepad te terbaho ko diyà kamno. Mesayo kay den. Netegahan no te mèpiya se terbaho ko diyà kamno.”

27Minikagi si Laban, “Aw doen keido no diyà kanak, peg-ogpà ka pa dini. Ikà egkesayo, so pineokit te pegpeneleseb ko, netegahan ko te mèpiya se imbegay te Timanem diyà kanak tandà te peg-ogpà no dini kanak. 28Pengkey eden se ibeg no itandan ko diyà kamno, yan se ibegay ko diyà kamno.”

29Minikagi si Jacob, “Netegahan no te mèpiya se terbaho ko diyà kamno, aw mèpiya heman se pegbowad-bowad te menge ayam-ayam nikaw so siak se migtonggò kenyan. 30Kedengan te wedà a pa dateng dini, olò deitek se keyemanan nikaw. Meneng ontò ka den migkeyaman, so mèpiya se imbegay te Timanem diyà kamno pineokit te kedita te ininang ko. Meneng songkani, keilangan doen ontong te kenaken pamilya pineokit te inangen ko.”

31Mig-insà si Laban, “Eden lay se itandan ko diyà kamno?”

Timaba si Jacob, “Wedad itandan no diyà kanak. Meneng aw meibeg ka te megtonggò a pa te kamno menge ayam-ayam, keilangan tomandù ka te sebad olò ikegiyen ko kamno seini. 32Te aldaw seini, tomeped a te kedita te ayam-ayam nikaw, aw ebaten ko se kedita te nati te karniro meitem aw kedita te nati te kambing boling. Taman iyan se ibegay no diyà kanak. 33Te modi aldaw, ketegahan no aw keseligan a aw kenà, so aw tomengteng ka diyà te menge ayam-ayam imbegay no diyà kanak, aw kitaen no se kambing kidoen kenà boling, aw karniro kenà meitem, ketegahan no te tinakaw ko iyan.”

34Minikagi si Laban, “Ee. Tomanen ko kamno se inikagi nikaw.”

35Dalem te aldaw sìyan, inabat i Laban se kedita te kambing boling aw doen bolbol migsanged te mepotì pengkey meama aw bayi, aw kedita te karniro meitem, aw impetonggò din iyan te menge batà din meama. 36Inibing dan se menge ayam-ayam sìyan doton te mediyò tanà eked keapet singed aw mipanaw se otaw te telo se aldaw. Migtonggò si Jacob te menge ayam-ayam i Laban nesamà.

37Penga niyan, nengabat si Jacob te menge panga te kayo alamo, almendras, aw platano, aw pinelisan din iyan, meneng doen elet-elet wedà din pelisi amon doen batek niyan. 38Intollok din se menge panga sìyan medapag te loboganan te menge ayam-ayam amon kitaen dan iyan te peg-inem dan kidoen. Peg-inem te menge kambing, migpebelagay dan. 39Pegpebelagay dan doton medapag te panga binetekan, boling se menge pispis timebaw kenyan.

40Tinani i Jacob se menge karniro aw kambing, aw impeasdang din se menge karniro diyà te menge ayam-ayam i Laban boling aw meitem. Pineokit niyan, ininang din medita se kandin ayam-ayam, aw wedà din iyan peeyoni diyà te menge ayam-ayam i Laban.

41Pegpebelagay te menge ayam-ayam melambò, gayed migsawol si Jacob te menge panga binetekan doton medapag te loboganan, amon kitaen dan iyan te pegpebelagay dan. 42Meneng aw megasà se menge ayam-ayam, wedà din soli se menge panga binetekan. Wedà kenamay, si Laban se neketig-apò te kedita te ayam-ayam megasà, aw si Jacob se neketig-apò te kedita te melambò. 43Pineokit kenyan, ontò migkeyaman si Jacob. Medita se ayam-ayam, allang, kamilo, aw asno tinig-apò din.

Se kaling peokit

© 1982, Wycliffe Bible Translators, Inc. All rights reserved. More Info | Version Index