Search form

Genesis 34

Pegleges ki Dina

1Na, si Dina se batà laga i Jacob aw si Lea. Doen sebad aldaw, miglegeana si Dina doton te menge laga mig-ogpà kidoen. 2Kinità sikandin i Sikem batà meama te datò kidoen si Hamor tege Hebi. Dinakep i Sikem si Dina, aw lineyokan din. 3Neibeg si Sikem ki Dina, aw ontò dakel se pedowan din diyà kandin, aw mèpiya se inikagi din diyà kandin. 4Minikagi heman si Sikem diyà te amay din, “Ibeg ko megkagon ka tepad te bayi sìyan amon pengognanen ko sikandin.”

5Dinineg i Jacob tepad te pegleges ki Dina, meneng so migtonggò se menge batà din meama te menge ayam-ayam din doton mediyò te balay, yan wedad ininang din lamig minolì dan.

6Dimoton si Hamor amay i Sikem ki Jacob amon megsontal dan. 7Dalem niyan, minolì se menge batà i Jacob. Pegdineg dan te lineges i Sikem si Dina, ontò nepuluk se pedowan dan aw ontò dan neopal, so pigyàyà i Sikem se menge batà i Israel, aw eked iyan kepakay inangen.

8Meneng minikagi si Hamor diyà kandan, “Ontò dakel se pedowan te batà ko si Sikem diyà te batà no si Dina. Pepengognani niyo bag sikandin diyà kandin. 9Mèpiya aw gayed megpepengognanay se menge batà ta. 10Mepakay heman aw meg-ogpà kaw dini kenami. Pemellii niyo se mèpiya ogpaan niyo. Mepakay se peg-ogpà niyo dini, aw pegnigosyo niyo dini, aw pegketig-apò niyo te tanà dini.”

11Penga niyan, minikagi si Sikem diyà te amay aw menge kedowa i Dina, “Aw keidowan a niyo aw ibegay niyo diyà kanak se bayi sìyan, pengkey eden se pemoyoen niyo, yan se ibegay ko diyà kenyo. 12Indani a niyo aw eden se isablag ko aw ibowang ko, so pengkey eden se pemoyoen niyo, yan se ibegay ko diyà kenyo. Pepengognani a niyo bag kandin.”

13Meneng pegtaba te menge batà i Jacob diyà ki Sikem aw amay din si Hamor, mig-akal dan kandan so lineges se etebay dan si Dina. 14Minikagi dan, “Eked iyan kepakay diyà kenami. Eked kepakay diyà kenami aw pengognanen se etebay day te otaw wedà tolii, so meyàyà kay. 15Eked iyan kepakay diyà kenami singed aw megpetolì se kedita te meama doton kenyo, amon mekeiling kaw heman kenami. 16Aw megpetolì kaw, mepakay diyà kenami aw megpepengognanay kidon. Yan meg-ogpà kay doma niyo, aw meinang kidon sebad olò pongan. 17Meneng aw eked kepakay diyà kenyo aw megpetolì kaw, ibingen day se etebay day aw mesayo kay.”

18Neluba si Hamor aw batà din si Sikem tepad te inikagi dan sìyan. 19Melangkaw telaki si Sikem diyà te kedita te kedowa din, aw wedà sikandin peg-alà-alà te pegpetolì din, so ontò dakel se pedowan din diyà te batà bayi i Jacob. 20Yan dimoton si Hamor aw si Sikem te egludukan te otaw kidoen te lelebangan te kotà nekelibed te lonsod dan, aw minikagi dan diyà te menge doma otaw mig-ogpà kidoen, 21“Ibeg te menge otaw sida megpesigelakay kidon. Mèpiya aw ipeogpà tadon dan dini kenitadon. Mepakay aw megnigosyo dan heman dini, so doen pa keombaan te tanà seini. Mèpiya heman aw megpepengognanay se menge batà tadon aw menge batà dan. 22Meneng eked dan keibeg meg-ogpà dini kenitadon amon meinang kidon sebad pongan singed aw megpetolì se kedita tadon meama iling heman kandan. 23Aw yan se inangen tadon, metig-apò tadon kwani se kedita te ayam-ayam dan aw kedakel te keyemanan dan. Yan mèpiya aw megsebad kidon tepad kenyan amon meg-ogpà dan dini kenitadon.”

24Migsebad se kedita te otaw mig-ogpà kidoen tepad te inikagi i Hamor aw si Sikem, aw migpetolì se kedita te meama mig-ogpà kidoen te lonsod dan.

25Pegkepenga te telo se aldaw, dalem te ineleg se kedita dan tandà te pegpemetolì dan, dimoton se dowa batà i Jacob si Simeon aw si Levi ontò meama i Dina. Nengibing dan te sondang, aw miglompak dan te lonsod sìyan. Wedad palos otaw minato kandan, aw yan inigelà dan se kedita te meama. 26Inimetayan dan heman si Hamor aw batà din si Sikem tinigbas dan te sondang, aw inabat dan si Dina lekat te balay i Sikem aw minolì dan. 27Penga te peg-igelà dan kandan, dimoton se kedita te batà meama i Jacob, aw linompak dan se kedakel te kedònan kidoen te lonsod sìyan, amon megmalit dan tepad te pegleges te etebay dan. 28Dinakep dan se kedita te karniro, baka, aw asno, aw inabat dan se kedakel te kedònan doton te lonsod sìyan aw tanà medapag kidoen. 29Inabat dan se kedakel te keyemanan dan, aw dinakep dan se kedita te bayi aw mengisù, aw inibing dan se kedakel te awop te menge balay dan.

30Penga niyan, minikagi si Jacob diyà ki Simeon aw si Levi, “Ontò a den nelimahan, so pineokit te medaet ininang niyo sìyan, nebensihan a den te menge tege Canaan aw tege Perisi eg-ogpà dini te tanà seini. Olò kidon pilabok. Aw megtipon dan amon meglompak dan kenitadon, matay se kedita tadon.”

31Meneng timaba dan, “Eked kepakay diyà kenami aw lindoan se etebay day iling te kepoyun.”

Se kaling peokit

© 1982, Wycliffe Bible Translators, Inc. All rights reserved. More Info | Version Index