Search form

Juan 7

Si Jesus aw menge kedowa din

1Penga niyan, miglegeb si Jesus kidoen te probinsya te Galiliya. Wedà sikandin doton te probinsya te Judiya, so doen menge obanen te Judiyo meibeg mengimatay kandin. 2Nayan, agpet den domateng se pista te menge Judiyo iningedanan Pista te Bolongabong. 3Minikagi se menge kedowa i Jesus diyà kandin, “Mèpiya aw mesayo ka dini aw memista ka heman kidoen te probinsya te Judiya amon komità se menge otaw tinoledaan no te kepelahan eg-inangen nikaw. 4Aw meibeg se otaw te medengeg se ngadan din, eked din elesi se inangen din. Yan aw doen kepelahan inangen no, mèpiya aw ipekità no iyan diyà te kedita te otaw dini te keneyonan.”

5Yan se inikagi dan, so pengkey telekedowa dan si Jesus, meneng wedà dan pemenal kandin. 6Minikagi si Jesus, “Wedà pa dateng se kanak aldaw. Meneng pengkey eden eldawi se mepakay diyà kenyo. 7Eked kaw kebensihi te menge otaw egtaking te ibeg te keneyonan, meneng kebensihan a dan, so gayed a eg-ikagi diyà kandan te medaet se eg-inangen dan. 8Onà kaw doton te pista. Eked a pa doton so wedà pa dateng se aldaw te pegdoton ko.”

9Penga te peg-ikagi din kenyan, mig-ogpà pa sikandin kidoen te probinsya te Galiliya.

Dimoton si Jesus te Pista te Bolongabong

10Penga te pegdoton te menge kedowa i Jesus te pista kidoen te Jerusalem, dimoton heman sikandin te eles-eles, so ibeg din wedad otaw metaga-taga te pegdoton din. 11Kidoen te Jerusalem, doen menge obanen te Judiyo nengemahà kandin, aw migpeinsaay dan, “Kenan lebò sikandin?”

12Medita se otaw netipon kidoen te pista, aw migpedindilay dan tepad ki Jesus. Doen menge otaw minikagi, “Mèpiya otaw sikandin.” Doen heman menge doma otaw minikagi, “Kenà, so eg-akal sikandin te otaw pineokit te ipegtoladà din.” 13Meneng in-eles dan se peg-ikagi dan kenyan, so nelemitan dan te menge obanen te Judiyo neopal kandin.

14Pegketengà te pista, dimoton si Jesus te dakel simbahan te Judiyo kidoen te Jerusalem, aw migtoladà te otaw netipon kidoen. 15Pegtoladà din, ontò nepela se menge obanen te Judiyo, aw minikagi dan, “Kenan lebò lekat se kebiyasa te otaw seini? So wedà sikandin toledai te menge pengolo te simbahan.”

16Timaba si Jesus kandan, kagi din, “Wedà ko teboki se kebenalan intoladà ko seini, meneng lekat iyan te Timanem simogò kanak. 17Aw meibeg se otaw tomolò te ibeg te Timanem kandin, yan se otaw metaga-taga aw kenan lekat se kebenalan ipegtoladà ko, aw lekat iyan te Timanem aw tinebok ko. 18Aw teboken te otaw se itoladà din, ibeg din domuyun te kandin pegkeotawun. Meneng aw pineokit te pegtoladà din, iduyun din se simogò kandin, yan se pengilala te benal se ipegtoladà din, aw kenà sikandin bolelawun. 19Kineliwatan kaw i Moises te menge punù, meneng wedad palos otaw kidoen kenyo timolò kenyan. Nengà lay ibeg niyo pa mengimatay kanak?”

20Timaba se menge otaw netipon, kagi dan, “Migkebook ka den so dinetengan ka te bosaw. Wedad man otaw meibeg mengimatay kamno.”

21Minikagi si Jesus, “Doen olò sebad kepelahan ininang ko, aw nepela se kedita niyo so aldaw te peg-etod. 22Gebii, migpunù si Moises te keilangan tolien se dedeitek batà niyo meama. Pengkey yan se impunù din, meneng olò din ingkeliwat se ketanem tapay pa tinekingan te kemonaan tadon gebii. Yan keilangan tolien se batà niyo pengkey aldaw te peg-etod. 23Yan eked kepakay aw keopalan a niyo, so aw mepakay se pegtolì niyo te otaw dalem te aldaw te peg-etod amon toloen se punù ingkeliwat i Moises, mepakay heman se pegpegolì ko te kedakel te lawa te otaw dalem te aldaw te peg-etod. 24Yan ikà niyo egsila te otaw singed aw ketegahan niyo se ontò kebenalan.”

Si Jesus lebò se Misiyas?

25Doen menge tege Jerusalem migpebelaw-belaway, kagi dan, “Indà, sikandin se otaw egpemehaen amon imetayan. 26Meneng nepela kay so egtoladà sikandin kinità te kedita tadon, aw wedad palos otaw migsagda kandin. Netaga-taga den besi se menge pengolo te simbahan tadon te ontò sikandin se Misiyas megpelowà kenitadon. 27Meneng kenà din besi se pinelimanan tadon, so aw domateng se Misiyas isogò te Timanem, wedad otaw metaga-taga aw kenan sikandin lekat. Meneng netegahan tadon se tinikedowan te otaw seini.”

28Pegtoladà i Jesus kidoen te dakel simbahan te Jerusalem, minikagi sikandin, “Eden niyo aw netegahan niyo te sinu a aw kenan a lekat. Dimini a kenà pineokit te kenaken ibeg, meneng insogò a dini. Egkeseligan se simogò kanak, meneng wedà kaw ketaga-taga kandin. 29Netaga-taga a kandin so dimini a lekat kandin, aw sikandin se simogò kanak.”

30Peg-ikagi din kenyan, doen menge otaw meibeg megdakep kandin, meneng wedà dan deleg, so wedà pa dateng se aldaw pinemallì te Timanem te pegdakep kandin. 31Meneng medita se doma otaw nemenal te sikandin se insogò te Timanem. Minikagi dan, “Aw domateng se Misiyas megpelowà kenitadon, wedad kepelahan inangen din labi pa mèpiya diyà te eg-inangen te otaw seini.”

Insogò se menge teletonggò amon dekepen si Jesus

32Pegdineg te menge Parisiyo te eg-ikegiyen te otaw netipon, migsebad dan diyà te menge pengolo te simbahan te Judiyo, aw insogò dan se menge teletonggò te simbahan amon dekepen dan si Jesus. 33Minikagi si Jesus diyà te otaw netipon, “Te eked kenamay, mesayo a lekat dini, so molì a doton te simogò kanak. 34Pengkey mengemahà kaw kanak, meneng eked kaw kità kanak, so eked kaw pekedoton te ogpeanan ko.”

35Pegdineg te menge obanen te Judiyo kenyan, migpeinsaay dan, “Kenan lay pesalo sikandin te eked tadon kitai? Domoton lay sikandin te mediyò lonsod eg-ogpaan te menge Judiyo nesakop te kenà Judiyo amon megtoladà te menge otaw kenà Judiyo? 36Eden lay se kedegdagan te inikagi din te eked kidon pekekità kandin pengkey mengemahà kidon kandin? Nengà lay minikagi sikandin te eked kidon pekedoton te ogpeanan din?”

Ibegay se Espiritu Santo

37Se temanan aldaw te Pista te Bolongabong, yan se ontò melangkaw aldaw diyà te kedita te Judiyo. Pegdateng te temanan aldaw te pista, timindeg si Jesus kidoen te dakel simbahan aw minikagi te dakel se kagi din, “Aw sinu se nelao, domiyà kanak, so ipeinem ko. 38Aw memenal se otaw kanak, metoman diyà kandin se kagi te Timanem insolat,

‘Kidoen te pedowan din, tomebol se wayeg mekebegay te kaling pedowan wedad temanan.’”

39Se inikagi din tepad te wayeg, yan se tegdeyanan din tepad te Espiritu Santo ibegay diyà te kedita te otaw memenal kandin. Meneng wedà pa dateng se Espiritu Santo kandan, so wedà pa pegpeengat si Jesus doton te langit.

Wedà pegsebad se menge otaw

40Pegdineg dan te inikagi din, doen menge otaw minikagi, “Sikandin se ontò benal telekeliwat te kagi te Timanem tapay din impakang.”

41Minikagi se menge doma otaw, “Sikandin se Misiyas megpelowà kenitadon.”

Meneng doen heman menge doma otaw minikagi, “Kenà sikandin se egpelimanan tadon, so kenà tege Galiliya se Misiyas megpelowà kenitadon. 42Doen kagi te Timanem insolat te keilangan pelimanan tadon se Misiyas bowad-bowad te kemonaan tadon si David. Tomebaw se Misiyas egpelimanan tadon kidoen te Bitlihim, so yan se lonsod inogpaan i David.”

43Wedà dan pegsebad, aw yan se doun te migpedindilay dan tepad kandin. 44Doen menge otaw kidoen kandan meibeg megdakep kandin, meneng wedad otaw minawid kandin.

Wedà pemenal se menge pengolo te simbahan

45Peg-olì te menge teletonggò te simbahan kidoen te menge otaw simogò kandan, mig-insà se menge Parisiyo aw pengolo te simbahan, kagi dan, “Nengà lay wedà niyo ibingi?”

46Timaba se menge teletonggò, kagi dan, “So wedad palos otaw migtoladà te kebenalan iling te pegtoladà din.”

47Minikagi se menge Parisiyo, “Neekalan kaw din kedì heman. 48Wedà kay din keekali, so wedad palos pengolo te simbahan nemenal diyà kandin. Wedad palos heman diyà kenami menge Parisiyo nemenal kandin. 49Meneng se medita otaw sagkep timaking kandin, yan se nemenal kandin so wedà dan toledai te kebenalan tepad te kagi te Timanem insolat, aw yan ipelumun dan te Timanem.”

50Kidoen heman si Nicodemo, so sikandin se sebad doma dan. Sikandin se dimoton ki Jesus kedengan te delem. Minikagi diyà te menge doma din netipon, kagi din, 51“Eked kepakay diyà te punù ingkeliwat i Moises aw ipelumun se otaw singed aw onà sikandin insaan aw eden se eg-inangen din, amon meketaba.”

52Meneng minikagi dan, “Sikona besi heman se sakop te probinsya te Galiliya. Pengemahà ka kidoen te kagi te Timanem insolat, aw yan ketegahan no te wedad palos sakop te probinsya te Galiliya neinang telekeliwat te kagi te Timanem.”

Bayi kinità te miglakad

[ 53Penga niyan, nesayo se kedita dan aw migsiolì dan.

Se kaling peokit

© 1982, Wycliffe Bible Translators, Inc. All rights reserved. More Info | Version Index