Search form

Luc. 5

Pegtawal i Jesus te menge tinoledaan

Luc. 5:1-11; Mat. 4:18-22; Mar. 1:16-20

1Nayan, doen aldaw timindeg si Jesus kidoen te kilid te lanaw iningedanan Genesarit. Migpesegsegay se kedita te otaw amon megpedapag dan diyà kandin, so ibeg dan domineg te kagi te Timanem itoladà din. 2Doen dowa belangay kinità din kidoen te kilid te lanaw, meneng tinenanan iyan te otaw egpemokot, so migbollaw dan te pokot. 3Penga niyan, minalin si Jesus doton te belangay i Simon, aw nemoyò te ipelepaw din iyan kidoen te lanaw medapag te kilid. Penga niyan, nenenoo si Jesus kidoen te belangay aw migtoladà te menge otaw kidoen te tanà.

4Penga te pegtoladà din, minikagi si Jesus diyà ki Simon, “Pegpelawod ka aw penagdag kaw te pokot amon doen meabat.”

5Meneng timaba si Simon, “Pengolo, nemokot kay timayod te delem, meneng wedad palos neabat day. Meneng so simogò ka, megdagdag kay te pokot.”

6Pegdagdag dan te pokot, nesàban dan se dakel gapang te ikan. Agpet den nelisì se pokot so ontò medita se ikan neabat. 7Penga niyan, kinapay dan se menge otaw kidoen te doma belangay amon megtelaban kandan. Pegdateng dan doton, miglolan dan te ikan lamig agpet den meteled se didowa belangay so nepenò te ikan. 8Si Simon, se doma ngadan din si Pedro, pegkità din kenyan, limongken diyà ki Jesus aw minikagi, “Pengolo, kesayo ka lekat kanak, so nelegeb a te salà.”

9Yan se inikagi din so ontò nepela si Pedro aw menge doma din, so ontò medita se ikan neabat dan. 10Nepela heman se kedomaan din kidoen te doma belangay si Santiago aw si Juan, didowa batà i Sebedeo. Minikagi si Jesus diyà ki Simon, “Ikà egkelemitan. Lekat seini, kenà ikan se meabat no, meneng otaw den se ibingen no diyà kanak.”

11Pegdong dan te belangay, timanan dan te kedita, aw timaking dan ki Jesus.

Pinegolì i Jesus se tompigun

Luc. 5:12-16; Mat. 8:1-4; Mar. 1:40-45

12Sagwa kidoen si Jesus te sebad lonsod, kinità din se otaw nelegeb se lawa te tompig. Pegkità din ki Jesus, limongken diyà kandin aw nemoyò, “Sir, aw doen ibeg no, netegahan ko te mekebatog ka megpegolì kanak.”

13Nemaed si Jesus kandin, aw minikagi, “Meibeg a. Kegolian ka.”

Pegketà, negolian sikandin. 14Migpunù si Jesus kandin te wedad palos otaw mepakay indanan din. Minikagi heman sikandin, “Doton ka te pengolo te simbahan aw pekitai se lawa no diyà kandin. Penga niyan, begayi se ibowang no iling te impunù i Moises amon ketegahan te kedita te otaw te negolian ka den.”

15Meneng labi pa medita se otaw dimineg te dengeg i Jesus, aw yan se doun te ontò medita se otaw dimoton kandin amon menenalan dan kandin aw amon kegolian dan. 16Meneng melikit egdoton si Jesus te kebigtilan amon megtawal-tawal.

Pinegolì i Jesus se otaw kenà egpekeiwal

Luc. 5:17-26; Mat. 9:1-8; Mar. 2:1-12

17Nayan, pegtoladà i Jesus, nenenalan kandin se menge Parisiyo, aw doen heman menge menenoladà te punù ingkeliwat i Moises. Lekat dan te medita ogpeanan kidoen te probinsya te Galiliya aw Judiya, aw lekat te lonsod te Jerusalem. Doen tolos i Jesus lekat te Timanem amon megpegolì te menge otaw doen mesakit. 18Wedà kenamay, dimateng se otaw neningga te otaw kenà egpekeiwal. Ibeg dan ipeawop sikandin diyà te balay amon ibingen doton ki Jesus. 19Meneng wedad okitan dan so ontò medita se otaw netipon. Yan nenayit dan doton te atep te balay sìyan, so pantal se atep niyan. Inowang dan se ketengà te atep, aw intonton dan sikandin sipat inibatan din kidoen te tengà-tengà te otaw medapag ki Jesus. 20Pegkità i Jesus te ontò dan simalig diyà kandin, minikagi sikandin, “Elew, pigwedad den se salà nikaw.”

21Meneng migpebelaw-belaway se menge Parisiyo aw menenoladà te punù ingkeliwat i Moises, kagi dan, “Eked kepakay se inikagi din sìyan. Migtompuyus sikandin te Timanem, so wedad mekebatog megwedad te salà meneng olò Timanem.”

22Meneng netegahan i Jesus aw eden se pigbelaw-belaway dan, aw minikagi sikandin, “Nengà lay egdowa-dowa se aneng-aneng niyo? 23Mola megpelingo-lingo se otaw megwedad te salà. Meneng eked pekebatog se otaw megpegolì te otaw kenà egpekeiwal singed aw doen tolos te Timanem diyà kandin. 24Meneng so Timanem a Migpekeotaw, ipekità ko den kenyo te mekebatog a megwedad te salà te otaw dini te tanà.”

Penga niyan, minikagi si Jesus diyà te otaw kenà egpekeiwal, “Enaw ka. Loloni se inibatan no, aw olì ka den.”

25Pegketà, dalem te pegtengteng te kedita te otaw diyà kandin, minenaw, aw inibing din se inibatan din, aw minolì sikandin egduyun te Timanem. 26Ontò nepela se kedita dan, aw induyun dan se Timanem. Nelemitan dan aw migpebelaw-belaway dan, “Sebad indà se kinità tadon seini.”

Pegtawal i Jesus ki Levi

Luc. 5:27-32; Mat. 9:9-13; Mar. 2:13-17

27Nayan, pegkesayo i Jesus lekat kidoen, doen iskribinti si Levi nenenoo kidoen te opisina din. Pegkità i Jesus kandin, minikagi, “Taking ka kanak.”

28Yan timindeg si Levi, aw tinenanan din se kedita, aw timaking sikandin ki Jesus.

29Wedà kenamay, mig-inang si Levi te dakel kànen kidoen te balay din te pegsagman din ki Jesus. Medita heman se iskribinti aw doma otaw kimaen doma dan. 30Meneng doen menge Parisiyo aw menenoladà te punù ingkeliwat i Moises simila te menge tinoledaan i Jesus, kagi dan, “Medaet iyan so kimaen kaw doma te mededaet otaw, menge iskribinti aw doma otaw nelegeb te salà.”

31Pegketaga-taga i Jesus te insila dan, minikagi sikandin, “Kenà otaw wedad mesakit se bolongen te doktor, meneng otaw doen mesakit se bolongen din. 32Insogò a dini kenà amon tewalen ko se otaw eg-aneng-aneng te metòlid se eg-inangen dan, meneng insogò a amon indanan ko se otaw mekesesalà te keilangan megselsel dan.”

Tepad te pegpowasa

Luc. 5:33-39; Mat. 9:14-17; Mar. 2:18-22

33Doen heman otaw minikagi diyà ki Jesus, “Melikit egpowasa se menge tinoledaan i Juan, aw egpowasa heman se menge tinoledaan te Parisiyo. Nengà lay kenà egpowasa se kamno menge tinoledaan?”

34Minikagi si Jesus, “Aw doen peipid, eked kepuluk se menge sigalak te meama peipiden dalem te kidoen pa sikandin. 35Meneng doen aldaw domateng aw meabat lekat kandan se meama peipiden, aw yan se aldaw megpowasa dan so mepuluk dan.”

36Mig-indan heman si Jesus te menge tegdeyanan tepad te kaling itoladà din, kagi din, “Aw doen kaling penenaktun, wedad otaw meglisì kenyan amon doen itompal te pepidit din, so aw yan se inangen din, kebàtan se kaling penenaktun, aw kenà onawa se batek te pepidit aw itompal kenyan. 37Aw meg-inang heman se otaw te bino, eked din soli se temek te paras diyà te solanan ininang lekat te kindal te kambing tapay linanit, so aw megbohak se temek, megbeto se solanan tapay linanit, aw eleg kebàtan se bino aw solanan niyan. 38Yan keilangan isawol se temek inangen bino diyà te solanan kaling linanit. 39Aw gayed eg-inem se otaw te tapay bino, eked sikandin keibeg te bino kaling ininang, so labi pa mèpiya se tapay.”

Se kaling peokit

© 1982, Wycliffe Bible Translators, Inc. All rights reserved. More Info | Version Index