Search form

Mar. 16

Pegkeantay i Jesus

Mar. 16:1-8; Mat. 28:1-8; Luc. 24:1-12; Juan 20:1-10

1Nayan, penga te aldaw te peg-etod, migpedomà-domaay si Maria tege Magdala, aw kesangay din si Maria inay i Santiago, aw si Salome. Minayad dan te metinadeg amon doen itoyong dan diyà te lawa i Jesus. 2Peglibtak te aldaw te iselem te Linggo, dimoton dan te lebeng. 3Te wedà dan pa dateng doton, migpeinsaay dan, kagi dan, “Sinu lay se mengelid te bato insampeng te lebeng amon mekeawop kidon?”

4Meneng pegtengteng dan, kinità dan te tapay den nekelid se bato insampeng. Ontò dakel se bato sìyan. 5Penga niyan, minawop dan diyà te lebeng, aw kinità dan se anghil nenaol te mepotì aw nenenoo lenged te kowanan dan. Nepela se menge bayi. 6Penga niyan, minikagi se anghil, “Ikà niyo egkepela. Netegahan ko te inahà niyo si Jesus tege Nasarit, sìyan inlansang diyà te kros. Wedad den sikandin dini, so neantay den lekat te nematay. Tengtengi niyo den se linebengan kandin. 7Na, doton kaw den ki Pedro aw menge doma tinoledaan i Jesus, aw indani niyo dan te nekeonà den si Jesus diyà kenyo pesalo doton te probinsya te Galiliya. Kitaen niyo sikandin doton, so yan se inikagi din kenyo.”

8Penga niyan, limowà dan lekat te lebeng aw kimadas dan, so tinegangtang dan, aw ontò dan nepela. Wedad palos otaw inindanan dan tepad te kinità dan, so nelemitan dan.

Migpekità si Jesus ki Maria tege Magdala

Mar. 16:9-11; Mat. 28:9-10; Juan 20:11-18

[ 9Nayan, penga te pegkeantay i Jesus lekat te nematay te iselem te Linggo, si Maria tege Magdala se tagnà pinekitaan i Jesus. Sikandin se tapay pinelowaan i Jesus te pito se bosaw. 10Dimoton sikandin te menge tinoledaan i Jesus. Gayed dan nepuluk aw migkelag dan. Meneng mig-indan si Maria diyà kandan aw eden se kinità din. 11Pegdineg dan te neantay den si Jesus lekat te nematay aw kinità din den sikandin, wedà dan pemenal kenyan.

Migpekità si Jesus diyà te doma tinoledaan din

Mar. 16:12-13; Luc. 24:13-35

12Penga niyan, migpekità si Jesus diyà te didowa tinoledaan din te peg-ipanaw dan pesalo doton te saka, meneng wedà dan sikandin kilelai, so netodà den se bawa din. 13Pegkilala dan kandin, limikò dan doton te Jerusalem, aw mig-indan dan diyà te menge doma tinoledaan din. Meneng wedà dan pa pemenal kandan.

Migpekità si Jesus diyà te sempolò tegusà tinoledaan din

Mar. 16:14-18; Mat. 28:16-20; Luc. 24:36-49; Juan 20:19-23; Ininang 1:6-8

14Penga niyan, migpekità si Jesus diyà te sempolò tegusà tinoledaan din dalem te pegpengaen dan. Simila sikandin kandan so wedà dan pemenal aw magsen se olo dan, so wedà dan pemenal te kagi te menge otaw kimità kandin penga te pegkeantay din lekat te nematay. 15Penga niyan, minikagi si Jesus, “Doton kaw den te kebelad te keneyonan. Pegtoladà kaw te Mèpiya Indan tepad kanak diyà te kedita te otaw. 16Aw memenal se otaw kenyan, aw megpebonyag, ipelowà sikandin lekat te salà. Meneng aw eked pemenal se otaw, ipelumun sikandin. 17Seini se menge pengilala inangen te menge otaw egpemenal kanak. Megpelowà dan te bosaw lekat te otaw pineokit te ngadan ko. Mikagi dan heman te kagi eked kelebeti. 18Pengkey mekeawid dan te memokan, pengkey mekeinem dan te mekeilo, eked dan elegi. Aw memaed dan te menge otaw doen mesakit, kegolian dan.”

Neengat si Jesus doton te langit

Mar. 16:19-20; Luc. 24:50-53; Ininang 1:9-11

19Nayan, penga te peg-ikagi i Jesus diyà kandan, neengat sikandin doton te langit, aw nenenoo kidoen te tangkil te Timanem amon lomowan doma din. 20Penga niyan, nesayo se menge tinoledaan i Jesus lekat te Jerusalem aw migtoladà dan kidoen te kebelad te keneyonan, pengkey kenan dan pesalo. Tinebangan dan heman te Pengolo, so impetaga-taga din te benal se intoladà dan pineokit te menge pengilala ininang dan.]

Se kaling peokit

© 1982, Wycliffe Bible Translators, Inc. All rights reserved. More Info | Version Index