Search form

Mat. 20

Tegdeyanan tepad te menge otaw migterbaho

1“Iling heman kani se peglowan te Timanem. Doen tig-apò te pawà tineneman te paras. Limapos sikandin nengemahà te menge otaw meglegani te paras din. 2Migpakang sikandin te doen kwarta ibegay din diyà kandan sebad dinaryo, so botong iyan itandan te sebad se aldaw. Penga niyan, dimoton dan te pawà din aw migterbaho dan. 3Pegkealas nowibi, todà sikandin nengemahà te otaw meglegani. Doen otaw kinità din doton te pedyanan wedad terbaho dan. 4Minikagi sikandin, ‘Aw megterbaho kaw doton te pawà ko, tendanan ko sikiyo te mèpiya.’ Yan nesayo dan aw miglegani. 5Todà sikandin nengemahà te otaw te alas dosi aw alas tris te meapon, aw iling heman kenyan se kagi din kandan. 6Sagwa agpet alas singko te meapon, kinità din heman se doma otaw wedad terbaho dan. Mig-insà sikandin, ‘Nengà lay wedad palos terbaho niyo te aldaw seini?’ 7Timaba dan, ‘So wedad megtandan kenami.’ Minikagi sikandin, ‘Pegterbaho kaw heman doton te pawà ko.’

8“Nayan, pegkedelem niyan, minikagi se otaw diyà te otaw sineligan din, ‘Tewali se kedita te otaw migterbaho, aw begayi kandan se tandan dan. Onai se otaw kaling migterbaho, aw modihi se otaw tapay migterbaho.’ 9Pegtandan din te otaw migtebò migterbaho alas singko te meapon, sebad dinaryo se kwarta imbegay din diyà te teg sebad-sebad kandan. 10Nayan, te wedà pa tendani se menge otaw migterbaho lekat te iselem, migpeliman dan te labi pa dakel se ibegay din diyà kandan. Meneng pegtandan din kandan, sebad heman dinaryo se kwarta imbegay din diyà te teg sebad-sebad kandan. 11Pegkinawà dan te kwarta, migbelisì dan diyà te tig-apò te paras. 12Minikagi dan, ‘Olò sebad oras se pegterbaho te otaw sida, meneng lekat te iselem se kenami pegterbaho, aw neilad kay te aldaw, meneng onawa se intandan no te kedita day.’ 13Meneng minikagi se tig-apò diyà te sebad kandan, ‘Elew, wedà a peglegawa kamno, so sebad dinaryo se kwarta impakang ko kamno. 14Yan ibingi se kwarta intandan ko kamno aw olì ka den. Lekat te ibeg ko, onawa se imbegay ko diyà te kedita niyo. 15Wedad besi mekesagda kanak aw meibeg a memegay te kanak kwarta diyà te otaw pemellien ko. Miningà ka besi so neido a kandan.’”

16Minikagi heman si Jesus, “Iling heman kenyan, doen otaw medanà songkani ipelangkaw doton te peglowan te Timanem. Doen heman doma otaw melangkaw songkani, meneng meinang dan medanà.”

Iketelo peg-ikagi i Jesus tepad te kemetayun din

Mat. 20:17-19; Mar. 10:32-34; Luc. 18:31-34

17Nayan, peg-ipanaw i Jesus pesalo doton te Jerusalem, impetaking din se sempolò teg dowa tinoledaan din, aw minikagi diyà kandan te wedad doma dimineg, 18“Na, domoton kidon te Jerusalem. Penga niyan, siak Timanem Migpekeotaw se itolok, aw ibegay a diyà te belad te menge pengolo te simbahan aw menenoladà te punù ingkeliwat i Moises. Megsebad dan mikagi te keilangan imetayan a. 19Ibegay a dan heman diyà te belad te otaw kenà Judiyo. Kebebeyatan a dan, aw bedasen a dan, aw penga niyan ilansang a diyà te kros amon matay a. Penga niyan, meantay a lekat te nematay te iketelo te aldaw.”

Pinemoyò te inay i Santiago aw si Juan

Mat. 20:20-28; Mar. 10:35-45

20Penga niyan, dimoton se esawa i Sebedeo ki Jesus sipat didowa batà din si Santiago aw si Juan. Limongken sikandin diyà ki Jesus so doen pemoyoen din. 21Mig-insà si Jesus, “Eden lay se ibeg no diyà kanak?”

Minikagi sikandin, “Aw megtebò ka lomowan, peonsadi bag se didowa batà ko seini diyà te tangkil no, sebad lenged te kowanan, aw sebad lenged te bibang, amon segmanen dan heman doma nikaw.”

22Minikagi si Jesus, “Wedà niyo ketegahi aw eden se kebegat te pinemoyò niyo. Meketayod kaw lay heman te kelimahan agpet den domateng kanak?”

Timaba dan, “Ee, meketayod kay heman kenyan.”

23Minikagi si Jesus, “Metoman kaw heman detengan te kelimahan domateng kanak, meneng eked a pegpakang diyà kenyo te sikiyo se meketangkil diyà kanak, so tomangkil diyà kanak se otaw pinemallì te Amay ko.”

24Pegdineg te sempolò tinoledaan aw eden se inikagi dan diyà ki Jesus, neopal dan ki Santiago aw si Juan. 25Meneng tinawal dan i Jesus aw minikagi sikandin, “Netegahan niyo den aw eden se eg-inangen te menge otaw eglowan. Gayed dan egleges te menge sakop dan. Gayed heman egsogò-sogò se melangkaw otaw te menge sakop dan. 26Meneng eked kepakay aw meg-iling kaw kandan. Aw doen otaw diyà kenyo meibeg megkelangkaw, keilangan gayed menabang kenyo. 27Aw doen otaw diyà kenyo meibeg megkelangkaw, keilangan megpedanà sikandin te pegkeotawun din iling te kedanà te allang. 28Keilangan meg-iling sikandin kanak Timanem Migpekeotaw, so dimini a te tanà kenà amon tebangan a te otaw, meneng dimini a amon menabang a te otaw. Neketagad a den imetayan amon medita se otaw mekelowà lekat te pegkeallang dan diyà te salà.”

Pinegolì i Jesus se dowa otaw bota

Mat. 20:29-34; Mar. 10:46-52; Luc. 18:35-43

29Nayan, pegkesayo dan lekat te Jeriko, ontò medita se otaw timaking ki Jesus. 30Doen dowa otaw bota nenenoo doton te kilid te dalan. Pegdineg dan te si Jesus se minokit kidoen, timawal dan, “Bowad-bowad i David, keidowi kay bag.”

31Migsagda se menge doma otaw kandan, aw migpunù dan te keilangan mepenek dan. Meneng labi dan beling timawal, “Pengolo, bowad-bowad i David, keidowi kay bag.”

32Pegdineg i Jesus te pegtawal dan, simagked sikandin aw timawal diyà kandan, kagi din, “Eden lay se ibeg niyo inangen ko kenyo?”

33Timaba dan, “Pengolo, ibeg day, todà kay komità.”

34Neidowan dan i Jesus, aw pinemàdan din se mata dan. Pegketà, kimità dan, aw timaking dan ki Jesus.

Se kaling peokit

© 1982, Wycliffe Bible Translators, Inc. All rights reserved. More Info | Version Index