Search form

Mat. 26

Peglalang te medaet inangen ki Jesus

Mat. 26:1-5; Mar. 14:1-2; Luc. 22:1-2; Juan 11:45-53

1Penga te pegtoladà i Jesus te kedita niyan, minikagi sikandin diyà te menge tinoledaan din, 2“Netegahan niyo den besi te dowa mendad se aldaw te pegdateng te Pista te Pegpelowà, aw metoman a ibegay diyà te belad te otaw meglansang kanak Timanem Migpekeotaw diyà te kros.”

3Dalem niyan, netipon se menge pengolo te simbahan aw menge obanen te Judiyo doton te balay te ontò pengolo dan si Caifas. 4Miglalang dan te dekepen dan si Jesus te wedad doma otaw metaga-taga amon imetayan dan. 5Minikagi dan, “Keilangan eked kidon pegdakep kandin dalem te pista, amon eked pegsamok se kedita te otaw.”

Pegtoyong ki Jesus kidoen te Bitanya

Mat. 26:6-13; Mar. 14:3-9; Juan 12:1-8

6Nayan, pegdoton i Jesus te lonsod te Bitanya, limaoy sikandin ki Simon, sìyan otaw pinegolian din te tompig. 7Dalem te pegpengaen dan, doen bayi nengibing te lana metinadeg ontò meelagà insawol diyà te deitek botilya mèpiya se bawa. Migpedapag se bayi diyà ki Jesus aw nenoyong te lana diyà te olo din. 8Na, pegkità te menge tinoledaan i Jesus te ininang te bayi, neopal dan, aw minikagi dan, “Tay law. Pigbàtan din se lana sìyan. 9Aw ibeligyà iyan, doen ontò dakel kwarta iteped diyà te menge otaw sagkep.”

10Meneng netaga-taga si Jesus te ingkeopal dan, aw minikagi sikandin, “Ikà niyo egsila te bayi sìyan, so mèpiya se ininang din diyà kanak. 11Gayed doen otaw sagkep mebatog niyo tebangan. Meneng eked a gayed peg-ogpà dini kenyo. 12Pineokit te pegtoyong din te lana diyà kanak, impetagad a din te peglebeng kanak. 13Eneng-enengi niyo se kagi ko seini. Eked palos sikandin kelibeli, so pengkey kenan toledai se Mèpiya Indan doton te kebelad te keneyonan, iindan heman se ininang te bayi sìyan.”

Pegpakang i Judas te pegtolok din ki Jesus

Mat. 26:14-16; Mar. 14:10-11; Luc. 22:3-6

14Nayan, doen tinoledaan i Jesus ngadan din si Judas Iscariote. Dimoton sikandin te menge pengolo te simbahan 15aw minikagi sikandin, “Aw itolok ko sikandin amon dekepen niyo, pila lay se kwarta ibegay niyo kanak?”

Penga niyan, doen kwarta imbegay dan diyà kandin ketlowan plata. 16Lekat niyan, migtagad si Judas te mèpiya aldaw amon itolok din si Jesus.

Pista te Pegpelowà

Mat. 26:17-25; Mar. 14:12-21; Luc. 22:7-14,21-23; Juan 13:21-30

17Nayan, pegdateng te tagnà aldaw te pista te pegpengaen te menge Judiyo te pan kenà eglebag, dimoton se menge tinoledaan i Jesus kandin, aw mig-insà dan, kagi dan, “Kenan kay lay peg-inang te kànen tadon te Pista te Pegpelowà?”

18Minikagi si Jesus, “Doton kaw te otaw te Jerusalem, aw ikagi kaw diyà kandin, ‘Insogò kay te Pengolo day amon mikagi kay diyà kamno te agpet den se pegkematay din. Komaen sikandin te Pista te Pegpelowà dini te balay nikaw sipat sikami menge tinoledaan din.’”

19Penga niyan, timolò dan kandin, aw mig-inang dan te kànen.

20Pegkedelem niyan, dimoton si Jesus aw kedita te sempolò teg dowa tinoledaan din, aw kimaen dan. 21Dalem te pegpengaen dan, minikagi si Jesus, “Eneng-enengi niyo se kagi ko seini. Doen sebad kenyo megtolok kanak.”

22Ontò nelidò se pedowan dan, aw migpetibos-tibosay dan mig-insà, kagi dan, “Pengolo, kenà ko lay lebò?”

23Minikagi si Jesus, “Doen sebad dini megtolok kanak pengkey timogen sikandin kanak. 24Metoman a imetayan, so yan se insolat gebii tepad kanak Timanem Migpekeotaw. Meneng mekelelayò se otaw megtolok kanak. Mèpiya peden aw wedà sikandin tebaw.”

25Mig-insà se migtolok kandin si Judas, “Sir, kenà ko lay lebò?”

Minikagi si Jesus, “Benal se inikagi nikaw.”

Pegkaen te pengilala te pegkematay te Pengolo

Mat. 26:26-30; Mar. 14:22-26; Luc. 22:15-20; 1Ko. 11:23-25

26Nayan, telobo dan pa kimaen, nengabat si Jesus te pan, aw migpesiontong sikandin diyà te Timanem, aw binelà-belà din se pan, aw inteped din diyà kandan, aw minikagi, “Kàni niyo se pan seini, so yan se lawa ko.”

27Penga niyan, inabat din heman se tabò, aw migpesiontong sikandin diyà te Timanem, aw impeinem din iyan diyà kandan, aw minikagi, “Kedita niyo minem kani, 28so seini se dipanog ko, aw pineokit kani, doen den kaling peokit pesalo doton te Timanem. Pineokit te pegkematay ko, pegwedaden din se salà te ontò medita otaw. 29Mikagi a den diyà kenyo te eked a todà inem te ininem tadon seini singed aw metoman kidon minem te kaling bino doton te peglowan te Amay ko.”

30Penga niyan, migdelangan dan tepad te pegduyun dan te Timanem, aw nesayo dan lekat kidoen, aw dimoton dan te bontod te Olibo.

Inikagi i Jesus se pegbolon i Pedro kandin

Mat. 26:31-35; Mar. 14:27-31; Luc. 22:31-34; Juan 13:36-38

31Penga niyan, minikagi si Jesus diyà te menge tinoledaan din, “Kwani seini, tomanan se kedita niyo kanak tandà te kelimahan domateng diyà kanak, so doen kagi te Timanem insolat gebii,

‘Ipeimatay ko se otaw egtonggò te ayam-ayam karniro, aw mebilit se kedita te karniro tinonggoan din.’

32Meneng penga te pegkeantay ko lekat te nematay, mekeonà a diyà kenyo doton te Galiliya.”

33Minikagi si Pedro diyà ki Jesus, “Pengkey tomanan se kedita te doma kamno, meneng eked a palos tanan kamno.”

34Minikagi si Jesus, “Eneng-enengi se kagi ko kamno seini. Kwani te delem te eked pegkolaak se manok, ibolon a nikaw te meketelo.”

35Minikagi si Pedro, “Eked a palos pegbolon kamno, pengkey imetayan a sipat kamno.”

Iling heman kenyan se inikagi te kedita te tinoledaan i Jesus.

Migtawal-tawal si Jesus kidoen te Gitsimani

Mat. 26:36-46; Mar. 14:32-42; Luc. 22:39-46

36Nayan, dimoton si Jesus aw menge tinoledaan din te kekeyowan iningedanan Gitsimani. Pegdateng dan doton, minikagi si Jesus, “Pegtagad kaw dini. Domoton a sida amon megtawal-tawal a.”

37Impetaking din si Pedro aw sìyan didowa batà i Sebedeo. Penga niyan, ontò den nepuluk se pedowan din, 38aw minikagi sikandin, “Ontò den nepuluk se pedowan ko, iling te matay a. Peg-ogpà kaw den dini, aw ikà niyo egtedogi.”

39Penga niyan, dimeleg si Jesus te kenà mediyò, aw limemlem sikandin aw migtawal-tawal, kagi din, “Amà, aw mepakay diyà kamno, eked a no peden peokiti diyà te kelimahan seini. Meneng ibeg ko, kamno ibeg se metoman, kenà kanak.”

40Peglikò din doton te tinoledaan din, timedogi den dan. Linoka din dan aw minikagi sikandin diyà ki Pedro, “Nepela a den kenyo, so wedà kaw peketayod te sebad olò oras, meneng timedogi kaw. 41Ikà niyo egtedogi. Meneng pegtawal-tawal kaw amon eked kaw keboyo. Pengkey mèpiya se ibeg te pedowan niyo, meneng wedad kagsen te lawa niyo.”

42Migpekediyò-diyò si Jesus te ikedowa, aw migtawal-tawal, kagi din, “Amà, aw eked kepakay aw eked a okit diyà te kelimahan seini, ibeg ko metoman se kamno ibeg.”

43Todà limikò si Jesus doton te menge tinoledaan din, aw kinità din dan timedogi, so nepilot dan. 44Todà sikandin nesayo aw migtawal-tawal te iketelo. Onawa heman se intawal-tawal din. 45Penga niyan, limikò sikandin doton te tinoledaan din aw minikagi sikandin, “Nepela a so gayed kaw timedogi. Na, dimateng den se oras te pegtolok kanak Timanem Migpekeotaw, amon dekepen a te menge otaw mededaet. 46Enaw kaw den. Dimateng den se otaw megtolok kanak. Somongon kidon kandin.”

Pegdakep ki Jesus

Mat. 26:47-56; Mar. 14:43-50; Luc. 22:47-53; Juan 18:3-12

47Telobo pa minikagi si Jesus, dimateng si Judas, sìyan tinoledaan i Jesus. Ontò medita se otaw timaking kandin, aw migkekamang dan te menge podok aw batota. Insogò dan te menge pengolo te simbahan aw menge obanen te Judiyo. 48Tapay dan netegahan aw eden se inangen i Judas, so minikagi sikandin, “Se otaw edekan ko, yan se otaw inahà niyo. Dekepi niyo sikandin.”

49Nayan, pegdateng dan doton, wedà peg-alà-alà si Judas, meneng dimoton ki Jesus, aw minikagi, “Sir, mèpiya delem.”

Penga niyan, inedekan din si Jesus. 50Minikagi si Jesus, “Elew, pedelegi den se tod nikaw.”

Penga niyan, migpedapag se doma otaw diyà ki Jesus, aw migdakep dan kandin.

51Na, doen doma i Jesus nenagnos te podok din aw tinigbas din se sineligan te ontò pengolo te simbahan, aw nepalot se dibaloy telinga din. 52Meneng minikagi si Jesus, “Olii se podok diyà te lomà. Aw meglegamit se otaw te podok, imetayan heman sikandin pineokit te podok. 53Wedà no besi ketegahi ini. Aw mengenganay a diyà te Amay ko, isogò din se minelalan anghil din amon megtabang dan kanak. 54Meneng simpana tebangan a dan, eked den ketoman se kagi te Timanem insolat gebii te metoman a detengan te kelimahan.”

55Penga niyan, minikagi si Jesus diyà te kedita te otaw netipon, “Kolang se pegkekamang niyo te podok aw batota amon megdakep kaw kanak, so kenà a megdedempasay. Gayed a migtoladà doton te dakel simbahan, meneng wedà a niyo dekepi doton. 56Meneng neinang se kedita nini amon metoman se insolat te menge telekeliwat te kagi te Timanem gebii tepad kanak.”

Penga niyan, kimadas se kedita te tinoledaan i Jesus, aw tinenanan dan sikandin.

Inibing si Jesus doton te menge pengolo te simbahan

Mat. 26:57-68; Mar. 14:53-65; Luc. 22:54-55,63-71; Juan 18:13-14,19-24

57Penga niyan, inibing si Jesus te otaw migdakep kandin doton te balay te ontò pengolo te simbahan si Caifas. Tapay netipon kidoen se menenoladà te punù ingkeliwat i Moises aw menge obanen te Judiyo. 58Timelokon heman si Pedro, meneng migpekediyò lamig dimateng sikandin doton te dowangen te balay te ontò pengolo te simbahan. Pegdateng din doton te balay, nenenoo si Pedro doma te menge otaw migtonggò te dakel simbahan, amon ketegahan din aw eden se meinang ki Jesus.

59Nayan, ibeg te menge pengolo te simbahan aw menge doma dan obanen, doen inangan dan si Jesus te salà amon doen tindegan te pegpeimatay dan kandin. 60Pengkey medita se otaw migkebolalaw tepad kandin, meneng kenà botong se in-indan dan tepad kandin. Pegkenamay-namay, doen dowa otaw dimoton kandan, 61aw minikagi dan, “Dinineg day se inikagi din te mekebatog sikandin megbaet te dakel simbahan sida eg-ogpaan te Timanem, aw todà din iyan ipetindeg dalem te telo se aldaw.”

62Timindeg se ontò pengolo te simbahan aw minikagi, “Eden lay se itaba no kenyan? Indani kay aw benal se inikagi te didowa otaw sìyan.”

63Meneng wedà taba si Jesus. Penga niyan, minikagi se ontò pengolo te simbahan, “Megpunù a den diyà kamno pineokit te ngadan te Timanem eked palos kematay te keilangan meg-indan ka den te kebenalan. Sikona ekon se Misiyas, sìyan Batà te Timanem. Indani kay den aw benal iyan.”

64Minikagi si Jesus, “Benal se inikagi nikaw. Mikagi a den kani diyà kenyo. Te eked kenamay, komità kaw kanak Timanem Migpekeotaw egpenenoo kidoen te tangkil te Amay ko metolos amon lomowan a doma din. Lomikò a heman dini lekat te langit tekingan te labon.”

65Penga niyan, miglisì se ontò pengolo te simbahan te saol din tandà te keopal din, aw minikagi sikandin, “Migtompuyus sikandin te Timanem, so migpelingo-lingo sikandin Batà te Timanem. Wedad den kekemowan te peg-indan te doma otaw diyà kenitadon tepad kandin, so dinineg tadon den se pegtompuyus din te Timanem. 66Na, eden lay se aneng-aneng niyo tepad kandin?”

Timaba dan, “Keilangan imetayan sikandin so doen salà din.”

67Penga niyan, tineptepan dan se bawa din, aw sinombag dan sikandin. Doen heman menge otaw nenampeng te mata din aw nenampak te bawa din, 68aw minikagi dan, “Na, aw ontò ka Misiyas, etoki aw sinu se nenombag kamno.”

Imbolon i Pedro si Jesus

Mat. 26:69-75; Mar. 14:66-72; Luc. 22:56-62; Juan 18:15-18,25-27

69Dalem niyan, mig-ogpà si Pedro doton te lowà te balay kidoen te dowangen. Doen bayi egtelaban dimoton kandin aw minikagi, “Sikona se egdoma ki Jesus tege probinsya te Galiliya.”

70Meneng migbolon si Pedro, aw dinineg te kedita dan se kagi din, “Wedà ko ketegahi aw eden se eg-ikegiyen nikaw.”

71Penga niyan, minalin si Pedro doton medapag te lelebangan. Doen doma bayi egtelaban kimità ki Pedro, aw minikagi diyà te menge otaw kidoen, “Otaw seini se egdoma ki Jesus tege Nasarit.”

72Todà migbolon si Pedro. Migsapà sikandin aw minikagi, “Wedà ko sikandin kilelai.”

73Wedà kenamay, doen menge doma otaw dimoton ki Pedro, aw minikagi dan, “Benal sikona se sebad egdoma te otaw sida dinakep. Netegahan day te sikona se tege probinsya te Galiliya, so dinineg day se litok te kagi nikaw.”

74Penga niyan, ontò migsapà si Pedro aw minikagi, “Wedà a palos kilala te otaw sida.”

Pegketà, migkolaak se manok. 75Yan neeneng-enengan i Pedro se tapay inikagi i Jesus te ibolon din sikandin te meketelo te eked pa pegkolaak se manok. Penga niyan, nesayo si Pedro aw ontò migkelag.

Se kaling peokit

© 1982, Wycliffe Bible Translators, Inc. All rights reserved. More Info | Version Index