Search form

Lucas 1

Lucaspan tau huaquin ahuun tsain cununi cuscan

1-2Teófilo un mia cunu fomai futsafoan Jesucristohuunoa cunuafo cuscan mirifi min icoinra huacoinnon. Jesús acaiton oinmisifo cuscan yafi ahuun tsain yoimisifoan noco yoinifo cuscan nannori futsafoan aqui cununifo. 3Ascano urifi un nantifi yocapacuni Jesushuunoa aqui cunushquin. Nan caini cuscan huafain nan ahuamamishti huayopaonishaquin apa ari nai muran naso caini cani. Ascacun afu rafuafo un ato yoca urifi tapisharashqui. Ascashon cayacafi cunushon mia fomashquin. 4Ascacun uhuun cunuhuunshon mia futsafoan yosiainfo cuscan min icoinra huacointiro.

Diosin nai oinmatinin nan Juan yorafo unu muran iquimapacumisi caiantaima ahuun apa tapimayoni

5Ascacun natian un nica cuscan un mia yoinon. Herodes Judea anoa niaifoatian nantianri Zacarías nocofunu shara nanno ini. Naanfin Aarón ahuun funaquin. Ascashu nannoa ahuun caifohuunshon Dios cufimisi ipaoni. Aarón ahuun funafo shoco ranan. Nan shoco futsafoan aton niaifo Abías. Nanrifi Zacarías ahuun niaifo ini. Nan Zacarías ahuin Isabel arifi Aarón funa. 6Ascashon nan rafutan Diosin tsain cununi cuscan nicasharacoinpaonifo. Nantifi Diosin yononi cuscan tanasharamisifo. Nan rafutan tanasharaifoan Diosin oinpaoni. Ascacucai tsoan ato ahuashta rafatiro ipaonima. 7Ascafiashu facuoma rafu. Zacarías anifo icaino ahuinri yoshafo toosma ini.

8Ascano Abías ahuun shocofo nan ahuun yorafohuunshon Dios cufimisifo ato yoini isca huaquin, —Manfin natian siete oshatan Dios cufiti pushu muranshon man yonoshonicai, —ishon ato yoini. Ascano nannori Zacarías atofu ini. 9Nantianri Zacarías catonni Dios fu tsainti pushu muran iquishon ininti shara coanon. Nan ininti ahuun anu incienso. Nanscara cufimisifoan aton fuyamisi ipaoni. 10Nan incienso fiin cuscara coaino yora ichapafo cufiti pushu umainti ano nishon Dios cufishcaquin.

11Ascashon Dios cufiti camaqui incienso coa ahuun mumihuuri Diospan oinmati afu nai muran ica Zacariasqui niriscatani. 12Ascaino Zacarías mustairitan fasi ratucoinni. 13Ascafiaiton Diosin oinmatinin afu nai muran icaton yoini isca huaquin, —Ratuyamahuu, Zacarías. Min cufiainton Diosin man mia nica. Min ahuin Isabel chipo furonanfacu nanushquin. Ascan caincun min anuquin Juanran min huashquin. 14Ascashu min fasi aqui unimasharacoinshquin. Ascaino yorafori fasi aqui unimacoinshquin caiano. 15Ascano Upa Diosirifi aqui unimashquin. Nocofunu fasi sharacoin iishquin. Ascashocai ahuara pau ayapacunacama. Fimi unu pau ayayamafain ayati futsa pauri ayashquima. Caiyaintian Diosin Yoshin sharapan nan iquishquin. 16Nan nocofunuaitian ahuun caifo Israelifo Diosin tsain shara ato yoishquin ato chaca shatunonfo. Ascano aton Ifo Diosiqui nasononfo.

17Ascashu nan Juan Elías ipaoni cuscara arifi iishquin. Elías Dioshuunshon ahuun yorafo cayacafi icocoin tapimapaoni cuscan nanscarifi aqui Juanpan ahuun yorafo arifi ato tapimashquin. Ascano ahuun tsainhuunoashu ato apafo yafi aton facufo afanan noinanshcani. Ascashu nan Diosin tsain nicacasmamisifoan arifi aton chaca shatucashon Dios icoinra huafain shinansharashcani. Ascacun Juanhuunoashu ahuun caifofo itisharashcani Diospan furun atoqui nocoaitian a nicasharashcaniran, —ishon yoiaiton.

18Nicaquin Zacarías cumani, —¿Ahuuscashomun min yoiai cuscan un icoinra huatiroquin? Unfi anifocoinquin. Uhuun ahuinrifi yoshafoquin, —huaiton.

19Afanan cumaquin, —Unfi Gabrielquin. Un Dios fu imisi. Ascacun nanton ua nichian un ahuun tsain shara mia yoinon. 20Ascan un mia yoiai cuscacai mian icoinra huaima. Ascan natiancai min afanan tsainyoima nan min facu caiyaintian. Un mia yoiai cuscafin nan apaiyaitian Diosin huaashquiquin, —ishon Diosin nai oinmatinin yoini.

21Ascaino yorafoan Dios fu tsainti pushu umaintishon cufinquin anaiticatan Zacarías mananifo. Ascafiaino Zacarías atoqui funa caiamaino yoinifo, —¿Ahuuscain Dios cufiti pushu murannoashu Zacarías saman huaimun? —icashu yoinannifo. 22Ascariaifoanno atoqui cainfiashocai ato tsainquinima. A pucutiroma muuquin ahuun mucupan ato yoi fustini. Ascaiton onannifo Dios fu tsainti pushu muranshon Zacarías namapan cuscara oianran, icashu ahuun yoinannifo.

23Ascashu yorafohuunshon Dios cufimisifo ato yono anaiticatan Dios cufiti pushu murannoashu fonifo. Ascaino Zacarías arifi ahuun pushu ano cani. 24Ascashon chipo ahuinin facu nanuni. Ascashucai ahuun pushu murannoashu mucu fustiti oshu raqui caipainima. 25Ascashon Isabel shinanquin isca huani, —¡Aicho! Diosihuunshon uhuun funun ua facu nanumana. Diosin ua ashoan. Afin ua nanumapaiyaitian ua facu nanumana. Uhuun ramapaiquin. Asca natiancai afanan uhuunoa yorafoan yoitiroma isca huaquin, “Nacai facuyanacamaran,” ishocai yoitirofomaran, —ishon shinanni.

Jesús cainshquiai cuscan Diosin nai oinmatinin yoini

26-27Ascano seis oshu Isabelqui man caano Diosin nai oinmati Gabriel Mariaqui niriscatani. Nan María funuoma ini. José fu fiananfotaima afu iyopaonima. Tsoaricai afu imisima. Ascan José ahuun shunifin David iniquin. Nan Israelifoan ato niaifo ipaoni. Ascacun Diosin ahuun oinmati afu nai muran icaton yoini isca huaquin, —Galilea mai Nazaret pushurasi muran Mariaqui catahuun, —ishon ahuun oinmati Gabriel nichini. 28Ascano aqui nocoshon yoini, —Un miqui oa. Diosin oian min fasi sharacoincun. Mia fasi noicoin. Nocon Ifo mifu icaran, —ishon yoini.

29Ascaiton nicaquin María ahuun nomuran shinanpaini, —¿Raquiri ua yoipaimun? —ishon shinanni. 30Ascaiton afanan cumani, —Maria, ratuyamahuu. Diosin mihuun noifain miqui unimasharai. 31Ascan minfin natian furonanfacu nanuicai. Ascashu caincun min anuquin Jesusran, huaashquin. 32Ascano caianshu niaifocoin iishquin. Diosin nai murannoaton ahuun shuni David niaifo ipaoni cuscan arifi apahuunoashu niaifocoin iishquin. 33Ascashu naanfin Israelifoan aton niaifo unupacunacamaran, —ishon Gabriel yoiaiton.

34Afanan María cumani, —Uncai funuyamafinquin. Uacai tsoan tanamisima. ¿Ascan ahuuscashomun un facu nanutiroquin? —huaiton.

35Diosin oinmatinin afu nai muran icaton afanan María cumani, —Diosin ahuun Yoshin Sharapan miqui oshon mia facu nanumashquin. Nanto ahuun curushhuunshon ahuamamishti huatiro. Nanhuunshon mia facu nanumashquin. Ascan nan facu cainshquiaifin shara fustisi imisiquin. Ahuashtacai chaca huamisima. Naanfi Diospan facuquin. 36Min yaya yoshafoancai facu nanumisima. Ascan toosmaran huafiamisifo natian man facu nanua seis oshu man aqui caa. 37“Ascacun ahuacai Diosin aquimaracai,” non huatiroma. Nantofi ahuamamishti huatiroquin, —ishon yoini.

38Ascaiton afanan María cumani, —Unfin uhuun Ifoan oinmatiquin. Afifin nan apaiyai cuscan ua huatiroquin. Nan mian yoiai cuscan ua huanonquin, —ishon María yoiaino amaquinoashu yamariscatani.

Marían Isabel oin cai cani

39Ascano man shafa ranan finontan María ahuun yaya ano cai fasi coshi cani nocoriscapai. Nan Judea muran pushurasi ano machihuanrasifo ini. 40Nocotan Zacarías ahuun pushu muran iquitoshiquin ahuun yayan Isabel yoini, —Yayan, un mia oinyoiran, —huani. 41Ascaiton nicai Isabel ahuun shaqui muranshon ahuun facun potapotani. Asca huaino Diosin Yoshin Sharapan ahuun nomuran shinansharamani.

42Ascaino oi ashcafinin Isabel ahuun raru María yoini isca huaquin, —¡Aicho! Rato ainfo futsacai mia acai cuscan Diosin catoanma. Fasi mia shara huacoinna. Min facu chipo cainyano Apa Diosin aqui unimacoinqui a cushusharashquin. 43Ascan un ahuara shara huaa rafanancai Diosin ua shara huama. Ascashon uhuun Ifoan ahuun ahua uqui nichian ua oinyonon. 44Ascano min tsain nicai unimaqui uhuun shaqui muranshon uhuun facun ua potapotaca. 45Upa Diosin nan min ishquiai cuscan mia iquisi tapimanaiton nantifi ahuun tsain min icoinra huaa. Ascacun Diosin mia unimamaran, —ishon Isabel ahuun raru María yoini.

46Ascaiton María arifi ahuun yayan yoini,

“Uhuun nomuranshon un shinanqui isca huaa,

‘Ifon min sharacoin. Tsoa futsacai mia cuscara sharama.

47Min uhuun Numamisi

Diosiran icashu uhuun nomuran un fasi unimacoinna.

48Ascashu un ahuun oinmati.

Un ahuamafiacun uhuun ramapaiquin ua oinfafainni.

Ascacun ua Diosin shara huaa cuscan yorafoan uhuunoa yoipacunacafo.

49Diosin ahuamamishti huamisiton ua ahuara sharashtacoin ashoan.

Aafin shara fustisiquin.

50Ascan ratoran futsan Dioshuunoa nicaquin ahuunoa shinansharafafainai.

Nan cuscara yorafohuun Diosin ramapaipacunaca.

51Diosin ahuun shinanpan ahuamamishti huamisi.

Ascashon nan cacapaimisifoan aton nomuran shinanchacamisifo cuscan Diosin ato shatumafain atori onaintimai.

52Ascatan niaifofori Diosin ato shatumana afanan niaifo inonfoma.

Ascashon nan ahuamafo ato shinansharamana nanfoan tapinonfo ahuun facufocashon.

53Ratoran futsa ahuuomafo foni cuscarafo fasi Diosihuunoa tapipai tanasharashcaquin.

Nanscarafo Diosin ato cushusharatiro.

Ascashon ahuara yopai cuscan ato inansharafain a tanasharaifoanri

ato unimamashquin.

Ascashon ahuara ichapa ayafofiashu Diosihuunoa shinanyamaifo copiquirifi ato ahuara inainma.

Man mafo ichapayafiashu ato nomuran shinansharayamafain tsoa unimamisima.

54-55Ascafiaifoanno nocon caifofo Israelifofin Diospan oinmatifoquin.

Ascashon non ahuara acai cuscan noco ashomisi.

Nonfin noco shuni Abraham ahuun funafoquin.

Ascacun nocohuun ramapaipacunaca.

Nannori Upa Diosin nocon shunifo yoiyotianiran,’ ”

ishon María yoini.

56Ascashu oshu rafu non fusti ahuun yayan Isabel fu iyoni. Ascatan María ahuun pushu ano nasoni.

Nan yorafo unu muran iquimapacumisi Juan caini cuscan

57Ascashu Isabel ahuun facu caiyaintian furonanfacu cainni. 58Ascaiton a chaima icafo futan ahuun yorafoan nicanifo nocon Ifo Isabelhuun ramapaiqui facu cainmashara. Ascashu afu unimacoinnifo. 59-60Ascatan ocho osha finontan Zacarías pushu ano ahuun yorafo funifo facushta ahuun foshqui rupa shatuni fucani. Ascashon apa anuquiri Zacariasran huapaifiaifoan ahua Isabel yoini, —Ma. Anoricai ahuun anu iquima. Juan ishquiran, —ishon ahuan yoiaiton.

61Cumanifo, —Ma. Rato min yorafoan ahuun anucai Juanmaran, —ishon yoinifo.

62Ascashon Zacariasrifi yocanifo ato mucumansi raquinimain ahuun facun anuicai. Ascafiaifoan tsaintiroma muuqui ahuun mucumansi mutoacufaini ahuun anu tapipaifiainfoan. 63Ato papio yocain mucu mushan mushainni. Ascaiton inanfo cunutan ato ismaiton oianfo Juan ini. Ascara oincani mustairitan, —Icon ahuun anu Juan ishquiran, —ishon shinannifo. 64Ascano ahuun facun anu cunutapai Zacarías afanan tsainnacahuani. Ascashon Dioshuunoa shara yoini. 65A chaima icafo futan Judea muran machi ichapa ano icafoan nicacaquin Diosin aca cuscan fasi sharacoin. —Noncai ascara nicayomisimaran, —icashon Zacarías yafi ahuin Isabel non aton facu Juanhuunoa yoiquin futsanifo. 66Ascashon nan nicafoan yoinifo, —¿Ahuu cuscaramun nan facu iishquiquin? Man non oian facufiacun Diosin Yoshin Sharapan iquinaiton, —icashu yoinannifo.

Zacarías fanainni cuscan

67Ascano facu ahuun apa Zacarías Diosin Yoshin Sharapan iquinaiton inon pacoai cuscan yoini isca huaquin,

68“Uhuun caifo Israelifoan nocon Diosin fasi sharacoin.

Nocoqui oa noco numashqui.

69Diosin nocon Numamisi nan ahuamamishti huamisi nocoqui nichian.

Noco shunifoan aton niaifo David ipaoni.

Nanton ahuun funa nocoqui nichian noco niaifocoin ipashanon.

70Nannori ahuun tsain inon pacoai yoimisisharafohuunshon Diosin yoiyoni.

71Ascashon yoiquin isca huani, ‘Un mato cushui.

Nan mato noicasmamisifoan afanan mato ahuusca huanonfoma.

Ascacun un mato Numamisi matoqui nichiran,’ ishon Diosin inon pacoai yoimisifohuunshon noco yoini.

72-75Ascashu noco shunifohuun Diosin ramapaipaoni.

Abraham yoiyoni cuscacai Diosin ointi aquimanama.

Yoiquin isca huani, ‘Un min funafo numashqui ato noicasmaifoan ato ahuusca huanonma.

Ascano ratutama ua yonoshopacutirofoquin,’ ishon Diosin yoiyoni.

Nocon Ifoan yoiyotiani cuscacoin man noco ashoin non isharacoincain non ahuun tsain tanapacushanon,”

ishon Zacarías yoini. 76Ascashon ahuun facu yomushtafiacun pushcoashu ishquiai cuscan yoiqui isca huani,

“Uhuun facushtan, ‘Mirifi min Diosin tsain yoishomisiran,’ mia huaashquicani.

Diosin nai murannoaton ahuun Yoshin Sharahuunshon ishquiai cuscan

min ato yoifoanfafainquin isca huashquin.

‘Nocon Ifo oshquiquin itisharacahuun.

Maton chacari shatucahuun a nocoaiton nicasharashcaquin.

77-79Diosin fasi nocohuun ramapaiqui

nocon Ifohuunshon noco chaca soashona non afu ipashanon,’

ishon noco caifo min ato yoishquin.

Nii muran faquishiainocai non oinsharatiroma.

Chashamatimaisicai non fai tanasharatiroma nocosharapaiquin.

Nanscarifiai nocon Ifo oataimano tsoan Diosin fai tapiataima.

Shafaino fari otiro afanan faquish inonma.

Nanscarifiai nocon Ifo nai murannoashu oataima nan faquish cuscara.

Ascafia nan nocoqui oaitian nan chashamati cuscara shara iishquin.

Ascashon Diospan fai noco oinmashquin

ahuunoashu non Dios fu rafunon.

Nonricai nai afanan ratutiroma.

Naashumain non Upa Dios fu ipasharatiro.

Non nicuri noco cushusharafain nocon ointi fucash huanonma non isharashquin,”

ishon Diosin Yoshin Sharahuunshon Zacarías yoini.

80Ascashu nan Juan facu pushcocoin sharani. Ascashon shara fustisi tanapaiquin ahuun nomuran Diosin tsain shara nanucoinni. Tsoa istaipama anori iyopaoni ahuun caifo nan Israelifo Diosin tsain yoiquin tau huaitian.

Diospan Tsain

© 2008, Wycliffe Bible Translators, Inc. All rights reserved. More Info | Version Index