Search form

Marcos 5

Nocofunu yoshin chacafo ahuun nuucun Jesús caya huani

Mt 8.28-34; Lc 8.26-39

1Ascano ianmanhuan pocufainifo. Gerasafoan aton mai ano fonifo. 2Nocotan Jesús mapufaini. Ascaino nocofunu yoshin chaca ahuun nua aqui noconi. Mahua quini muran naafo mai huapaonifo murannoashu aqui noconi. 3-4Nan nocofunu mahua quini muran ipaoni. Yorafoan cunopan munushfain onushfain huafiafo cuno tusaqui futsani. Tsoan afanan achitiroma munushfain onushushquin. 5Yamutifi yafi shafatifiri mahua quinifo muran icain machi ano cahuacacaipaoni. Nannoashu toquirinin afiri tsacai futsuni fiisiyanan.

6Jesús chaicunoa fuchitan aqui ichoni. Ichotan fuopacucahuatan. 7-8Ascano Jesús yoini, —Minfin yoshin chacacoinquin. Na nocofunumaquinoashu catahuun, —huaiton. —¿Mian ahuusca huapaimun, Jesús? Diosin nai muran icaton ahuun Facufin minquin. Diosinhuunshon yoihuu min ua omitsisca huamashquima. Yoipun, —nocofunun yoshin chaca ahuun nuaton yoini.

9Ascaino amaquinoashu cataima Jesús yocani, —¿Min ahuunumun? —ishon yocaiton. Yoshin chacanun cumani, —Uhuun anufin ichapaquin. Urus fusticai na nocofunu muran un icama. Un fu yoshin chaca ichaparasi amuran ica. 10Mai futsa ano noco nichiyamapun, —huariani.

11-12Na machi mananunshon yahua inafoan picaniquin. —Ato muran noco nichipun, —yoshin chacafoan huaifoan. 13—Yahuafo muran fotacahuun, —Jesús ato huani. Asca huatanaino nocofunumaquinoashu dos mil yahuafo muran fonifo. Yahuafohuun nuui focani. Ascaino nantifi yahuahuanfo ian muran maocofainni. Ascashu asai futsunifo.

14Ascaifoan oinfaincani yahuahuanfo cushumisifo ichonifo. Pushurasi ari chani focani. Pasohuatofori chaninifo. Ascaiton nicacani yorahuanrasi yahua asai futsua oinpaicani funifo. 15Fucaquin oianfo Jesús yafi nocofunu ahuun yoshin chacafo a muran imisi tsaoa ini man amaquinoa Jesús yoshin chacafo potano. Afanan imisi cuscan chitoria inima. Man sahuuti sahuua. Afananricai nison inima. Shinansharacoinni. Ascaiton oincani ratucoinnifo. 16Ascashon atirifoqui chaninifo nan oianfo cuscan huafain chaniaifoan. 17Nicacaquin Jesús isca huanifo, —Nocon mai anoashu catapun, —huanifo.

18Asca huaifono Jesús shashon nanucaini cani. Nanuataima, —Uari iyoicapun. Un mifu capaicai, —a yoshin chaca amaquinoa potaton huaiton. 19—Ma. Min pushu ano cashon min yorafo yoitahuun. Upa Diosin mia ashoan cuscan huafain minhuun ramapaia cuscan ato yoitahuun, —huani. 20Asca huaino cashon Jesús aca cuscan mucu rafuti pushurasi ano yoifoanfafaini. Ascaiton nicacani, —¡Aira! ¡Nicacapon! Tsoan anori nicayomisimaran, —icanashu nantifi yoinannifo.

Jairo ahuun ainfacu naafiacun Jesús funinini non ainfoan Jesús ahuun sahuuti muuanshu cayani

Mt 9.18-26; Lc 8.40-56

21Ascatan Jesús fu afu rafuafo afanan ian mahuan pocufurannaino yorahuanrasi cusumun aqui noconi. 22Ascaifono Judiofoan ichananti pushu anoa aton niaifo ahuun anu Jairo Jesús fuchitan fuoshopacucahuaquin yoini, 23—Uhuun facushta isinin ishoinquin. Uhuun pushu ano ufu capun. Uhuun facushta ua maiatashoshquin cayanon, —huani. 24Ascatan cani. Ascaino yorahuanrasi afu fonifo. Focani fasi yuruinfainifo. 25Nannori ainfo imi imitiani atofu cani. Doce fari man aqui caano nusuyamacai. 26Doctor rasi ano cata cataquin nantifi ahuun pui ato inanquin anaitini. Ascafiashu cayatamarocon finacoinni.

27Ascano Jesushuunoa yoiaifoan nicaquin ainfoan acachorishon ahuun sahuuti muunniquin cayashquin. 28—Un ahuun sahuuti muuanshuraca un cayatiroati, —ishon ahuun nomuran shinanni. 29Ascatan aqui mupiashu imi shatariscatani. Afanan isinin inima.

30Ascano Jesús ahuunoashu ainfo cayano yorahuanrasi muran ifiacucahuan ato yocani, —¿Tsoan ua muamun? —ishon ato yocani. 31Ascaiton cumanifo, —¿Min oianmamun yorahuanrasiton mia yuruacafo? ¿Ahuuscaquimun min noco yocaicain? —a fu rafumisifoan huanifo. 32Ascaifoan Jesús ato oiancuni, —¿Tsoan ua muamun? —ini tapipai. 33Ascaino ainfo man caya huaa tapiashu ratui fuopacucahuaquin. Nantifi ahuunoa imisi cuscan yafi ramashta acai cuscari yoiniquin. 34Nicaquin yoini, —Achishtan, mian icoinra huashu min cayaquin. Ratuyamahuu. Min ointi muran unimahuu. Min afanan omitsiscaimacai. Min pushu ano casharatahuun, —ishon Jesús ainfo yoini.

35Jesús tsaincaino Jairo pushu anoashu futsanfo aqui fucashon yoinifo, —Min facu man naaquin. Non ahuusca huatiromaquin. Nocon tapimamisi afanan catima huayamahuu, —ishon futsanfoan Jairo yoinifo.

36Jesús Jairo yoini, —Aton tsain nicayamahuu. Ratuquima. Ua fusti icoinra huahuu, —ishon Jesús yoini.

37Ascano Jesús yorahuanrasi nichitan, —Pedro non Juan non Santiago non atiri ufu fucahuun, —ato huani. 38Ascatan Jairo pushu ano nocoquin nica amurannoashu uaicani shorarascanifo manocani. Ascaiton Jesús oinni. 39Ointan pushu muran iquicaitan, —¿Ahuuscain man shorarascaimun? Na facucai naamafinquin. Oshafinquin, —ato huani. 40Ascaiton osanifo. Osaifoan ato chifi caimatan apa yafi ahua non afu rafuafo rafu non fusti cunu futsa muran ato iyoni. Nanno shotocofacu doce fari aqui caa. Raca ini. 41Jesús shotocofacu mutsoinifoan yoiquin, “Talita, cum:” Onicoinnin tsainmanfin “Facushtan, funinaca huanhuun,” huaino. 42Samamashta funinaca huanaino apa yafi ahua mustairinifo. Ascatan, —¡Aira! Nocon facushta afanan man funia. Oianmaquicai non icoinra huacuanamaran, —icashu yoinannifo. 43—Maton facu man naacoinfiacun un funimana tsoan yoitama piimacahuun, —Jesús apa yafi ahua yoini.

Diospan Tsain

© 2008, Wycliffe Bible Translators, Inc. All rights reserved. More Info | Version Index