Search form

Mateo 13

Fimi ushu saacaihuunoa cuscara ato Jesús yosini tapinonfo

Mr 4.1-9; Lc 8.4-8

1Ascatan nan shafatari Jesús pushu murannoashu cai ian cusumun tsaoni. 2Ascaino aqui yorahuanrasi funifo ahuun tsain nicapai cani. Ascaino shasho muran nanuinacahuan ahuun cusha camaqui tsaoshon ato yoini. 3Ascashon ahuara futsahuunoa cuscara ato yoini ato tapimashquin. Yoini isca huani, —Nocofunun ahuun noshati murannoa fimi ushu fishon ahuun mau mamaqui saani. 4Saacano ushufo fai nushmancayan pacua puiyafoan piinifo. 5Ascano ushu ranan toquiri camaqui pacua mai ichapamashta anoashu samamashta ushu foaica. 6Fari tsacaqui yositimahuaino man naa. Ahuun taporicai chai foama ini. Ascashu fanafo nai cuyoa. 7Ascaino ushu rananri tasha murannoashu foaifiashucai ushu futsa foaisharanima. 8Ushu rananri mai shara ano saaca nan mai sharanoashu nantifi foaisharashu fimi ichapayacoin ini. Futsa cien fimiya icaino futsa sesenta aya icaino futsari treinta fimiya ini. 9Ascan manmain ua nicatiroquin ua nicacahuun uhuun tsainri maton nomuran nanucoincahuun, —ato huani.

Ahuuscaquimun futsafo yoifiashon Jesús afu rafuafosi shafacafi ato tapimaniquin

Mr 4.10-12; Lc 8.9-10

10Ascaino non afu rafua aqui fucashon yocanon, —¿Ahuuscai shafacafi ato yoitama ahuahuunoa cuscara min yorafo ato tapimashquinmun? —ishon non yocani. 11Jesús ato cumani, —Ahuuscashomain Upa Diosin ahuun yorafo iquiniquin mato fusti tapimai. Ascan nafocai ato tapimaima. 12Ascan tsoan Diosin tsain nicasharafain ahuun nomuran nanucoian naanfin Upa Diosin paratamari tapimashquin. Ascafia tsoan ichapama tapifiashon Diosin nicasharayamafain nan yoia cuscan aima nanfin funoshquiquin. 13Ascacun nan yorafo un ahuara futsahuunoa cuscara un ato tapimashquin oinfiacashon tapinonfoma. Nicafiaquiri tapinonfoma. 14Nannori Isaías nan Diosin tsain yoimisi ipaoniton atohuunoa inon pacoai yoiqui isca huani,

“Man nicafafaifiaquicai Diosin ato yoiai cuscan tapinacafoma. 15Nan yorafoan aton ointi curushcoinyashu nicayosmashunifo. Diosin tsain man nicamisifiashu nan nicama cuscarafo. Uhuun yonoshara oinfiacani nan futsoi cafiscaafo. Ascashon un ato isma cuscan oianfoma. Ascayamacanashu uqui fucuanafo un ato chaca soashonon uhuun yora sharafo iishcaqui,”

ishon Diosin yoini cuscan Isaiasin cununi.

16Ascafia nannori Isaías cunufiani mancai ascarama. Ascatamarocon un mato oinmana cuscan man icoinra huafain un mato yoia cuscan man nicacoinmisi. Ascashu maton nomuran man unimacoinna. 17Un mato icon yoi. Man oian cuscacai uhuun Upa Diosin ahuun tsain yoimisifo futan a tanamisi futsafoanri fasi oinpaifiaquicai tsoan oinpaonima. Un mato yoimisi cuscan fasi nicapaifiacaquin tsoan nicapaonima.

Fimi ushu saamisihuunoa yoifiashon shafacafi afu rafuafo tapimani

Mr 4.13-20; Lc 8.11-15

18Nan fimi ushu saamisihuunoa un ato yoia cuscan natian shafacafi un mato tapimai. Ascacun ua nicasharacahuun tapisharashquin. 19Ascan nan Dios ahuun yorafo iquinai cuscan nicafiashon tapiama. Nanfofin nan ushufo fai ano pacua cuscarafoquin. Diosin tsain ato nomuran man nanufiafo nan yoshin chaca Satanás atoqui oshon nicafo cuscan ato fiantiro afanan afohuunoa shinanonfoma. 20-21Ascano futsafoanri Diosin tsain nicaquin tau huai unimacoinyofiashu samamashta ahuun tsain cachiquiri huaa. Ascan nanfofin nan ushufo toquiri camaqui pacua cuscarafoquin. Nanfori nan ushufo toquiri camaquinoashu foaifia ahuun tapo chai foama. Samamashta nai cuyotiro. Nanscarifiai nanfoancai Diospan tsain aton nomuran nanu sharafoma. Ascashon ahuara chaca finonyamarai futsafoan ato omitsisca huaino samamashta Dios cachiquiri huatirofo. 22Ascan ushu futsafo moshafo muran pacuashu foaisharatiroma. Nanscarifiai futsafoan Diospan tsain nicafiashon ahuara nan acai cuscan fustisi shinain. Ascashon pui ichapa yafi mafo ichapa noi afi paramuquicai afanan Dioshuunoa shinantiroma. Ascaquicai Diosin ato amapaiyai cuscan futsafo shara huatiroma. 23Ascafiaquin ushu futsa mai shara ano saacano foaiquin yosiashu fimi ya itiro. Nanscarifiai futsafo Diospan tsain nicafain tapicanashu nan yoia cuscan aafo. Ascashon nanfoanfin futsafori Diospan tsain yoiquin icoinra huamatirofoquin. Futsan treinta iyamarai sesenta iyamarai cien yorafo icoinra huamatiroran, —ishon Jesús ato yoini.

24Afanan Jesús ato tsain futsa yoini tapinonfo. Isca huaqui, —Diosin nantifi iquinano nanscarifi aquin nocofunun ushu sharafo fana. 25Fana sharafiashu ahuun noicasmamisiton yamu ahuun mau ano caa. Mau ifo ahuun oinmatifo oshano noicasmamisiton tashafori mau ano fana. Fanatan mau anoashu caa. 26Chipofin nan ushu shara foaicaino tashafori foaini. 27Ascano aqui fucashon mau ifo ahuun oinmatifoan yoinifo, “¿Ifon, min ushu shara min mau ano fanamamun? ¿Ahuuscaimun natian tashafori foaicaquin?” ishon yocanifo.

28“Noco noicasmamisiton acaran,” huaiton. “¿Ascan nan tashafo non tsucai fotiromun?” huaifoan. 29“Ma. Man tasha tsucaino nan fana sharafori tsucapaiyamafiaquin man afori tsucatiro. 30Nanscanonquin. Chitunmisitian tashafo yafi fana sharafori foaitiro. Nantian un mau yonomisifo yoishquin isca huaquin, ‘Iquisi nan tashafo tsucacahuun. Nantifi nushasharahuu coashquinon. Asca huatanfin nan fanasharafori uhuun tapasi muran ua fushotacahuun,’ ” mau ifoan yoiaran, —ishon Jesús ato yoini.

Mostaza ushuhuunoa Jesús ato yoini

Mr 4.30-32; Lc 13.18-19

31-32Ascasho Jesús mostaza ushuhuunoa ato yoini ahuara futsa ato tapimashquin. Ato yoiqui isca huani, —Nocofunun ahuun mau ano mostaza ushu fanani. Rato fimi ushu futsacai mostaza ahuun ushu uhuapamashtatioma. Ascafia foaica fasi cuya itiro. Rato pushu umainti fimi charo fanacai mostazatioma. Ihui noconan rafutiro. Ascatan yosiano puiyafo ahuun tushpahuu tsaotiro. Nanscarifiai Diosin ahuun yorafo iquisi fustirasi ifiashu chipo paratama caitioran, —ishon ato yoini.

Jesús misi farashatihuunoa ato yoini nanhuunshon Diosin nantifi yorafo iquinai cuscan tapinonfo

Lc 13.20-21

33Ascan Jesús ahuara futsa ato yoini Diosin nantifi yora iquinai cuscan tapinonfo. Afanan ato yoiqui isca huani, —Diosinmain ahuun yorafo ahuusca huatiroquin un mato tapimai. Diosin ahuun yorafo nantifi ato iquifain ato yonotiro. Ainfoan farashati ichapamashta harinaya osishon camisconano farashinitiro. Nanscarifiai Diospan yorafoan nan icoinra huamafo muranshon nantifi ato shara huatiro, —ishon ato yoini.

Jesús ato yoiai cuscan ahuara futsa tapinonfo

Mr 4.33-34

34Ascatan ahuarahuunoa yoiqui Jesús ato yoini tapinonfo. 35Nannori Diosin tsain yoimisiton nan Jesús yoinon pacoai cuscan cunuqui isca huani,

“Un ato ahuara futsahuunoa ato yoi ato tapimashquin. Upa Diosin nantifi onihuani chain tsoan ascara nicayomisima cuscarafo un ato yoishquiran,”

ishon yoini cuscacoin man aa.

Trigo yafi faasi foaitirohuunoa Jesús shafacafi ato tapimani

36Ascatan yorahuanrasi anoashu cai pushu muran iquini. Ascano non afu rafuafo aqui caashon non yocani, —Ifon, min trigo muran faasi foaitirohuunoa yoia cuscacai non tapiama. Shafacafi noco yoihuu non tapisharanon, —ishon non yocani.

37Ascaiton noco cumani, —Diosifi ua nichiniquin. Un nan ushu fanamisi shara cuscara inon. 38Nan maufin nantifi manifotihuunoaqui. Ascan nan ushu sharafofin Diospan yorafohuunoaquin. Ascan faasifin icoinra huamafona nan yoshin chaca ahuun yorafoquin. 39Ascan nan mau ifo noicasmamisi nanfin Satanasquin. Ascan nan fana fiaifotianhuunoafi nan manifoti cuyotirohuunoaquin. Nan fana fimisfofin Diospan oinmatifo afu nai muran icafo.

40Nan faasi mushashon coafo cuscan huaquin. Nan manifoti cuyoaitian. 41Uhuun oinmatifo ufu nai muran icafo un nichishquin nantifi futsa chaca huamamisifo yafi nan chaca huafafainaifo uhuun yorafomaqui ato pashcashcani. 42Ascashon nan omitsiscapanacafo chi urumanhuan muran ato potano nannoashu fasi uaicani omitsiscacoinshcani. 43Ascaino nantianri Diospan yora shara icoinra huafoti aton Upa Dios icanoashu fari chasha cuscarafo. Ascacun manmain ua nicatiroquin ua nicacahuun. Uhuun tsain maton nomuran nanucoincahuun.

Ahuara sharashta onuahuunoa cuscarafin ato yoini

44Nocofunu mai futsa ano caa. Nannoa ahuara sharashta paratama ahuun pui nuua fuchia. Ascan fuchishon nannori afanan onua. Ascashu fasi unimacoinquin nan aya cuscati inanmitsashon nannoa mai fia nan ahuarashta paratama ahuun pui nuuari ahuuna inon. Nanscarifiai Diospan yorafo nantifi aya cuscan afiri inanmutiro Dios fu ipashcaquin.

Perla funoahuunoa Jesús ato ahuaro futsa tapimani

45-46Diosin ahuun yorafo ahuu cuscaramainquin afanan un mato yoiqui isca huai. Mafo inanmitsamisi cahuancacaini macush cuscara perla oshopa sharashtafo funafoanfafainni. Ascashon man futsa anoa fuchia ahuun pui paratama nuua fuchishon nan aya cuscati inanmitsashon ahuun rafanan nan perla fii ahuunacoin inon. Nanscarifiai Diospan yorafo nantifi aya cuscan afiri inanmutiro Dios fu ipashcaquin.

Nushutihuunoa Jesús ato yoini ahuara futsa ato tapimashquin

47-48Ascano nushumisiton ahuun nushuti uhuapa pochishon shiman futsa futsatapafo fiini. Ahuun nushutininhuan shiman fospiano unuhuan cusumun cashon nini funi. Ascashon nan shiman chacafo nushuti murannoa tsucashon potani. Ascanshon nan piti sharafosi shihuati muran nanuni. 49Nanscarifiai manifoti cuyoaitian Diospan oinmatifo afu nai muran icafo nococashon nan chacafo yafi sharafo pashcanan huashcani. 50Ascashon nan chacafoti chi urumanhuan muran ato potashquin nannoashu uaiqui fasi omitsiscapashanonfo, —ishon Jesús ato yoini.

51Ascatan afu rafuafonon Jesús noco yocaiton, —¿Un mato yoia cuscan nantifi man man tapiamun? —ishon noco yocaiton. —Ai. Min noco yoiai cuscan nantifi man non tapiaran, —non huaiton.

52—Ratoran futsafoan Moisés yononi cuscan tapimamisifo nan Diosin ahuun yorafo iquinai cuscan tapiafo. Ascan nanfofin nan mafo inanmitsamisi cuscarafoquin. Mafo inanmitsamisiton yorafo nan yopaifo cuscan inantiro. Ahuara shunifo iyamarai funa ato inantiro. Nanscarifiai tsoan Moisés cununi cuscan yafi un mato rama Diospan yorafohuunoa tapimanai cuscan huafain marifi man futsafo tapimatiroran, —ishon noco yoini.

Jesús afanan Nazaret ano cani

Mr 6.1-6; Lc 4.16-30

53-54Ascano noco yoia cuscan ahuara futsa tapinonfo anaititan Jesús nan pushconi pushurasi ano nasoni. Ascatan Israelifoan aton ichananti pushu muran iquishon ato yoiaiton ahuun tsain nicacani mustairicatan yoinifo, —¿Ahuuscai na nocofunun fasi tapi sharacoianmun? Tsoan atiroma cuscan huapaiquifin atiroquin. ¿Tsoanco Jesús ascara tapimanamun? 55Nanfin ihui sapa yonomisiton ahuun facuquin. Ahuun ahuan Maria. Ahuun ushtofori Santiago yafi José non Simón non Judas. 56Ahuun poifori no fu imisifo. Man nonfin Jesús onanquin. Aacai ahuama. ¿Ascan ahuuscashomun ahuamamishti huatiroquin? —icashu yoinannifo. 57Ascashon nannori ahuunoa shinanchacaquicai tsoan icoinra huapainima.

Ascaiton Jesús ato yoiqui isca huani, —Nantifi mai anoshon Diosin tsain yoimisiton yoiai cuscan nicapaitirofo. Ascafia nan cainni anoshon fusticai tsoan nicapaitiromaran, —ishon ato yoini.

58Ascano nannoshon icoinra huaiyamaifoan tsoan atiroma cuscan fustirasi huani.

Diospan Tsain

© 2008, Wycliffe Bible Translators, Inc. All rights reserved. More Info | Version Index