Search form

Kushangumuka 11

Kaposhi ka Mbambilone

1Akulivanga, vanu voshe vaano a kaye vendekele muyati umolika, na ndaka imolika. 2Omo vaile mu ngangela, vetele mu cana ca mu Mbambilone, co vatungile muje. 3Co valyendekesele umo na mukwavo ngwavo, “Tumungeni vindopi nakuvyenyeka mwamuvwa.” Co vakele na vindopi vyakutunga navyo, amo na tala yakukolesa vindopi. 4Asinoni valyendekesele ngwavo, “Tutungeni nganda yakama amo na kaposhi kakalaja kakete kwilu, ngeci tutsimane kutewa tukashandokela ano asi oshe.”

5Oloni Shukulu Kalunga wezile asi mukumona nganda na kaposhi vije vivatungile vaje vanu. 6Co Shukulu Kalunga wendekele ngwendi, “Kengeni! Ava voshe vanapu vanu vamo, co vakevo valinakwendeka muyati umo, eci cinapu vushangumukilo vwa vyuma vije vivakalinga. Co ololo vakasa kulinga cuma coshe civashaka kulinga! 7Ngecivene, tuyeni tushuluke asi, tukatanganese muyati wavo ngeci omo vendeka kesi valizive.” 8Ngecivene, Shukulu Kalunga wavashandwelele ano asi oshe, co vaje vanu valikelele kutunga ije nganda. 9Co nganda ije vaitumbwile ngwavo Mbambilone omwo kuje kukekwo Shukulu Kalunga watanganesele muyati wa vanu voshe. Kutunda aje vene Shukulu Kalunga wavashandwelele ano asi oshe.

Vatekulwila va Shemi

(1 Miz 1:24-27)

10Ava vakevo vatekulwila va Shemi. Co a myaka ivali omo livazi lyetile, Shemi wakele na myaka 100, wakitile mwana wa munalume lizina lyendi Alepakeshande. 11Kutunda aje akitilile Alepakeshande, Shemi wayoyele myaka ikwavo 500, co wakitile lalo vana va vanalume na ava va vanakazi.

12Omo Alepakeshande wakele na myaka 35, wakitile mwana wa munalume lizina lyendi Shela. 13Kutunda aje akitilile Shela, Alepakeshande wayoyele myaka ikwavo 403, co wakitile lalo vana va vanalume na ava va vanakazi.

14Omo Shela wakele na myaka 30, wakitile mwana wa munalume lizina lyendi Evele. 15Kutunda aje akitilile Evele, Shela wayoyele myaka 403, co wakitile lalo vana va vanalume na ava va vanakazi.

16Omo Evele wakele na myaka 34, wakitile mwana wa munalume lizina lyendi Pelenge. 17Kutunda aje akitilile Pelenge, Evele wayoyele myaka 430, co wakitile lalo vana va vanalume na ava va vanakazi.

18Omo Pelenge wakele na myaka 30, wakitile mwana wa munalume lizina lyendi Leu. 19Kutunda aje akitilile Leu, Pelenge wayoyele myaka 209, co wakitile lalo vana va vanalume na ava va vanakazi.

20Omo Leu wakele na myaka 32, wakitile mwana wa munalume lizina lyendi Selunge. 21Kutunda aje akitilile Selunge, Leu wayoyele myaka 207, co wakitile lalo vana va vanalume na ava va vanakazi.

22Omo Selunge wakele na myaka 30, wakitile mwana wa munalume lizina lyendi Nahole. 23Kutunda aje akitilile Nahole, Selunge wayoyele myaka 200, co wakitile lalo vana va vanalume na ava va vanakazi.

24Omo Nahole wakele na myaka 29, wakitile mwana wa munalume lizina lyendi Tela. 25Kutunda aje akitilile Tela, Nahole wayoyele myaka 119, co wakitile lalo vana va vanalume na ava va vanakazi.

26Omo Tela wakele na myaka 70, wakitile vana vendi vatatu va vanalume mazina avo, Avilama, na Nahole, na Halane.

Vatekulwila va Tela

27Ava vakevo vatekulwila va Tela, ishe ya Avilama, na Nahole, na Halane. Halane ikeye wapwile ishe ya Lote *, 28co Halane watsililile mu nganda ije vene ya Ule ya mu Mbambilone muje muvamukitilile, a simbu ije te ishe anga acili na kuyoya. 29Avilama wambatele Salai, co Nahole wambatele Mileka muna Halane, uje wapwile ishe ya Iseka. 30Oloni Salai wapwile mumba.

31Tela waile na munendi Avilama, na mutekulyendi Lote muna Halane, na vainamweno Salai munakazi wa Avilama, co watundile mu nganda ya Ule mu Mbambilone amo navo ngeci aye ku lifuti lya Kanana. Co vetele ku lifuti lya Halane nakutunga muje. 32Tela watsililile kuje omo wakele na myaka 205.

Livulu lya Shukulu Kalunga

©The Bible Society of Zambia, 2006 More Info | Version Index