Search form

Kushangumuka 13

Avilama na Lote valyangunuka

1Omo Avilama watundile mu Ingito, waile ku kunto ku lifuti lya Kanana mu mbwela amo na munakazi wendi, na vyuma vyoshe vije vyafukile, co waile amo na Lote. 2Avilama wapwile muka-kufuka manene, wafukile vimanga, na vimembe, na vingombe, amo na siliva na ngolinde. 3Asinoni watundile kuje, co waile nakujalozoka kutunda mu mbwela nakweta ku Mbetele. Co welukile ku mutambela uje wakele mukati ka Mbetele na Ayi kuje kwatungile cilombo cendi akulivanga, 4kuje kwatungilile mutula. Kukekwo kuje Avilama walemeselele Shukulu Kalunga.

5Lote waile amo na Avilama, na ikeye lalo wakele na vimanga, na vimembe, na vingombe, amo na naanga yendi na vangamba vendi. 6Omwo Avilama na Lote vakele na vimuna vavangi manene, co kuje ku mutambela kuvakele kukwakele mutambela wakama wakulila vimuna vavo, omwo voshe vakele na vufuko vwavungi ngeci kuvasele kukala amo. 7Kwakele kulizunga mukati ka tunyungi va vimuna va Avilama na tunyungi va vimuna va Lote. A simbu ije, vaKanana na vaPelezi anga vacikele mu lifuti lije.

8Avilama wendekele kuli Lote ngwendi, “Yetu tunapu tu vavushoko, vanu vove na vanu vange kuvapandele kulijokota. 9Ngecivene, tunapande kulyangunuka. Angula mutambela woshe wushaka ngeci uyeko, yange lalo njiya ku mutambela weka.”

10Lote wakengele ku mutambela wa Zowale, co wamwene Cana ca Yondau coshe cakele na mema amangi, cafwile ngwe Lihya lya Shukulu Kalunga nambe Ingito. Simbu eyi te Shukulu Kalunga kanda acinyongese vinganda vya Sondoma na Ngomola. 11Ngecivene, Lote walyangwilile Cana ca Yondau coshe, co wajalukilile mu ngangela. Omu mukemwo muvalyangunukilile va Avilama na Lote. 12Avilama wasalele mu lifuti lya Kanana, co Lote wakakele mukati ka vinganda vya mu cana, co watungile cilombo cendi muyehi na Sondoma. 13 Vanu va ku Sondoma vapwile vaka-vuvi, valingile vyuma vyavivi manene ku mesho a Shukulu Kalunga.

Avilama ajalukila ku Hevelone

14Munima yevi, omo Lote na Avilama vanalyangunuka laja, Shukulu Kalunga wendekele kuli Avilama ngwendi, “Kenga mwamuvwa ku mitambela yoshe. 15 Lifuti lyoshe eli ulinakumona, likapwa lyove na vatekulwila vove ku myaka yoshe. 16Njikakwana vatekulwila vavangi vaje naumo wai akasa kuvalava, kuvanga kuli uje asa kulava vinona vyoshe vya livu lya ano asi! 17Ngecivene, katuka, ya nakukenga lifuti lyoshe mu vulaja vwalyo na mu vwihi vwalyo, omwo lyoshe njikakwanalyo.” 18Ngecivene, Avilama wajalwisile cilombo cendi, co watungile kuyehi na miti yakujela ya oke yakuhwimina ya Mamele ku Hevelone, co kuje watungilile Shukulu Kalunga mutula.

Livulu lya Shukulu Kalunga

©The Bible Society of Zambia, 2006 More Info | Version Index