Search form

Kushangumuka 15

Cikumiiyo ca Njambi kuli Avilama

1Munima yevi, Shukulu Kalunga wendekele kuli Avilama mu cimona ngwendi, “Kesi uzive lyova Avilama. Yange nji ntelo* yove yakukuzikinina ku vushonde, co cikandelela cove cikapwa cakama manene.”

2Oloni Avilama wakumbulwile ngwendi, “Yove Shukulu Kalunga wa Akamwa ya Vyoshe, vuvwa mukajo cikapanga cikandelela cove kuli yange omwo yange kunjesi na vana? Elyazale wa ku Ndamasiku ikeye lika shwana yange.” 3Co Avilama wendekele lalo ngwendi, “Kenga, yove kuwanjanene vana, co umo wa vindungo vange ikeye akashwana vufuko vwange.”

4Co Shukulu Kalunga wamukumbulwile ngwendi, “Ou ndungo yove Elyazale kesi ikeye akashwana vufuko vwove embwe, oloni munove wove vavenya, ikeye akapwa shwana.” 5 Co Shukulu Kalunga wamutuwisile anja nakwendeka ngwendi, “Kenga kwilu, eseka kulava vingongonosi evi. Co vatekulwila vove vakapwa vavangi ngwe vingongonosi evi.”

6 Avilama wakulaelele kuli Shukulu Kalunga, co omwo a cuma eci, Shukulu Kalunga wamulaveleleco kupwa vushunga.

7Shukulu Kalunga wendekele kuli Avilama ngwendi, “Yange Kalunga, uje wakutundisile ku Ule ya mu Mbambilone nakukwana lifuti eli kupwa vushwana vwove.”

8Oloni Avilama wehwile ngwendi, “Yove Shukulu Kalunga wa Akamwa ya Vyoshe, njikazivuka vatijo ngwange lifuti eli likapwa lyange?”

9Co Shukulu Kalunga wamukumbulwile ngwendi, “Njinenele ngombe wa lwavo, na membe wa lwavo, na lijamba lya manga, vaje vali na myaka itatu, amo na katela na muna liyembe.” 10Ngecivene, Avilama wanenele vaje vimuna kuli Njambi, wavatetangele vipuka-vipuka, co waakele vije vipuka kwatesa ku cikwavo cimo na cimo mu mikana ivali. Oloni tuzila kavatetangele. 11Co makuvi vashelumukile a vipuka, oloni Avilama wavashekele.

12 Omo litangwa lyatokele, Avilama walalele manene, co wakele na lyova na cangasisi. 13 Shukulu Kalunga wendekele kuli ikeye ngwendi, “Vatekulwila vove vakapwa vangenzi mu lifuti lya vungenzi, co vakapwa vinzinda kuje, vakavayandesa na muuka a myaka 400. 14 Oloni njikahisa muyati uje ukavapwisa vinzinda, co omo vakaseza lije lifuti lya vungenzi, vakambata vufuko vwavungi nakuya navwo. 15Oloni yove ukakuluvala, ukatsa mu kwoloka, co vakakutsinda. 16Vatekulwila vove vakeluka muno ku cisemwa camuciwana, omwo kunjikasheke vaAmoli noo vuvi vwavo vunatumu ngeci vakatambule cihiso.”

17Omo litangwa lyatokele, lisusulungu lyezile, co kwasholokele ndeo yakele nakukakama vwisi, co mulangi wa tuya wetile mukati ka vipuka vya vaje vimuna. 18 A litangwa lije vene, Shukulu Kalunga walikumiiye cikumiiyo na Avilama ngwendi, “Njikulaesa kwana lifuti eli lyoshe ku vatekulwila vove, kutunda ku nginga ya Ingito nakweta ku Ndonga ya Yufuleti, 19amo na mafuti a vaKeni, na vaKenizi, na vaKandimoni, 20na vaHiti, na vaPelezi, na vaLefaime, 21na vaAmoli, na vaKanana, na vaNgilengashi, na vaNjevushi.”

Livulu lya Shukulu Kalunga

©The Bible Society of Zambia, 2006 More Info | Version Index