Search form

Kushangumuka 16

Hangale na Ishimela

1Salai munakazi wa Avilama, kakitile vana. Oloni wakele na ndungo yendi wa mumbanda wa kaIngito lizina lyendi Hangale. 2Ngecivene, Salai wendekele kuli Avilama ngwendi, “Yange Shukulu Kalunga nanjumina kukita vana. Njikulomba ngwange ulimone nou ndungo yange wa mumbanda, amo akanjikitilako mwana.” Co Avilama watavele vije vyendekele Salai. 3Ngecivene, Salai waanene Hangale ndungo yendi kuli Avilama ngeci apwe lishano lyendi lya mbanja. Eci calingiwile omo Avilama wakele mu lifuti lya Kanana myaka likumi. 4Avilama wakele amo na Hangale, co Hangale wakele na kafumba. Ngecivene, Hangale omo wamwene ngeci ali na kafumba, walyalesele nakushaula Salai.

5Co Salai wendekele kuli Avilama ngwendi, “Ou unapu mulonga wove ngeci Hangale alinakunjishaula. Yange vene njamwanene kuli yove, co kutunda aje alimwene ngeci ali na kafumba, ikeye alinakunjishaula. Shukulu Kalunga atusompe kuwana iya umo nalingi mwamuvwa, nove nange!”

6Avilama wamukumbulwile ngwendi, “Kenga, ikeye wapwa ndungo yove, ali mu mavoko ove, wasa kulinga coshe ciwushaka ali ikeye.” Ngecivene, Salai wapangesele Hangale na muuka manene ngeci Hangale watewele.

7Kangelo ka Shukulu Kalunga wawanene Hangale ku lisima mu mambo, ku tapalo ya ku Shule. 8Co kangelo wendekele ngwendi, “Hangale ndungo ya Salai, ulinakutunda kuli? Co lalo ulinakuya kuli?”

Hangale wamukumbulwile ngwendi, “Njili na kutewa ku mesho a shukulu yange Salai.”

9Co kangelo wendekele kuli Hangale ngwendi, “Iluka kuli shukulu yove Salai ukapwe u ndungo yendi vene.” 10Co kangelo ka Shukulu Kalunga wamulekele ngwendi, “Njikatumisa manene vatekulwila vove ngeci naumo wai akasa kuvalava. 11Ukakala na mwana wa munalume, ukamuluka lizina lyendi Ishimela, omwo Shukulu Kalunga nazivi tuyando twove. 12Oloni munove akayoya ngwe ngolo, ikeye akalizinda na vanu voshe, co na vakevo lalo vakamuzinda. Ikeye akakala kulyala na vavushoko vendi voshe.”

13Hangale walyendekesele ikeye vavenya ngwendi, “Mwa vushunga njinamono Njambi oku njiciyoya!” Ngecivene, Hangale watumbwile Shukulu Kalunga uje wendekele kuli ikeye ngwendi, “Ou napu Njambi Muka-kumona.” 14Omu mukemwo vanu vakatumbula lisima eli lyakala mukati ka Kandeshe na Mbelende ngwavo, “Lisima lya Muka-kuyoya Ou Muka-kunjimona.”

15 Hangale wakitile mwana wa munalume, wamulukile lizina lyendi Ishimela. 16A simbu ije Avilama te ali na myaka makumi atanu na atatu na myaka itanu na umo omo Hangale wakitile nendi mwana.

Livulu lya Shukulu Kalunga

©The Bible Society of Zambia, 2006 More Info | Version Index