Search form

Kushangumuka 20

Avilahama akwisa Ambimeleki

1Avilahama watundile ku Mamele, waile mu mbwela ya lifuti lya Kanana, co wakele mukati ka Kandeshe na Shule. Omo wakele mu Ngelale, 2 Avilahama walekele vanu voshe ali munakazi wendi Sala ngwendi, “Sala napu ndokazi yange.” Ngecivene, Mwene Ambimeleki wa ku Ngelale watumine vanu kukashaka Sala. 3Co ku vutsiki vuje vene, Njambi washolokele kuli Mwene Ambimeleki mu njozi nakwendeka ngwendi, “Utsa, omwo unambata munakazi wambala, ikeye washomboka laja.”

4Oloni Ambimeleki wendekele kuli Shukulu Kalunga ngwendi, “Shukulu, kesi unjitsiye! Kunjalingile cuma cimo nendi. 5Avilahama ikeye wendekele ngwendi Sala napu ndokazi yendi, co munakazi lalo wendekele ngwe muje mwendekele Avilahama.”

6Co Njambi wamukumbulwile mu njozi ngwendi, “Eyo, njazivuka ngeci yove kuwesi na mulonga. Mukemwo vene njakunyungile ngeci kesi ulinge cuma cimo na Sala. 7Oloni nameme ngoco, ilwisa munakazi kuli munalume wendi, omwo ikeye napu muka-kwimanena *, ikeye akakulombelela, co kuukatsi embwe. Oloni nga yove kuumwilwisa, njikuleka ngwange ukatsa, yove na vanu vove voshe.”

8Alikaki mutondo-tondo, Ambimeleki wasanene vamyata vendi voshe, wavalekele vije vyalingiwile, co valikomokelele manene. 9Asinoni Ambimeleki wasanene Avilahama nakumwihula ngwendi, “Vika walingi kuli yetu? Vuvi mukajo njalingi kuli yove mukunjikokela mulonga ou yange na vumwene vwange? Naumo wai napande kulinga evi viwunalingi kuli yange. 10Omwo vikajo unalingilamo ngacije?”

11Avilahama wamukumbulwile ngwendi, “Njalingile eci omwo njayongwele ngwange kumwesi kukomoka Njambi, co njayongwele lalo ngwange amo umo weni akanjitsiya nakwambata munakazi wange. 12Mwa vushunga vene ikeye napu ndokazi yange. Tatetu umolika, oloni vananetu veka, ngeci njamwambatele. 13Ngecivene, omo Njambi wanjitundisile ku njuvo ya tate nakuya mu lifuti lya vungenzi, njendekele kuli munakazi wange ngwange, ‘Yove wasa kumwesa kulongwa kwove kuli yange akwendeka kwoshe kutukaya ngwove yange njinapu nji ndolome yove.’ ” 14Asinoni Ambimeleki welwisile Sala kuli Avilahama, co a simbu ije vene, Ambimeleki waanene Avilahama vimanga, na vingombe, na vindungo. 15Co Ambimeleki wendekele kuli Avilahama ngwendi, “Kenga, eli lyoshe linapu lifuti lyange, wasa kutunga kwoshe kuushaka.” 16Ambimeleki wendekele lalo kuli Sala ngwendi, “Kenga, njinaana ndolome yove mavundungulu a siliva likulukazi kupwa vukaleo kuli voshe ava uli navo amo, omwo yove kuwesi na mulonga. Munu woshe akazivuke ngeci kuwalingile vuvi navumo vwai.”

17Asinoni Avilahama walombelele kuli Njambi, co Njambi wakangwisile Ambimeleki, washokolwele shivu ya munakazi wendi, na vindungo vendi va vanakazi, co vakitile vana. 18Eci calingiwile omwo Shukulu Kalunga washokele shivu ya vanakazi voshe vaje vakele mu lipela lya Ambimeleki, omwo ya vije vyalingiwile ali Sala munakazi wa Avilahama.

Livulu lya Shukulu Kalunga

©The Bible Society of Zambia, 2006 More Info | Version Index