Search form

Kushangumuka 21

Kusemuka kwa Isake

1Shukulu Kalunga wavezikisile Sala ngwe muje mwamukulaesele, 2 ngecivene, Sala wakele na kafumba, co wakitile mwana wa munalume omo Avilahama te nakuluvala laja. Mwana wasemukile vene a simbu ije yatumbwile Njambi, 3ngecivene, Avilahama wamulukile lizina lyendi Isake. 4 Omo Isake wakele na matangwa atanu na atatu, co Avilahama wamutuwile, ngwe muje mwamushikile Njambi. 5Avilahama wakele na myaka 100 omo Isake wasemukile. 6Sala wendekele ngwendi, “Njambi nanjinenela mbwase nakujolela. Vanu voshe vakaziva a cuma eci vakajolela amo nange.” 7Co Sala wendekele lalo ngwendi, “Iyajo wayongwele ngeci Sala akakala na mwana kuli Avilahama? Kuma njinakiti nendi mwana wa munalume mu vukulukazi vwendi.”

8Mwana wakulile, co omo wetele a litangwa lije washumukile, Avilahama walingile ciwano cakama.

Vasheka Hangale na Ishimela

9Litangwa limo Ishimela, muna Avilahama, uje yakitile na Hangale kaIngito, wakele nakweha na Isake muna Sala. 10 Ngecivene, omo Sala wavamwene, co wendekele kuli Avilahama ngwendi, “Sheka ou ndungo wa munakazi na munendi. Mwana wou munakazi kapandele kushwana vufuko vwove, vuje vwakashwana munange Isake.” 11Cuma eci cayandesele Avilahama manene, omwo Ishimela nendi lalo wapwile munendi. 12 Oloni Njambi wendekele kuli Avilahama ngwendi, “Kesi ulinyenge ali Ishimela na ali ndungo yove Hangale. Linga omu mwanakuleka Sala, omwo muli Isake mukemwo ukawanenamo vatekulwila vaje njinakukulaesa. 13Co njikana lalo vana vavangi kuli muna ndungo yove wa munakazi, omwo nendi lalo napu munove, ngecivene, njikapwisa vatekulwila vendi muyati wakama.”

14Alikaki mutondo-tondo, Avilahama waanene Hangale vyakulya na njeke ya cilambu yakushula ya mema. Wamutwikilevyo a mutwe, co wamwakele mwana ku mwongo, wamushuwile. Ngecivene, Hangale waile nakuyevangela mu mambo ya Mbeleshemba. 15Omo mema oshe ahwile, co Hangale wasezele munendi mwisi ya liputa, 16watumbamene asi alyala kamandondo ngwe nunda ya mamita 100. Walyendekesele mu mbunge yendi ngwendi, “Kunjapandele kumona atsila munange.” Omo watumbamene kuje, co washangumukile kulila.

17Njambi wazivile kulila kwa mwana, co kangelo ka Njambi oku ali mwilu watambekele kuli Hangale ngwendi, “Hangale, vika ulinyenga? Kesi uzive lyova. Njambi nazivi kulila kwa munove. 18Katuka ukamushake nakumuzembeleka, omwo njikapwisa vatekulwila vendi muyati wakama.” 19Asinoni Njambi watonesele mesho a Hangale, co Hangale wamwene lisima lya mema. Waile ku lisima, co washulisile ije njeke ya cilambu na mema, co waaneneko amo munendi. 20Njambi wanyungile Ishimela, co omo wakolele wakele mu mambo ya Palane, ikeye wapwile ciyambi wakama. 21Vaina vamwambatelele munakazi wa kaIngito.

Lizivasano akati ka Avilahama na Ambimeleki

22 A simbu ije Ambimeleki na Fikole muka-kushika mbunga ya mashwalale vendi vaile kuli Avilahama, vendekele kuli ikeye ngwavo, “Njambi ali nove mu vyuma vyoshe vije ulinakulinga. 23Ngecivene, lisinge ano vene ku mesho a Njambi ngeci kesi ukanjikwise, nambe kukwisa vana vange, nambe vatekulwila vange. Omwo yange njakulingi mwamuvwa, ngeci nove lalo unapande kunjikulaesa ngwove ukanjilinga mwamuvwa mu lifuti lino muulinakukala.”

24Avilahama wakumbulwile ngwendi, “Njalisingi.”

25Asinoni Avilahama walinyengelele kuli Ambimeleki omwo ya lisima lije vambatele vangamba va Ambimeleki. 26Co Ambimeleki wendekele ngwendi, “Kunjizivuka ou nalingi cuma eci, omwo yove kuwanjilekele, kuvanga lelo vene asinoni njivizive.” 27Ngecivene, Avilahama waanene vimanga na vingombe kuli Ambimeleki, co muvuvali vwavo valikumiiye cikumiiyo. 28Asinoni Avilahama watepesele vimanga va lwavo vatanu na vavali mu vutanga vwendi, 29co Ambimeleki wamwihwile ngwendi, “Omwo vikajo walingila ngeci?”

30Co Avilahama wamukumbulwile ngwendi, “Unapande kutambula vimanga ava vatanu na vavali, nga uvatambula, co vapwa vukaleo vwange, ngeci yove unatava ngwove yange vene Avilahama njendile lisima eli.” 31Mukemwo mutambela uje vautumbwile Mbeleshemba, omwo akeo aje uvalisingilile va Avilahama na Ambimeleki.

32Omo vamanesele kulikumiiya cikumiiyo ku Mbeleshemba, Ambimeleki na Fikole velukile ku lifuti lya Filisitiya. 33Avilahama wakunine muti wa tamalisiki mu Mbeleshemba, co walemesele Shukulu Kalunga Njambi wa ku myaka yoshe. 34Co Avilahama wakele mu lifuti lya Filisitiya simbu yakama.

Livulu lya Shukulu Kalunga

©The Bible Society of Zambia, 2006 More Info | Version Index