Search form

Kushangumuka 23

Avilahama alanda livu lyakutsinda Sala

1Sala wayoyele myaka 127. 2Co watsililile mu Hevelone mu lifuti lya Kanana, ngeci Avilahama walinyengele nakulila manene a kutsa kwa Sala.

3Avilahama wakatukile wasezele civimbi ca munakazi wendi, waile kuli vaHiti, wendekele ngwendi, 4 “Yange njinapu muka-kwija, njilinakukala kuno akati keni, njilandeseniko mutambela umo ngeci njikatsindeko munakazi wange.”

5VaHiti vamukumbulwile ngwavo, 6“Tutolilileni mwane. Yove unapu u ntwama wakama akati ketu, tsinda munakazi wove mu mbumbo yaivwa manene eyi tulinayo. Naumo wai asa kuvindika mbumbo ngeci kesi utsindemo munakazi wove.”

7Avilahama watsikamene nakukandelela ku mesho a vaHiti. 8Co wendekele kuli vakevo ngwendi, “Nga munatava ngweni njitsinde munakazi wange kuno, njilombeleniko kuli Efelone muna Zohale 9ngeci anjilandeseko Linzenzengoma lya Makepela, lije lili ku shongo ya lihya lyendi. Mulombeni ngeci anjilandeselyo na ndando ije inapumo, ano vene ku mesho eni, ngeci yange njase kuupwisa mutambela wa vimbumbo vene.”

10Efelone nendi vene watumbamene amo na vakwavo vaHiti mu cikungulukilo ku mutambela wa cikolo ca nganda, na vanu voshe vazivileko omo wakumbulwile ngwendi, 11“Embwe mwane, njitolilileni! Njikakwana lihya lyoshe na linzenzengoma lyamwo lyoshe. Njikakwanavyo, ano vene ku mesho a vavushoko vwange, ngeci wase kutsindamo munakazi wove.”

12Avilahama watsikamene lalo ku mesho a vaHiti 13wendekele kuli Efelone ngeci munu woshe ase kulizivila ikeye vavenya ngwendi, “Njimilomba, ngeci munjitolilile vakwetu. Njilanda lihya eli lyoshe. Tambuleni ndando yange ngeci njitsinde munakazi wange kuno.”

14Efelone wamukumbulwile ngwendi, 15“Shukulu, njitolilileni, livu eli linapu mu vimbongo vyakupwa 400 vya mavundungulu a siliva, co evi vinapu cuma mukajo akati ketu? Tsindamo lika munakazi wove.” 16Avilahama watavele, co wafwetele ndando ije yatumbwile Efelone, na vaHiti vazivileko. Yapwile mu vimbongo vyakupwa 400 vya mavundungulu a siliva, ngwe ku seteko ije vakele nakweseka nayo vaka-kulandesa.

17Omu mukemwo mwatambwilile Avilahama vufuko vuje vwakundamene kuli Efelone ku Makepela mu ngangela ku Mamele, kupwa vufuko vwendi. Amo na lihya na linzenzengoma lije lyakelemo, na miti yoshe ya mu lihya kweta na ku shongo ya mutambela woshe. 18VaHiti voshe vaje vakele kuje ku cikungulukilo vazivukile ngeci mutambela woshe ololo unapu wa Avilahama.

19Ngecivene, Avilahama watsindile munakazi wendi Sala mu lizenzengoma lije lya mu lifuti lya Kanana. 20Co lije lihya na linzenzengoma lije lyakelemo, vaHiti vavilandesele kuli Avilahama kupwa vimbumbo.

Livulu lya Shukulu Kalunga

©The Bible Society of Zambia, 2006 More Info | Version Index