Search form

Kushangumuka 29

Yakomba eta kwimbo lya Lambani

1Asinoni Yakomba waile vungenzi vwendi, ku lifuti lya mu ngangela. 2Aje vene wetele a lisima ku cana kuje kwakele matanga atatu a vimanga vavutamene kumukulo. Co aje matanga akele nakunwanwanwa mu lisima lije vene livafwikile limanya lyakama. 3Omo matanga oshe analikungulwila amolika, co tunyungi vandumuna limanya nakunwisa matanga avo. Asina lalo velwisilako limanya omo vananu laja mema.

4Yakomba wehwile tunyungi ngwendi, “Eni vandolome vange, mutunda kuli?”

Vamukumbulwile ngwavo, “Tutunda ku Halane.”

5Co wavehwile ngwendi, “Muzivuka Lambani muna Nahole ndi?”

Vamukumbulwile ngwavo, “Eyo, tumuzivuka.”

6Co Yakomba wavehwile lalo ngwendi, “Ikeye nenduka mwamuvwa ndi?”

Vamukumbulwile ngwavo, “Eyo nenduka mwamuvwa, kenga, na munendi Lakele uje alinakwija na vutanga vwendi vwa vimanga.”

7Yakomba wendekele kuli tunyungi ngwendi, “Kengeni litangwa kulicili, simbu yakukungulula vimanga kanda icete, omo vika kumuvanwisa mema ngeci veluke mukulya lalo?”

8Co tunyungi vamukumbulwile ngwavo, “Kutwasa kuvanga noo matanga oshe anakungulukila amo kuno, co twandumuna limanya ku lisima, asinoni tunwisa vimanga mema.”

9Omo Yakomba wakele nakwendeka navo, co Lakele wetele amo na vimanga va ishe vaje vanyungile. 10Omo Yakomba wamwene Lakele amo na vutanga vwa vimanga va inanu Lambani, washwenyele ku lisima, wandumwine limanya nakunwisa vimanga. 11Asinoni watsembele Lakele, co washangumukile kulila omwo wavwaelelele. 12Wamulekele ngwendi, “Yange nji mwehwa wa isho, nji muna Lembeka.”

Co Lakele washatukile nakukaleka ishe. 13Omo Lambani wazivile muzimbu wa ali mwehwendi Yakomba, co washatukile lumbisi nakumushesha, wamuvumbatelele nakumutsemba, wamutwalele ku njuvo. Cooni Yakomba watangelele Lambani muzimbu wa vyuma vyoshe vije vyalingiwile, 14co Lambani wamukumbulwile ngwendi, “Eyo, mwa vushunga vene yove unapu u mwehwange, maninga ange vene.” Ngeci Yakomba wakele kuje ngonde yoshe yamutunu.

Yakomba apangela Lakele na Leya kuli Lambani

15Lambani wendekele kuli Yakomba ngwendi, “Kesi unjipangele ngoco omwo u kavushoko kange embwe. Njikufweta vika?” 16Lambani wakele na vana vendi vavali va vanakazi, lizina lya mukulunu lyapwile Leya, na lizina lya shongo lyapwile Lakele. 17Leya wakele na mesho akutsitsivala, oloni Lakele akumukenga wapwile wamuvwa manene.

18Yakomba wazemene Lakele, co wendekele kuli Lambani ngwendi, “Njikamipangela myaka itanu na ivali nga munjitava kwambata Lakele.”

19Lambani wamukumbulwile ngwendi, “Mwamuvwa kumwambata yove kutuvakana kumwambata kuli munalume weka. Ngecivene, kala kuno ngeci unjipangele.” 20Yakomba wapangelele Lambani myaka itanu na ivali ngeci ambate Lakele, oloni simbu ije yasholokele ngwe matangwa amandondo lika kuli ikeye, omwo Yakomba wazemene Lakele manene.

21Asinoni Yakomba wendekele kuli Lambani ngwendi, “Njaneni oni munakazi wange njambate, omwo matangwa anapumo.” 22Co Lambani walingile ciwano cakama ca vulo, walanyele vanu vavangi va mu mutambela uje. 23Oloni vutsiki vuje watwalele Leya kuli Yakomba, co Yakomba walimwene nendi. 24Lambani waanene ndungo yendi wa mumbanda Zilipa kuli munendi Leya kupwa mukwasi wendi. 25Alikaki mutondo Yakomba wanangukile ngeci kuma vanamwana Leya. Ngecivene, waile kuli Lambani nakwendeka ngwendi, “Vikajo wanjilingila ngeci? Yange njapangelele Lakele. Omwo vikajo unanjikwisila?”

26Lambani wamukumbulwile ngwendi, “Capwa cilika cetu kushombwesa akulivanga mwana wa mukulunu kesi wa shongo embwe. 27Vandamena tai simano ya vushombolwa icihwe, asinoni njikakwana lalo Lakele. Nga umushaka, co ukapanga lalo myaka itanu na ivali.”

28Yakomba watavele, co omo ciwano ca vushombolwa cahwile, Lambani waanene munendi Lakele kuli Yakomba kupwa munakazi wendi lalo. 29Lambani waanene ndungo yendi wa mumbanda Mbileha kuli munendi Lakele kupwa mukwasi wendi. 30Ngecivene, Yakomba wakele amo na Lakele, co wamuzemene manene kutuvakana Leya. Asinoni wapangelele lalo Lambani myaka ikwavo itanu na ivali.

Vana va Yakomba

31Shukulu Kalunga wamwene ngeci Yakomba wazemene manene Lakele kutuvakana Leya, co washokolwele shivu ya Leya ngeci akale na vana, oloni Lakele wapwile mumba. 32Leya wakele na kafumba, wakitile mwana wa munalume. Wendekele ngwendi, “Shukulu Kalunga natundisa vusiwa vwange, cooni munalume wange akanjizema manene kutuvakana Lakele.” Ngecivene, wamulukile lizina lyendi Luvena. 33Co Leya wakele lalo na kafumba, wakitile mwana wa munalume mukwavo. Wendekele ngwendi, “Shukulu Kalunga nanjana lalo mwana wa munalume omwo nazivi ngeci munalume wange kanjizemene.” Ngecivene, wamulukile lizina lyendi Simyoni. 34Co Leya wakele lalo na kafumba, wakitile mwana wa munalume mukwavo. Wendekele ngwendi, “Ololo munalume wange akalikuta amo nange omwo njinamukitila vana va vanalume vatatu.” Ngecivene, wamulukile lizina lyendi Levi. 35Co wakele lalo na kafumba, wakitile mwana wa munalume mukwavo. Wendekele ngwendi, “Njikashangazala Shukulu Kalunga. Ngecivene, wamulukile lizina lyendi Yunda.” Co walikelele kukita.

Livulu lya Shukulu Kalunga

©The Bible Society of Zambia, 2006 More Info | Version Index