Search form

Kushangumuka 8

Kuhwa kwa livazi

1Oloni Njambi wanukile Nowa na tusitu voshe na vimuna voshe vaje vakele amo nendi mu vwato, co Njambi wauwisile lihunzi asi, mema ashangumukile kuuvuluka. 2Co tuvwelu-vwelu twa mema a mwisi ya asi na vimbengwa vya mwilu vyashokele, na nyonzi yalikelele kunyoka, 3co mema ashangumukile kuuvuluka. Omo kwetile matangwa 150 mema ovulukile. 4A litangwa lyamulikumi na atanu na avali ku ngonde yamucitanu na vivali, vwato vwafungamene a munkinda umo wa minkinda ya ku Alalate. 5Co mema akele nakuuvuluka, a litangwa lyakulivanga ku ngonde yamulikumi, vishongo vya minkinda vyasholokele.

6Omo kwetile matangwa makumi awana, Nowa washokolwele njanena ya vwato, 7co watumine likololo, oloni kelukile, wakele nakupulula lika noku-noku noo mema omine oshe cau. 8A simbu ije vene, Nowa watumine katela ngeci akamone nga mema anomu cau. 9Oloni uje katela kasele kuwana akutongama omwo mema kuwomine asi oshe, ngeci uje katela welukile ku vwato, co Nowa wamukwatele nakumukovelesa mu vwato. 10Nowa wetisilemo lalo matangwa atanu na avali, asinoni watumine lalo katela asi. 11Co ku cingwezi katela welukile kuli Nowa na liputa lyakutonola lya olive ku kanwa kendi. Ngecivene, Nowa wazivukile ngwendi mema ololo anomu asi. 12Co Nowa wetisilemo matangwa atanu na avali, co watumineo lalo uje katela. A simbu ije katela kelukile lalo kuli Nowa.

13A litangwa lyakulivanga ku ngonde yakulivanga, omo Nowa wakele na myaka 601, wafukwile ciluli cije cafwikile a vwato, co wakengele noku-noku, wamwene ngeci livu linomu. 14A litangwa lyamumakumi avali na matangwa atanu na avali ku ngonde yamucivali asi omine oshe cau.

15Njambi wendekele kuli Nowa ngwendi, 16“Tuuka mu vwato na munakazi wove, na vana vove, na vanakazi vavo. 17Tuwisa tuzila voshe na tusitu voshe na vimuna voshe na vyoshe vyakulikoka asi, ngeci vakaseme nakutuma, nakushulisa ano asi oshe.” 18Co Nowa watuukile mu vwato amo na munakazi wendi, na vana vendi, na vanakazi vavo. 19Tusitu voshe na tuzila vatuukile mu vwato mu muyati wa vutanga vwavo.

Nowa akombelela n̄ombelo kuli Shukulu Kalunga

20Ngecivene, Nowa watungilile Shukulu Kalunga mutula, co wakwatele ku muyati umo na umo wa vimuna na tuzila vakulya, wavakombelelele kupwa n̄ombelo ya kwenyeka kuli Shukulu Kalunga. 21Co omo Shukulu Kalunga wazivile vweko vwavuvwa vwa n̄ombelo eyi, wazivile kuvwaa, walyendekesele ikeye vavenya ngwendi, “Kunjikelukilamo lalo kusinga asi a vilinga vya vanu, omo njazivuka ngwange kutunda ku vwanike vwavo viyongola vya vimbunge vyavo vyapwa vyavivi. Kunjikelukilamo lalo kunyongesa vyakuyoya vyoshe ngwe omu njinalingi a simbu eyi. 22Omo kaye kaciliko, kukakala simbu ya kukuna na simbu ya kuteja. Co simbu yoshe kukakala kutonola na ntwima, ndombo na cisika, mutanya na vutsiki.”

Livulu lya Shukulu Kalunga

©The Bible Society of Zambia, 2006 More Info | Version Index