Search form

Luk 20

Wamp Mbʉ Ndi Jisas Waldʉk Nim Ronduⱡ Ei Nam Ndi Ngurum Nʉtʉng

1Wote ui ti kʉn, Jisas ndi, manga wingti ou nila, wamp mbʉ ik mbo endpa, Rʉnang lk Kai mbʉ nga ik puⱡ mbʉ, nimba ngumba murum. Ni kʉn, wu pris kuimbal mat kʉn, mi ik mbo wu na, manga wingti rʉp wu mat kunda, Jisas murum nila orung. 2Wote, wu mat ndi, Jisas kundʉk, nʉk mel, “Nim ronduⱡ nant ei nga, tek molkʉn uⱡ mbʉ en? Nam ndi, nim ronduⱡ ngʉⱡnga, uⱡ mbʉ en ei, tʉn kundkʉn nin ka!” nʉtʉng. 3-4Wote Jisas ndi, ik nʉtʉng ni, punt ropa nimba mel, “Na ndi, enim ik ti waldʉp nʉnt ei, na kundʉk nʉi! Unt Jon ndi, wamp nu tinditim uⱡ ei, Got nga muⱡ ila uⱡ ei, muna mʉi kona wamp nga uⱡ ei nda?” nitim. 5Wote, wu nimbʉ ndi, en enim ik palk nʉk mel, “Tʉn ndi, Got nga muⱡ kona uⱡ ei, nimʉn ndam, wote Jisas ndi, tʉn kundpa, nimba mel, ‘Enim nambuⱡ emel, Jon nga ik ei, mondʉk pili napʉtmʉn nimba.’ 6Wote tʉn ndi, ‘Mʉi kona wamp nga uⱡ ti nimʉn ndam,’ wamp mbʉ ndi pora, ik ei pilik kʉn, tʉn ku ndi ruing. Nambuⱡ emel, wamp mbʉ ndi, Jon ei, painui wu ti nʉk pʉtmʉn,’” nʉtʉng. 7Uⱡ ei nga pilik kʉn, Jisas nga nitim ik ni, punt rok nʉk mel, “Jon wamp nu tinditim uⱡ ei, kona nant orunga kandpa titim ei, tʉn pili napʉtmʉn,” nʉtʉng. 8Wote Jisas ndi, wu nimbʉ, kundpa nimba mel, “Enim ninmin uⱡ ei mel ku, na nga ronduⱡ tep moⱡʉp, kongun etʉp et uⱡ mbʉ, enim kundʉp ni nʉnimp mon ku!” nitim.

Wain Pana Rʉp Wu Kit Mat Nga Ik Ek

9Wote Jisas ndi, ik ek ti ropa, wamp mbʉ, kundpa nimba mel, “Wu ti ndi, nde wain pana ti raⱡpa pendpa kʉn, wu mat ndi, kongun etʉk ku moni tʉk, elim nga mat tʉndʉk, teing nimba ngumba pendpa, mang kona ila wak ropa, kona elpa tila mba, ui ruⱡ etpa murum. 10Wote, wain mong ranggʉk ting ui ei kʉn, elim nga wain pana ila, elim wain mong mat ranggʉk ngeing nimba kongun wu ti, tʉpa mundrum. Wote, wain pana ila morung wu nimbʉ ndi, kongun wu ni, tʉmbʉⱡ rok, pep rorung ila wu ni, kelpa wei yant urum. 11Wote, elim nga kongun wu ti, ku tʉpa mundrum ila urum. Wu ni, i ku etʉk rok, kit mondʉk, makrʉk mundrʉng ila, kelpa wei yant urum. 12Wote, elim nga kongun wu ti, ku tʉpa mundrum ila urum. Wu ni, rok kit mondʉk, tʉk ekit kundrung. 13Wote, wain pana puⱡ wu ni ndi, elim nimba mel, ‘Akup na nambuⱡ ti, itimp nda? Na nga kang wu numan ngur ei mint, tʉp mundamba kʉn, wu ei nga nim ik ei, tʉk ou nduk, kum tek piling nʉmp pʉnt!’ nitim. 14Wote, wain pana rʉp etʉng wu nimbʉ ndi, kandrʉng mel, kangʉm wu ni urum ila, en enim ik mat nʉk mel, ‘Wain pana ei, kang wu ei ndi moⱡpa, wote tʉmba uⱡ ei mon. Tʉn ndi, wu ei rop kondpʉn, wain pana ei tʉndʉn ndi, rʉp itʉmin,’ nʉtʉng. 15-16Wote, wu nimbʉ ndi, kang wu ni, wain pana nila rok, tʉk ekit nduk, wote rok kondrung. Wote, wain pana puⱡ wu ei ndi, wu mbʉ kʉn, namba uⱡ ti etmba nda, nimba? Jisas ndi, wamp morung mbʉ, waldpa nimba mel, “Puⱡ wu ei ndi, wain pana rʉp wu mbʉ, ropa kondpa kʉn, wote wain pana mbʉ tʉpa, wu mat elpa rʉp iteing nimba ngumba,” nitim. Wamp nimbʉ ndi, Jisas nga nitim ik ni, pilik nʉk mel, “Uⱡ ei mel kapⱡa iti natʉmba!” nʉtʉng. 17Wote Jisas ndi, wamp nimbʉ, kandpa kʉn, nimba mel, “Enim mon nʉng ndam, wote Got nga Buk Wingti ila ik morum kʉⱡ nga puⱡ ei, etʉk ning mel nant?

‘Manga rʉki wamp mbʉ ndi, nde ti, kit nʉk, wak rok mundʉk, ketʉng nde ni ndi, akup manga ei, ambuⱡpa ronduⱡ mundpa morum,’ nʉtʉm.

18Wote, wamp nam ti, ku pol ila tʉpa kawa ndupa, rom ndam, wamp ei, ondpa kel kel etmba. Wote ku ei ndi, mana omba wamp ti, rom ndam, wamp ei ropa, nem nem ndupa tʉmba,” nitim. 19Wote, mi ik mbo wu na, wu pris na mbʉ molk pʉtʉng mel, Jisas ndi, ik ek ropa nitim ei, en enim kundpa nitim. Nambuⱡ emel, enim pilik kʉn, Jisas tʉpʉn imp muⱡmin nʉk pʉtʉng. Ni wote, wamp mbʉ nga mundmong endʉtʉng.

Ku Moni Takis Ngurmin Uⱡ Ei Nga Jisas Waldʉtʉng

20Ni kʉn, Jisas nga itim uⱡ mbʉ, tʉk kongundʉk rʉp etʉk kʉn, wu mat kandʉk tʉk, Jisas nga itim uⱡ mbʉ, tʉk mundeing nʉk tʉk mundrʉng. Wu kit mbʉ ndi, kun kai ralk molk kʉn, Jisas ik mat nimba ⱡawa tangga, imp moⱡpʉn wu gapman kuimbal ei nga, kot endangga nʉk etʉng. 21Wote, wu nimbʉ ndi, Jisas ni, waldʉk nʉk mel, “Ik mbo wu ye! Tʉn ndi, pʉnmʉn ei, nim ndi, wamp mbʉ ik kun kai mat mint kundkʉn ni, kun en. Wote nim ndi, wamp nuim mbʉ nga mundmong indi nandʉn, mon. Nim ndi, Got nga ik kupa petʉm mbʉ mel, wamp ik mbo endʉn. 22Akup nim ndi, namba nʉkʉn pʉn? Tʉn ndi, wu nuim mumuk Sisa ku moni takis nguimin uⱡ ei, kapⱡa muna mon, nda?” nʉtʉng. 23-24Wote, wu mbʉ nga kol rok nʉtʉng ik ni, Jisas ndi, pilpa pora ndupa kʉn, nimba mel, “Ku moni ti na, tʉk ora ndʉi! Wamp kuimp keta ti kʉn, mbi kʉn morum ei, wamp nam nga nda?” nitim. Ni kʉn, wamp mbʉ ndi, ik punt rok, nʉk mel, “Wu nuim mumuk Sisa nga kuimp keta morum,” nʉtʉng. 25Wote Jisas ndi, wamp mbʉ, kundpa nimba mel, “Enim ndi, Sisa nga mel mbʉ kandʉk kʉn, Sisa ngʉk, wote Got nga mel mbʉ kandʉk, Got ngʉk itʉi!” nitim. 26Jisas nga punt ropa nitim ik ni ndi, wu mbʉ nga numan orunga roⱡnga, wamp morung ni kʉⱡ ndi, Jisas imp muⱡing ei nga, uⱡ ⱡawa ti kandʉk, ti natʉk kʉn, ik ti ni nandʉtʉng.

Wamp Kolk Tikil Rormʉn Uⱡ Ei nga Jisas Waldʉtʉng

27Wote, Sarusi wu rʉⱡaip mat, Jisas murum kona nila orung. (Wu mbʉ ndi, wamp korung nimbʉ, ⱡoprʉk yant ui nʉwing, nʉtmʉn.) 28Wu nimbʉ ndi, Jisas waldʉk, nʉk mel, “Ik mbo wu ye! Moses nga mi ik ila ik ti, mon ropa pinditim ei ndi, nimba mel, ‘Wu ti ndi, amp tʉpa mondpa, kangambuⱡa mi naimbʉpa kuⱡangga kʉn, wote ʉngʉn wu ti ndi, amp wiya ei, tʉpa ʉngʉn nga koⱡ ila kangambuⱡa mendʉmba,’ nʉtʉm. 29-31Kona tilinga, wu ʉngʉnʉl 7 kat morung. Wu komun ei ndi, amp titim. Amp ei, kangambuⱡa mi naimbʉpa, kurum. Wote, wu ʉngʉn ti ndi, amp wiya ei, tʉpa kʉn, kangambuⱡa mi naimbʉpa, kurum. Wote, wu ʉngʉn merʉng orunga ti ndi, i etpa amp ei titim. Wote, wu ʉngʉnʉl 7 kʉⱡ ndi pora, amp ei, tʉk kapⱡa endʉk kʉn, kangambuⱡa mi naimbʉk kolk pora ndurʉng. 32Wote, akil tepa, amp wiya ni, kurum ku. 33Wu 7 kʉⱡ ndi, amp ei, tʉk mek andrʉng. Ei nga wote, wamp korung mbʉ, ⱡoprʉk kont moⱡʉng ui ei kʉn, amp ei, wu nam nga moⱡmba nda?” nʉtʉng.

34Wote Jisas ndi, wu nimbʉ, kundpa nimba mel, “Akup nga ui ila wamp kont molk kʉn, wu amp nʉk mormin. 35Wamp korung mbʉ nga mat, Got ndi, muⱡ kona teing nimba pitim mbʉ, wote ⱡoporpa kont mondum ei kʉn, wu amp mel rʉp rok, muⱡi nʉmbʉⱡing mon. 36Got ndi, wamp on kona mbila, ropa rut ndangga kʉn, anggelo ralk, Got nga kangambuⱡa mel mbʉ muⱡing. Wote aldpa, kuⱡi nʉⱡing, mon. 37Wamp kui mbʉ, ⱡoprʉk kont muⱡing uⱡ ei nga, Moses ndi, tʉn kʉn nimba pora ndurum. Nde waⱡ kat ndip nurum ila, ik timan unt nga kʉⱡ nga, Moses ndi, nimba mel, ‘Wu Nuim ei, Eiparam, Aisak, Jekop na kʉⱡ nga Got ei!’ 38Wamp mbʉ pora, Got elim nga kuimp keta ila kont mint muⱡing. Uⱡ ei nga, Got ei, wamp kui mbʉ nga Got ti, mon!” nitim. 39-40Wote, Jisas nga ik nitim nimbʉ, mi ik mbo wu mat ndi, punt rok, nʉk mel, “Ik mbo wu ye! Nim ik kai mat punt ron ei ka!” nʉtʉng. Wote wu nimbʉ ndi, Jisas murum nila mundmong endʉk, ik mat waldʉk ni nandʉtʉng.

Kraist Ei Wu Nam Nga Kangʉm?

41Wote Jisas ndi, Perisi wu mbʉ, kundpa nimba mel, “Nambuⱡ emel, wamp mbʉ ndi, Got nga ngurum wu Kraist ei kundʉk, Depit kangʉm nʉtmin nda? 42Buk Sam ila, Depit elim ndi, nimba mel,

‘Oⱡa Nuim ei ndi, Na nga Nuim ei kundpa, Na nga ki mbo orunga okʉn muⱡana, 43Na ndi, nim nga el puⱡa wamp mbʉ, tʉp nim nga kʉmp mundin ei nga, nde pol mel indimp,’ nitim.

44Depit elim ndi, Kraist nga nindpa kʉn, elim nga Wu Nuim ei nitim. Ei nambuⱡ emel, wamp mbʉ ndi, aldpa Kraist kundʉk, Depit kangʉm nʉtmin nda?” nitim.

Mi Ik Mbo Wu Mbʉ Nga Uⱡ Etʉng Mbʉ Mel

45-46Wamp mbʉ ndi, Jisas ik nitim nimbʉ, pilik moⱡʉngina, Jisas ndi, elim nga kitip kʉni wu ni kʉⱡ, kundpa nimba mel, “Enim ndi, mi ik mbo wu mbʉ nga pilik, tʉk mendʉk muⱡʉi! Wu mbʉ ndi, wal pʉki roⱡ mbʉ mint, numan ngʉk pakʉk andʉk kʉn, wamp mou rok molk etmin kona mbila, en enim tʉk ou nduk, rawe etʉk, numan ning ngʉk pilik etmin. Wote, atinga manga kel mbila puk, nde pol kuimbal mbila, wamp kʉnangina mint muⱡmin nʉk pilik numan ngʉk etmin. Wote, wamp rʉng nok etmin mbila puk, nde pol kuimbal molk etmin. 47Wote, amp wiya mbʉ tʉk, wʉlʉ mundʉk kʉn, kng mel mbʉ kindʉp nok tʉk, atinga ruⱡ wei mat, ik kol rok rormin ku. Got nga wamp kʉmp tʉmba ui ila, wu mbʉ, mbun mindil mam mat ting,” nitim.

Got Nga Nambuⱡa Ik Kai

© 1995, Wycliffe Bible Translators, Inc. All rights reserved. More Info | Version Index