Search form

Јован 14

ГЛАВА 14

(Зачало 47)

1Да не се плаши+ срцето ваше; верувајте во Бога и во Мене верувајте.

2Во домот на Мојот Отец има многу места за живеење. А да немаше, Јас ќе ви кажев. Одам да подготвам место.

3И кога ќе отидам и ќе ви подготвам место, пак ќе дојдам.

4А каде одам Јас знаете, и патот го знаете.

5Тома Му рече: – Господи, не знаеме каде одиш; и како можеме патот да го знаеме?

6Исус му рече: – Јас сум патот, вистината и животот; никој не доаѓа при Отецот, освен преку Мене.

7Ако бевте Ме познавале, ќе Го познававте и Мојот Отец. И отсега Го познавате, и сте Го виделе.

8Филип Му рече: – Господи, покажи ни Го Отецот, и доста ни е!

9Му рече Исус: – Толку време сум со вас, и не си Ме познал ли, Филипе? Кој Ме видел Мене, Го видел Отецот, и како ти велиш: покажи ни Го Отецот?

10Не верувш ли дека Јас сум во Отецот, и дека Отецот е во Мене?

(Зачало 48)

Зборовите што ви+ ги зборувам, од Себе не ги зборувам; а Отецот, Кој е секогаш во Мене, Он ги врши делата.

11Верувајте Ми, дека Јас сум во Отца и Отецот е во Мене.

Крај на петокот

Ако ли, пак, не, тогаш верувајте во Мене, заради делата.

12Вистина, вистина ви велам: кој верува во Мене, делата што ги правам Јас и тој ќе ги прави, и поголеми од нив ќе направи; оти Јас си одам при Својот Отец;

13и што и да посакате од Отецот во Мое име, тоа ќе го направам, за да се прослави Отецот во Синот.

14Ако посакате нешто во Мое име, Јас ќе го направам.

15Ако Ме љубите, пазете ги Моите заповеди.

16Јас ќе Го помолам Отецот, и ќе ви даде друг Утешител, за да биде со вас довека,

17Духот на вистината, Кого светот не може да Го прими, оти не Го виде, ниту Го познава; а вие Го познавате, зашто во вас е и во вас ќе биде.

18Нема да ве оставам сираци; ќе дојдам при вас.

19Уште малку и светот веќе нема да Ме гледа; а вие ќе Ме гледате, зашто Јас живеам, и вие ќе живеете.

20Во оној ден вие ќе разберете, дека Јас сум во Мојот Отец и вие сте во Мене, и Јас сум во вас.

21Кој ги има+ заповедите Мои и ги пази, тој е оној што Ме љуби; а кој Ме љуби Мене, возљубен ќе биде од Мојот Отец; и Јас ќе го возљубам, и Самиот ќе му се јавам.

Крај на саботата

22Му рече Јуда не Искариот: – Господи, зошто сакаш нам да ни се јавиш, а не на светот?

23Исус одговори и му рече: – Ако некој Ме љуби, ќе го пази словото Мое; и Мојот Отец ќе го возљуби, и ќе дојдеме при него и живеалиште во него ќе направиме.

24Којшто не Ме љуби, не го запазува словото Мое; а словото, што го слушате, не е Мое, туку на Мојот Отец, Којшто Ме испрати.

Крај на св. ап. Јуда

25Ова ви го реков, бидејќи сум со вас.

26А Утешителот, пак, Духот Свети, Кого Отецот ќе Го испрати во Мое име, Он ќе ве научи на сѐ и ќе ви напомни за сѐ што сум ви зборувал.

27Мир ви оставам; мирот свој ви го давам; Јас ви го давам не како што го дава светот.

(Зачало 49)

Да не+ се плаши срцето ваше, ниту да се бои.

28Чувте дека Јас ви реков: одам и пак ќе дојдам при вас. Ако Ме љубевте, вие ќе се зарадувавте што реков; одам при Мојот Отец; зашто Мојот Отец е поголем од Мене.

29И сега ви кажав, уште пред да се исполни, та, кога ќе се исполни, да поверувате.

30Нема веќе многу да зборувам со вас, оти иде кнезот од овој свет, и тој во Мене нема ништо.

31Но, за да разбере светот дека Го љубам Отца и како што Ми заповеда Отецот, така и правам. Станете да си одиме одовде!

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index