Search form

Јован 17

ГЛАВА 17

(Зачало 56)

1Ова го кажа Исус, па ги подигна+ очите Свои кон небото и рече: – Оче, дојде часот; прослави Го Својот Син, за да Те прослави и Синот Твој,

2како што си Му дал власт над секое тело, та преку сѐ што си Му дал, да им даде живот вечен.

3А животот вечен е тоа, да Те познаат Тебе Единиот вистински Бог, и испратениот од Тебе Исуса Христа.

4Јас Те прославив на земјата; го извршив делото, кое си Ми го дал да го извршам.

5И сега, прослави Ме Ти, Оче, во Тебе Самиот, со славата што ја имав во Тебе, уште светот пред да постане.

6Го објавив името Твое на луѓето кои си Ми ги дал од светот; тие беа Твои, и Ти Ми ги даде, и го запазија Твоето слово.

7Сега разбраа дека сѐ што си Ми дал, е од Тебе;

8зашто зборовите, што си Ми ги дал, им ги предадов, и тие ги примија и разбраа навистина, оти од Тебе сум излегол, и поверуваа, дека Ти си Ме испратил.

9Јас за нив се молам; не се молам за сиот свет, туку за оние што си Ми ги дал, зашто се Твои.

10И сѐ Мое е Твое, и Твоето – Мое, и се прославив во нив.

11Веќе не сум во светот, но тие се во светот, а Јас идам при Тебе. Оче Свети, запази ги во Твоето име оние што си Ми ги дал, за да бидат едно, како што сме и Ние.

12Додека бев со нив во светот, Јас ги пазев во Твоето име; оние, кои си Ми ги дал, ги запазив, и никој од нив не погина, освен погибелниот син, за да се исполни Писмото.

13А сега идам при Тебе, и ова му го кажувам на светот, за да ја имаат во себе Мојата радост полна.

Крај на неделата

14Јас им го предадов Твоето слово, и светот ги замрази, зашто тие не се од светот, како што и Јас не сум од светот.

15Не се молам да ги земеш од светот, туку да ги запазиш од злото.

16Тие не се од светот, како и Јас што не сум од светот.

17Освети ги со својата вистина; Твоето слово е вистина.

(Зачало 57)

18Како Ти Мене што Ме испрати+ во светот, и Јас ги пратив во светот;

19и за нив Јас се посветувам, за да бидат и тие посветени во вистината.

20Ама не се молам само за нив, туку и за оние, кои според нивните зборови ќе поверуваат во Мене,

21за да бидат сите едно, како што си Ти, Оче, во Мене, и Јас во Тебе, така и тие да бидат во Нас едно, и да поверува светот, дека Ти си Ме испратил.

22И славата што си Ми ја дал, ним им ја дадов, за да бидат едно, како што сме Ние.

23Јас сум во нив и Ти си во Мене, за да бидат во сѐ едно, и да разбере светот дека Ти си Ме испратил, и нив си ги возљубил, како што Ме возљуби Мене.

24Оче, сакам и оние што си Ми ги дал да бидат со Мене каде што сум Јас, за да ја гледаат Мојата слава што си Ми ја дал, оти Ме возљуби уште пред да се создаде светот.

25Оче Праведни, светот не Те позна, ама Јас Те познав; и овие познаа дека Ти си Ме испратил;

26и им го јавив името Твое, и ќе кажам, та љубовта, со која Ме возљуби Ти, да биде во нив, и Јас во нив.

Крај на петокот

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index