Search form

Јован 7

ГЛАВА 7

(Зачало 25)

1Потоа одеше Исус по Галилеја,+ зашто не сакаше да оди во Јудеја, оти Јудејците сакаа да Го убијат.

2Наближуваше, пак, јудејскиот празник – Правење сеници.

3Тогаш браќата Негови Му рекоа: – Излези одовде и отиди во Јудеја, та и учениците Твои да ги видат делата што ги вршиш.

4Оти никој не прави нешто тајно, кога и самиот сака да се прочуе. Ако Ти ги вршиш овие работи, тогаш покажи се пред светот.

5Зашто и браќата Негови не веруваа во Него.

6А на тоа Исус им одговори: – Моето време уште не дошло, а за вас времето секогаш е погодно.

7Светов вас не може да ве мрази, а Мене Ме мрази, зашто Јас сведочам за него, дека делата негови се лоши.

8Вие отидете на овој празник; Јас нема да излезам на празникот, оти времето Мое уште не се исполнило.

9Кога им го кажа ова, Он остана во Галилеја.

10Но кога браќата Негови отидоа, отиде и Он на празникот, ама не јавно, туку тајно.

11А Евреите Го бараа на празникот и велеа: – Каде е Оној?

12И многу расправии имаше во народот за Него: едни зборуваа дека е добар; а други велеа: не, туку го заблудува народот.

13Ама никој не зборуваше за Него отворено, поради стравот од Јудејците.

Крај на вторникот

(Зачало 26)

14Веднаш, пак, на Преполовението на празникот,+ влезе Исус во храмот и поучуваше.

15И се чудеа Јудејците, велејќи: – Како ги познава Овој книгите, кога не учел?

16Тогаш им одговори Исус и рече: – Учењето Мое не е Мое, туку на Оној Којшто Ме испрати;

17и ако некој сака да ја исполнува волјата Негова, ќе разбере дали ова учење е од Бога, или Јас Самиот од Себе зборувам.

18Којшто говори сам од себе, тој ја бара својата слава; а кој ја бара славата на Оној што Го испратил, Он е вистина и во Него нема неправда.

19Зар Мојсеј не ви даде Закон? Ама никој од вас не го исполнува Законот. Зошто сакате да Ме убиете?

20Народот одговори и рече: – Бесот ли Те фатил? Кој сака да Те убие?

21Одговори Исус и им рече: – Едно дело извршив и сите се чудите.

22Мојсеј ви даде обрезание – макар што тоа не е од Мојсеја, а од татковците – и вие во сабота обрезувате човек.

23Ако човек се обрезува во сабота, за да не се наруши Законот Мојсеев, на Мене ли се гневите што цел човек направив здрав во сабота?

24Не судете според надворешноста, туку судете со праведен суд!

25Тогаш некои од Ерусалим рекоа: – Не е ли Овој, Кого што Го бараат за да Го убијат?

26Ете, јавно говори и ништо не Му велат; да не се увериле и началниците, дека е Он навистина Христос?

27Но, Овој Го знаеме од каде е, а кога ќе дојде Христос, никој не ќе знае од каде е.

28Тогаш Исус, поучувајќи во храмот, извика гласно и рече: – И Мене Ме познавате, и знаете од каде сум; ама Сам од Себе не дојдов, но има еден Вистински, Кој Ме испрати и Кого вие не Го познавате.

29Јас, пак, Го знам, оти сум од Него и Он Ме испрати.

30Тогаш сакаа да Го фатат; ама никој не кладе рака на Него, бидејќи уште не беше дошол часот Негов.

Крај на средата

31И мнозина од народот поверуваа во Него и велеа: кога ќе дојде Христос, зар ќе направи поголеми чуда отколку што направи Овој?

32Чуја фарисеите дека народот така зборува за Него, па фарисеите и првосвештениците испратија слуги да Го фатат.

33Тогаш Исус им рече: – Уште малку време сум со вас, а потоа ќе отидам при Оној, Кој што Ме испрати.

34Ќе Ме барате и нема да Ме најдете; и каде што сум Јас, вие не можете да дојдете.

35А Јудејците си рекоа помеѓу себе: каде ќе оди Овој, па да не можеме да Го најдеме? Да не сака да оди при расејаните меѓу Елините, та и Елините да ги поучува?

36Што значат овие зборови: ќе Ме барате и не ќе Ме најдете; и каде што сум Јас, вие не можете да дојдете?!

(Зачало 27)

37Аво последниот голем ден+ од празникот, застана Исус и извика со висок глас, велејќи: – Кој е жеден, нека дојде при Мене да пие!

38Кој верува во Мене, од неговата утроба, како што е речено во Писмото, ќе потечат реки од жива вода.

39А ова го рече за Духот, Кого ќе Го примат оние што веруваат во Него; оти Светиот Дух уште не им беше даден, бидејќи Исус уште не беше прославен.

40А мнозина од народот, кога ги чуја овие зборови, рекоа: – Навистина, Овој е пророк!

41Други велеа: – Овој е Христос! А некои рекоа: – Зар од Галилеја ќе дојде Христос?

42Не е ли речено во Писмото, дека Христос ќе дојде од семето Давидово и од гратчето Витлеем, од каде што беше Давид?

43И така настана во народот расправија за Него.

44А некои од нив сакаа да Го фатат, но никој не стави рака врз Него.

45Дојдоа, пак, слугите кај првосвештениците и фарисеите и овие им рекоа: – Зошто не Го доведовте?

46А слугите одговорија: – Никогаш човек не говорел така, како Овој Човек.

47Тогаш им одговорија фарисеите: – Да не се прелагавте и вие?

48Поверувал ли некој од началниците и фарисеите во Него?

49Но, овој народ, којшто не го знае Законот, е проклет.

50Никодим, пак, кој беше отишол при Него ноќе, а беше еден од нив, им рече:

51– Осудува ли нашиот Закон човек, додека најнапред не го сослушаат и не узнаат што прави?

52А тие му одговорија и рекоа: – Да не си и ти од Галилеја? Испитај и види дека пророк од Галилеја не се јавил.

Изостави на Духовден и премини на зачало 29

53И секој си отиде во својот дом.

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index