Search form

Лука 13

ГЛАВА 13

(Зачало 70)

1Во тоа време, дојдоа некои и+ Му кажаа за Галилејците, чијашто крв Пилат ја смешал со нивните жртви.

2Исус им одговори и рече: – Мислите ли дека тие Галилејци беа најгрешни од сите Галилејци, та така што пострадаа?

3Не, ви велам: ако не се покаете, сите така ќе загинете.

4Или мислите дека оние осумнаесет души, врз кои падна Силоамската кула и ги уби, беа најгрешни од сите жители на Ерусалим?

5Не, ви велам: но, ако не се покаете, сите така ќе загинете.

6И ја кажа оваа парабола: – Некој човек имаше во своето лозје посадена една смоква, па дојде да бара на неа плод, и не најде.

7Тогаш му рече на лозарот: – ете, три години доаѓам и барам плод на оваа смоква, и не наоѓам; пресечи ја; – зошто само да ѝ пречи на земјата?

8А тој му одговори и рече: – Господаре, остави ја и оваа година, додека да ја опкопам и ѝ ставам ѓубре,

9па, ако роди, добро; ако ли не, тогаш в година ќе ја пресечеш.

Крај на четвртокот

(Зачало 71)

10Во една од синагогите поучуваше Он во+ сабота.

11И ете, една жена имаше слаб дух осумнаесет години; беше згрчена и не можеше да се исправи.

12Штом ја виде Исус, ја повика и ѝ рече: – Жено, се ослободуваш од болеста своја!

13И ги стави рацете Свои врз неа; и таа веднаш стана и Го славеше Бога.

14А старешината на синагогата, негодувајќи што Исус ја излечи во сабота, одговори и му рече на народот: – Има шест дена во кои треба да се работи; тогаш доаѓајте и лекувајте се, а не во саботен ден.

15Но Господ му одговори и рече: – Лицемере, не го одврзува ли секој од вас својот вол, или магаре, од јаслите во сабота и не го води ли да го напои?

16А оваа ќерка Аврамова што ја врзал сатаната, еве, веќе осумнаесет години, не требаше ли да се ослободи од тие врски во саботен ден?

17И кога го зборуваше ова, сите што беа против Него се засрамија; а целиот народ се радуваше за сите славни дела, извршени од Него.

Крај на неделата

(Зачало 72)

18А Он рече: – На што личи+ царството Божјо и со што да го споредам?

19Тоа е како синапово зрно, кое, откако го зеде човек и го посади во градината своја, тоа израсна и стана големо дрво, па и птиците небески си правеа гнезда на неговите гранки.

20И пак рече: – Со што да го споредам царството Божјо?

21Тоа прилега на квас што го зеде жена и го постави во три мери брашно, додека скисне сето.

22И проаѓаше преку градови и села и поучуваше, патувајќи кон Ерусалим.

23Некој, пак, Му рече: – Господи, малку ли се оние што ќе се спасат? А Он рече:

24– Потрудете се да влезете низ тесната врата; зашто ви велам: мнозина ќе сакаат да влезат и не ќе можат.

25Кога ќе стане домаќинот и ќе ја затвори вратата на куќата, а вие, стоејќи однадвор, ќе почнете да чукате и да викате: Господи, Господи, отвори ни! Он ќе ви одговори и ќе рече: не ве знам од каде сте.

26Тогаш ќе почнете да зборувате: ние јадевме пред Тебе и пивме; и по нашите улици Ти поучуваше.

27И Он ќе им рече: ви велам, не ве познавам од каде сте; бегајте од Мене сите што вршите неправда.

28Таму ќе биде плач и крцкање со заби, кога ќе ги видите Авраама, Исаака и Јакова, и сите пророци во царството Божјо, а себеси – истерани надвор.

29И ќе дојдат од исток и запад, и север и југ, и ќе седнат на трпезата во царството Божјо.

Крај на саботата

30И ете, има последни, кои ќе бидат први; а има први, кои ќе бидат последни.

(Зачало 73)

31Во тој ден пристапија некои+ од фарисеите и Му рекоа: – Излези и отиди одовде, оти Ирод сака да те убие!

32И им рече: – Одете и кажете ѝ на таа лисица: еве, истерувам бесови, и лекувам денес и утре, и на третиот ден – ќе завршам;

33но Јас треба да врвам денес, утре и задутре, бидејќи проро кот не може да загине надвор од Ерусалим.

34Ерусалиме, Ерусалиме, ти што ги убиваш пророците и со камења ги засипуваш пратените кон тебе, колку пати сакав да ги соберам чедата твои, како квачка пилињата свои под крилја, ама не сакавте.

35И ете, домот ваш ќе остане пуст. И Јас ви велам, дека нема да Ме видите сѐ додека не дојде време да кажете: благословен е Оној Кој доаѓа во името Господово!

Крај на петокот

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index