Search form

Лука 3

ГЛАВА 3

(Зачало 9)

1Во петнаесеттата година+ од владеењето на царот Тибериј, кога Понтиј Пилат беше управител во Јудеја, а Ирод – четворовласник на Галилеја, и Филип брат му, четворовласник во Итуреја и Трахонитската област, и Лисаниј – четворовласник во Авилинија,

2при првосвештениците Ана и Кајафа, зборот Божји беше кон Јована, синот Захариев, во пустината.

3И тој го обиколи целиот крај околу Јордан, проповедајќи покајно крштение за прошка на гревовите,

4како што е напишано во Книгата, според зборовите на пророкот Исаија, кој вели: „Гласот на оној што вика во пустината: – подгответе го патот Господов и исправете ги патеите Негови;

5секоја долина ќе се исполни и секоја планина и секој рид ќе се снижат; кривините ќе се исправат и нерамните патишта ќе се израмнат,

6и секое тело ќе го види спасението Божјо!“

7А на луѓето што доаѓаа при него да ги крсти, им велеше: – Породи змиини, кој ве научи да бегате од гневот што иде?

8Но, направете плодови достојни за покајание и не почнувајте да говорите во себе: Авраама го имаме за татко! Зашто ви велам, дека Бог може и од овие камења да издигне чеда на Авраама.

9Оти веќе и секирата стои при коренот на дрвото; и секое дрво што не дава добар плод, се сече и фрла во оган.

10И го прашаа луѓето, велејќи: – Тогаш што треба да правиме?

11А тој им одговори и рече: – Кој има две облеки, нека му даде на оној што нема; и кој има храна, нека го прави истото.

12Дојдоа и цариници да се крстат од него, и му рекоа: – Учителе, што да правиме?

13А тој им рече: – Не барајте повеќе, отколку што е определено.

14Го прашаа и некои војници, говорејќи: – А ние што да правиме? И им рече: – Никого не присилувајте, никого не клеветете, и бидете задоволни со вашите плати.

15А на луѓето што чекаа и си помислуваа во срцата свои за Јована, да не е тој Христос,

16Јован им одговараше на сите, велејќи: – Јас ве крштевам со вода; ама доаѓа посилен од мене, Кому што не сум достоен да Му ги одврзам ремењето на обувките Негови: Он ќе ве крсти со Дух Свети и со оган.

17Нему лопатата Му е во раката Негова и Он ќе го очисти гумното Свое, и ќе го собере житото во амбарот Свој, а плевата ќе ја изгори со неизгаслив оган.

18И уште многу друго му проповедаше на народот, утешувајќи го.

Крај спроти Богојавление

(Зачало 10)

19А Ирод четворовласникот, укорен од него+ заради Иродијада, жената на брата му, и заради сите лоши работи што ги беше направил Ирод,

20покрај сето тоа, уште и го затвори Јована во затвор.

21А кога се крсти сиот народ, и Исус, по крштението, кога се помоли на Бога, се отвори небото,

22и Светиот Дух слезе на Него во телесен вид, како гулаб, и се чу глас од небото, кој велеше: Ти си Мојот возљубен Син, на Тебе е Мојата волја.

Крај на понеделникот

(Зачало 11)

23Кога почна Исус да проповеда,+ имаше околу триесет години и беше, како што мислеа, син Јосифов, Илиев,

24Мататов, Левиин, Мелхиев, Јанаев, Јосифов,

25Мататиев, Амосов, Наумов, Еслимов, Нангеов,

26Маатов, Мататиев, Симеев, Јосифов, Јудин,

27Јоананов, Рисаев, Зоровавелов, Салатиилев, Нириев,

28Мелхиев, Адиев, Косамов, Елмодамов, Иров,

29Јосиев, Елиезеров, Јоримов, Мататов, Левиин,

30Симеонов, Јудин, Јосифов, Јонанов, Елиакимов,

31Мелеаев, Маинанов, Мататаев, Натанов, Давидов,

32Јесеев, Овидов, Воозов, Салмонов, Наасонов,

33Аминадавов, Арамов, Есромов, Фаресов, Јудин,

34Јаковов, Исааков, Авраамов, Тарин, Нахоров,

35Серухов, Рагавов, Фалеков, Еверов, Салин,

36Каинанов, Арфаксадов, Симов, Ноев, Ламехов,

37Матусалов, Енохов, Јаредов, Малелеилов, Каинанов,

38Еносов, Ситов, Адамов, Божји.

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index