Search form

Матеј 3

ГЛАВА 3

(Зачало 5)

1Во тие дни+ дојде Јован Крстител и проповедаше во пустината Јудејска,

2и говореше: – Покајте се, зашто се приближи царството небесно!

3Оти, овој е за кого рекол пророкот Исаија, велејќи: „Гласот на оној што вика во пустината: – Подгответе го патот Господов и исправете ги патеките Негови“.

4А самиот Јован имаше облека од камилски влакна и појас од кожа околу половината своја, а храната му се состоеше од скакулци и див мед.

5Тогаш, од Ерусалим и цела Јудеја и од целиот крај јордански доаѓаа при него

6и се крштеваа од него во Јордан, исповедувајќи ги своите гревови.

7А штом виде Јован дека при него идат мнозина фарисеи и садукеи, за да се крстат, им рече: – Породи змиини, кој ви кажа да бегате од гневот што иде?

8Направете, пак, плод достоен за покајание

9и немојте да говорите во себе: Наш татко е Авраам, зашто Бог може, ви велам, и од овие камења да издигне чеда на Авраама,

10и секирата лежи веќе при коренот од дрвото: зашто секое дрво што не дава добар плод се сече и се фрла во оган.

11Јас ве крштевам со вода за покајание, но Оној што иде по мене е посилен од мене; јас не сум достоен да Му ги понесам ни обувките; Он ќе ве крсти со Дух Свети и со оган.

Крај на саботата и на првиот час

12Лопатата е во рацете Негови и Тој ќе го очисти гумното Свое и ќе Си го прибере житото во амбар, а плевата ќе ја изгори со оган што не гасне.

(Зачало 6)

13Тогаш+ дојде Исус од Галилеја на Јордан при Јована, за да се крсти од него.

14А Јован Го запираше, говорејќи: – Јас треба од Тебе да бидам крстен, а Ти при мене ли идеш?

15Но Исус му одговори и рече: – Остави го сега тоа, зашто нам ни претстои да ја исполниме секоја правда. Тогаш Го остави.

16И штом се крсти, Исус веднаш излезе од водата и Му се отворија небесата, и Го виде Духот Божји да слегува како гулаб и да се спушта над Него.

17И ете, глас од небесата говореше: – Овој е Мојот возљубен Син, Кој е според Мојата волја.

Крај на Богојавление и на деветтиот час

Свето Евангелие 2008

© Македонска Православна Црква, Библиско Здружение на Р. Македонија 2008

More Info | Version Index