Search form

Salecebaicne 12

Yakobo wehomalu Pita muc-macka loibong

1Dameng iwa ngictau Herodedi Yesule habu gaibong, yengelacni ngic-ngigac gocne wecebalu basowalecebanale ngagelu bacebalu muc-macka locebawec. Inguc aiyelelu, ilec lobeina yowawa locebalu ngaba aiyelelu wecebanogale ngagewec. 2Ailu yedi mime Yohane haeine Yakobos hudu-baba fitecti welockebong homawec. 3Inguc ailu nganime Yuda-ngic yenge yogo nganilu angac ngageibong, aime ye bret yis mikac nono, yogolec ngiye-ngagec damengka mime Pita inguchac hobalu muc-macka loibong. 4Lolu hudu-baba ngic 16 yengelacni ngic aling 4 ingucti habu 4 heucke domalu damongkeibong. Inguc aime ye ewalicebaicnele hombangte ngiye-ngagec dameng yogo motome+ Pita Yuda-ngic yengele dongewa yowawa lonogale ngagesiwec.

5Inguc aibong Pita ye muc-macka ngiyeemewa Yesule habu yenge duduhuc Wapong milockelu gaibong.

Angelo monicti Pita lukecnowec

6Aime Herode ye mac saeme Pita yowawa lonogale miwec, dameng yogo bangkaleme deboc iwahac hudu-baba ngic yaeckang yeke Pita yekuctiyac sen yaeckangti witickelu loboc hewacnginac fawec. Faebongka hudu-baba ngic gocne yenge nu lobeina damong domaibong. 7Yenge mac kwelina inguc fabong Sugucnele angelo monicti yogowahac biyac fikelu iwa domame mac kweline yogo angoleyackewec. Angoleme angelodi Pita magocina bauwalu yeuckelu miwec, “Ga biyac fangkec.” Miyemewa iwahac sen Pitale molewacni fotockelu wame 8angelodi miwec, “Ga umbikagone hefelu hige-ebecgone holeng hauna.” Yogo aiyackeme edolu miwec, “Ngakpigone dalicne holeng haume balaibecnuc.” 9Inguc mime Pita fangkelu angelo balaibelu hikewec. Hikelu angelodi pasi yela bawec, ilec ngageme gung-didicka ingucne aiwec. 10Aime yeke nu yaeckangte damong domaiboc, yogo ewalicepalu hike aen nu sugucne taonka pec bangkaleboc, yogo yeuctiyac angkeme hauiboc. Haulu yefewa hikelu angelo ye iwa aockewec.*

11Inguc aime Pita ye ngage-ngageine dulungkeme yanguc miwec, “Yakumac ngage-motogabac, Sugucnedi angeloine saleme Herodele molewacni ailu Yuda-ngic yenge ngagesiibong yogowacni baicnugac.”

12Inguc ngage-motolu Mariale macka hikewec. Maria ye Yohane wacine monic Mareko, yele nenggac. Iwa homacnedi kpatulelu milockelu ngiyeibong. 13Ngiyeebongka Pita ye mac odale nuina hike domalu nu holeme kwelec-adu monic wacine Roda, uc yogo ngagelu wame 14Pitadi yowa mime malacine ngagelu ye nu mi witiyecnowec, ye moc mac kwelina felu miwec, “Pita kwesilu odale nuwa domagac.” Milu edocebawec.

15Edocebame yenge ngagelu miibong, “Kwelegone sifuwegac, me?”

Mibong, ye sanangneyac miwec, “Foinac benang, yedi domagac.”

Mime yengi miibong, “Yogo angeloine mecne.”

16Aime Pita ye holeluyac domame yenge nu witielu yeicne nganilu kwatackeibong. 17Kwatackebong ye mole balang baduyelelu mimacebalu Sugucnedi muc-mackacni lukecnome wawec, ilec yowa-siduc aiyelelu miwec, “Ngenge siducne yago Yakobos nga agofocnonggeng ngage-ngagesingkolec edocebadaing.” Inguc milu baickelu mac monicka hikewec.

Herode ye sowacnele ameine bawec

18Mac saeme hudu-baba ngic yenge Pita basackelu miibong, “Ye wenuc hikegac?” Milu kwatackelu dabiyeibong.* 19Herode ye Pita bafuwaningte mime basacke-bibiyeibong. Basackebong mi-uwac aiyeleme miyac aime ye hudu-baba ngic yenge nu damong yogo wehomacebaningte mimoctowec. Ailu yeicne Yudeya himong hegilelu Sesarea haulu gawec.

20Herode ye Tair nga Saidon taonte ngic-ngigac yengele aalic ngageyelelu gawec. Yogo yangucte, yenge noba-nosingngineng Herodedi himong damongkelu gawec iwacni balu gaibongte ailu yenge kpaduckelu ngaba miyac aime kwele-mogung fikenale yela hikelu uwacnoibong. Yenge molic-molic Herodele bole-ngic monic wacine Blastus, ye Herodele gung-fafa mac damongkelu gawec, ye hikelu nganibong yedi yengeholec inguc ainingte mudockeibong.

21Herodedi yowa yogo ngagelu yogolec ameine bafaliyeyelenogale dameng edocebawec. Dameng iwa ye ngictau ngakpiine holelu ngictau ngiye-ngiyeina wangiyelu yowangineng edocebawec. 22Edocebame ngic yenge sasawadi aukwelu yanguc miibong, “Yowa yogo ngic-yowa miyac, yogo wapong monicte yowa.” 23Aime Herode ye Wapong mi afeewec aime dameng yogowahac Sugucnele angelodi ye weme umbengti hilu nome homawec.*

24Aime Wapongte yowa sugulelu hikewec.*

25Aime Banabas nga Sol yeke Yerusalem iwa bole yogo bayackeboc motome hefaliyelu Antiok hikenogale Yohane wacine monic Mareko mengockeboc yenge momoc hikeibong.*

Wapongte hibi: Luka, Salecebaicne, nga Galata

© 2013, Wycliffe Bible Translators, Inc. All rights reserved. More Info | Version Index