Search form

Salecebaicne 3

Pitadi ngic hige-sowac bamadickewec

1Hadeng monicka mac awelelu 3 kilok aime mimiloc dameng aime Pita nga Yohane yeke Ibu-kulucka feiboc. 2Aime ngic monic hige-sowac nenggacte gobe kwelinacni ingucne fikewec, ye Ibu-kulucte odale nu monic wacine Nusalic, iwa hadengne hadengne tengke felu lobong ngiyelu gawec. Ye ngic-ngigac Ibu-kulucka fec-wac ailu gaibong, yengela kwele-madicka monengte milocebalu gawec. 3Ngic yogodi Pita nga Yohane yeke Ibu-kulucka fenogale aiboc nganicepalu inguchac kwele-madicka monengte milocepawec. 4Milocepame yeke ye ngani-lilickeiboc. Ngani-lilickelu Pitadi yanguc edowec, “Ga nganicnupac!”* 5Inguc mime ngagewec, “Yeke wiyac monic nelenicte migabiyec.” Inguc ngagelu donge hilalu nganicepawec.

6Nganicepame Pitadi yanguc edowec, “Na monengne mikac aime wiyac moniyang fanelegac, yogo sugu baficgube! Yesu Kristo Nasaret-hocni, yele wacka fangkelu hikec.”* 7Inguc milu mole-foleine balu bafangkeme iwahac higeine nga dikilikicine sanangkewec. 8Sanangkeme kucineholec wintacke fe-wac domalu yekeholec Ibu-kulucka momoc feibong. Felu yeuctiyac fec-wac nga yefe lec-welec ailu Wapong mimadickewec. 9Wapong mimadickelu lec-welec aiyemewa ngic-ngigac gocne yengi nganilu miibong, 10“Ye hocne Ibu-kulucte nu wacine Nusalic, iwa monengte milocebalu gawec.” Inguc milu ngani-motolu kwatackelu medecebawec.

Pitadi Yesule fungine edocebawec

11Ngic ye Pita nga Yohane yeke bakatacepalu ngic-ngigac homacnedi Ibu-kulucte sobeng mecina dakec monic fawec, wacine Solomonte Dakec, iwa yekela hikelu kpaduckelu mimedec aiibong. 12Aibong Pitadi nganicebalu ngic-ngigac yanguc edocebawec, “Israel ngic, ngenge ngic yago nganilu mimedec mi aidaing. Ailu ngenge noke mi nganicnupadabiyeng. Pasi yogo nokele kucka mi fikegac nga yogo noke Sugucnele dongewa madicne gagabelec i mi ngagedaing. 13Yogo miyac, ngambofocnonggeng Abraham nga Aisak ailu Yakobo, yengele Wapong ye hocne bole-madecine Yesu afeewec. Ngengebac ye lobe holecnolu Israel yengele alingkacni miyac, yogo yengele molewa loibong. Foinac, Pailatdi yowaine wosaelu lukenogale mimoctowec. Aime ngengebac hegileibong.* 14Ye hocne ngic gbagbacne nga pasi dondonne bagagac+ nga ngengebac ye lobe holecnoibong. Ailu kindololo-ngicti ngic monic weme homawec, ngenge ye hocne lukengelenale sanangne mibong 15gagale micne-baba weibong. Nga Wapongti ye homackacni bagboliyeme fangkewec, noke yogo nganiibecte migabelec. 16Nga noke Yesule wac wackelu ngagesingkegabelecte ngic yago nganigabiyeng, ye kucineholec aigac. Nga Yesule wacka ngage-ngagesingkolec gagabelec, ilec ailu ye madickebenangkegac. Ngenge sasawadi pasi yogo nganigabiyeng.

17“Alingfocne, na ngagegabac, ngenge Yesule fungine mi ngage-motolu inguc aiibong, nga damongfocngineng yenge ingucneyac aiibong.* 18Foinac, Wapongti Mesia mimoctowec, ye doic sugucne ngagecgu homanale Wapongte sinaic mimi sasawa yengele micka yowa lome miibong, yogo sasawa Wapong miweckasoc fikeyackewec. 19Ilec ngenge bikicngineng miyac ainale kwelengineng hefaliyeme Wapongta hikedaing.* Inguc aidaingtewa Sugucnedi kwelengineng basanangebadaicte. 20Ailu biyachac Mesia bawosaengelewec, ye salengeledaicte, yogo Yesu hocne. 21Ye honocmengka felu gaemewa, damengine weleme kwesilu wiyac sasawa bamadicebadaicte. Ilec yowa Wapongti esecne benang sinaic mimifocine gbagbacne benang yengele micka lome mibong yegengkewec. 22Mosesdi yanguc miwec,

‘Sugucne Wapongnginengti ngengele alingkacni sinaic mimi monic na ingucne bafuwangeledaicte yedi yowa sasawa midaicte, yogo ngagedabiyeng. 23Aime monicti sinaic mimi yogolec yowa ngagelu mi balaibedaictewa, ye alingnginangkocni baickelu wehomadaicte.’ (Yefe-yowa 18:15,18-19)

24“Dameng yagowa aibaba fikegac, yogo Samuellacni Wapongte sinaic mimi sasawa doma ofeibong, yengi biyac mibong yegengkewec. 25Wapongti ngambofocnonggeng yengeholec dodofic ailu Abraham yanguc edowec,

‘Ngambogone bole badaicte, yefe iwa himongne himongne ngic-ngigac yambungebadacte.’ (Fike-fike 22:18; 26:4)

Israel, ngenge dodoficnonggeng yogo nga Wapongte sinaic mimi yengele yowa miicne yogolec noineine ngengileng balu gagaing. 26Molickelu ngengele hocne ngagesilu Wapongti bole-madecine saleme walu fikewec, yogo ngenge sasawa yambungngebanale kindololo yefewacni baicngebadaicte.”*

Wapongte hibi: Luka, Salecebaicne, nga Galata

© 2013, Wycliffe Bible Translators, Inc. All rights reserved. More Info | Version Index