Search form

Lucas 1

1Kumusta ka Sir Teofilo. Mahan-in to mgo otow no naningkamot to pagsuyat to mgo hitabu kani ita to diya panahon ni Jesu-Cristo. 2Insuyat dan to ingnawnangon to diya mgo otow no yagboy nakakita to sikan no mgo hitabu likat pad to sinugdanan. Sikan namakakita to mgo hinang ni Jesus mignawnangon isab to seini Madojow no Nawnangonon. 3Na siak, pighona-hona ku no angay ku seini ogsuyaton ikow to madojow no pagkahan-oy, su yagboy kud man nasusi likat pad to sinugdanan 4agun mamaanan nu no tinood yagboy to diya ing-anad ikow.

To Pagtag-an to Pag-anak ki Juan no Magbawtismuhay

5To diya panahon no si Herodes to mighari to prubinsya to Judea, meyduon otow no iyan ngadan si Zacarias no mey katongdanan duon to Bayoy to Diyus. Sakup sikandin to panon ni Abias no kaliwat ni Aaron no una no magdudumaya to tinuuhan to mgo Hibru. Iyan asawa din si Elisabet no kaliwat da isab ni Aaron. 6Nasajaan to Diyus su matarong sikandan no mag-asawa aw matinumanon to kasuguan din dow mgo tumanon. 7Di puli on sikandan nangkamanigaon no wada panganak si Elisabet.

8-9Na, pag-abut to panahon no iyan ogtuman onsi Zacarias duon to Bayoy to Diyus, naripahan sikandin no iyan ogsed su ogtutung to insensu. Su igpabaja to ripa dow hintawa to sikan mgo magdudumaya to ogtuman to sikan. 10Tagaod to migtutung si Zacarias to insensu, naman-ampu to kaotawan diya to yuwas.

11Puli nakatokow, meyduon anghil to Ginuu no migyogwa duon ki Zacarias. Migtindog sikan anghil duon dapit to kalintuu to sikan tutunganan to insensu. 12Pagkita ni Zacarias to sikan anghil, pigkobaan sikandin. 13Di kagi to sikan anghil, “Kona ka ogkahaedok Zacarias. Pigdinog to Diyus to pag-ampu now. Si Elisabet no asawa nu ogpanganak to yukos. Juan to ihingadan nu kandin. 14Ko i-anak on sikan no bata, ogkalipay kow hasta to kaotawan 15su ogkadongganon sikandin duon to atubangan to Ginuu. Kona sikandin og-inom to maisog no inomon. Sugud pad to pagkaotow din, oggahoman on to Ispiritu Santu. 16Mahan-in to angod now no mgo kaliwat ni Israel+ no ogpabalikon din diya to Ginuu no Diyus dan. 17Og-unahan din to Ginuu aw oggahoman sikandin to Ispiritu Santu angod ki Elias no kibali ba-ba to Diyus to diya una. Ogpapag-ulion din to mgo amoy dow mgo anak. Aw to mgo otow no masinupakon ogpabalikon din to pagkamatarong agun mahinaat to kaotawan to pagtidow to Ginuu.”

18Dajun usipa ni Zacarias sikan anghil, “Og-amonuhon ku man to pagkiyaya no tinood sikan pig-ikagi nu no manigaon ad man, hasta bujag on isab to asawa ku?”

19Migtabak sikan anghil, “Siak si Gabriel no suguonon to Diyus. Pigpaandini a din to pagnawnangon ikow to seini madojow no nawnangonon. 20Di sikuna, su wada nu man tuuhi to kagi ku, ogkapoha ka kotob no matuman on sikan pig-ikagi ku ikow.”

21Na, to mgo otow no migtatagad diya to yuwas nangkaboyong dow nokoy no nayugoy si Zacarias diya to sed. 22Pagyuwas din, konad on sikandin ogpakaikagi. Puli nanda ogsingyas, kaling nakasabut to mgo otow no meyduon impakita kandin to Diyus duon to sed.

23Anoy man no tapus on to pagtuman onni Zacarias duon to Bayoy to Diyus, mig-uli sikandin diya to banwa din. 24Wada kayugoy, nangidam si Elisabet no asawa din. Migpakamonang sikandin duon to bayoy sed to lima no buyan. Kagi din, 25“Pigtabangan a yagboy to Ginuu. Kona ad ogkatamay to mgo otow su ogpanganak a da naan.”

To Pagtag-an to Pag-anak ki Jesus

26Anoy man no ikaonom on no buyan to pagkabodos ni Elisabet, pigsugu to Diyus sikan anghil no si Gabriel diya to yunsud to Nazaret no sakup to Galilea. 27Su meyduon igpaikagi din duon to daega no iyan ngadan si Maria. Asawahon sikandin ni Jose no kaliwat ni Hari David. 28Pagyogwa to sikan anghil, mig-ikagi sikandin, “Iya, lipay ka su pigmarojawan ka yagboy to Diyus. Duma sikandin ikow.”

29Naboyong si Maria dow nokoy to igpasabut to pig-ikagi to sikan anghil. 30Di mig-iling sikan anghil, “Kona ka ogkahaedok Maria, su nalipay to Diyus ikow. 31Su ogkabodos ka aw og-anak ka to yukos. Jesus to ihingadan nu kandin. 32Yabow yagboy sikandin aw ogkatawag no Anak to Diyus no Yabow to Tibo. Igbogoy kandin to Ginuu no Diyus to pagkahari ni David no minuna din. 33Ogmanduan din to kaliwatan ni Jacob hangtod to wada katapusan. Wada pagkatapus to paghari din.”

34Mig-usip si Maria, “Og-amonuhon man to pagkatuman to sikan no daega a pad man yagboy?”

35Migtabak sikan anghil, “Ogkonsadan ka to Ispiritu Santu aw oggahoman ka to Diyus no Yabow to Tibo. Kaling man sikan balaan no bata ogkatawag no Anak to Diyus. 36Aw ngani man si Elisabet no parenti nu no nabujag on no wada panganak, di ikaonom on no buyan to pagkabodos din. 37Su wada malisod no kona ogkahimuan to Diyus.”

38Kagi ni Maria, “Suguonon a to Ginuu ku. Matuman podom sikan pig-ikagi nu kanay.” Dajun likat sikan anghil.

To Pagbisita ni Maria ki Elisabet

39Wada kayugoy migdali si Maria to pag-andiya ki Elisabet no mig-ugpa diya to songo yunsud duon to kabubunganan no sakup to Judea. 40Pagtidow din duon to bayoy onni Zacarias, pigpangumusta din si Elisabet. 41Pagdinog ni Elisabet to pangumusta ni Maria, mighisu to maagbot sikan bata duon to sed to gotok din. Dajun piggahoman si Elisabet to Ispiritu Santu 42aw makaikagi sikandin to maagbot, “To tibo mgo bohi, sikuna to pigmadojawan to Diyus. Ogmadojawan din isab sikan bata no ig-anak nu. 43Hintawa a man no pig-andinihan nu no inoy to Ginuu ku? 44Su pagdinog ku to pangumusta nu, mighisu to maagbot seini bata kani to sed to gotok ku tongod to kalipay. 45Madojow ka su migtuu ka man no ogkatuman to diya kagi to Ginuu ikow.”

To Pagsaja ni Maria to Diyus

46Dajun ikagi si Maria,

“Ogsajaon ku to Ginuu ku.

47Malipajon a tongod to Diyus no Manyuyuwas ku,

48su pigkayuujan a din no obos no suguonon din.

Sugud kuntoon, to tibo mgo otow og-iling no madojow a

49su kabeynganan yagboy to pigpanghinang kanay to Gamhanan no Diyus.

Balaan yagboy sikandin.

50Ogkayuujan din to mgo otow no ogtahud yagboy kandin

to diya una dow kuntoon aw hangtod to wada katapusan.

51Impakita din to pagkagamhanan din.

Pigpagsuwoy-suwoy din to mgo otow no mapayabi-yabihon.

52To mgo magmamandu pigpanggawangan din to katongod,

di to mgo mapaobsanon pigpayabow din.

53To pigpamontas pighantoy din,

di to mgo sapian pigpanggawangan din.

54-55Pigtabangan din to mgo kaliwat ni Israel no suguonon din.

Wada din kalingawi to saad din to pagkayuuy ki Abraham dow to mgo kaliwat din

hangtod to wada katapusan.”

56Tatoyu no buyan to pag-ugpa ni Maria duon ki Elisabet ayha sikandin uli.

To Pag-anak ki Juan no Magbawtismuhay

57Na, pag-anak ni Elisabet, yukos iyan to ing-anak din. 58Pagdinog to mgo sumbayoy dow kasuunan din no mig-anak on sikandin, migduyug sikandan to kalipay din, su pigkayuujan yagboy si Elisabet to Ginuu.

59Anoy man no wayu on no aedow sikan bata, namanhimun sikandan su ogtulion aw oghingadanan sikandin. Igsangay podom sikandin ki Zacarias no amoy din, 60di wada sugut si Elisabet. Kagi din, “Kona ogkahimu. Si Juan da to ighingadan to seini bata.”

61Kagi dan ki Elisabet, “Di wada pad parenti now no angod to sikan no ngadan.” 62Pigsingyasan dan sikan amoy dow hintawa to ighingadan din to sikan bata.

63Dajun pamuju si Zacarias to ogkasuyatan aw suyat, “Juan to ihingadan kandin.” Kaling yagboy natingaya sikan tibo mgo otow no nahimun duon. 64Duon-dajun nakaikagi si Zacarias, aw pigsaja din to Diyus. 65To mgo sumbayoy dan hilabi naboyong to sikan milagru no pighinang to Diyus, aw migtangkap to nawnangonon bahin to sikan diya to kabubunganan to prubinsya to Judea. 66Sikan nadinog to mgo otow pighipidan duon to ginhawa dan. Kagi dan, “Nokoy man buwa to ogkadeygan to sikan no bataa?” Su mapajag no piggahoman sikandin to Diyus.

To Intag-an ni Zacarias

67Na, si Zacarias no amoy to sikan bata piggahoman to Ispiritu Santu. Dajun din naikagi to impaikagi kandin to Diyus no pig-iling,

68“Sajaon to Ginuu no Diyus ta no mgo kaliwat ni Israel,

su mig-andini sikandin to pagyuwas to kaotawan din.

69Igbogoy din ita to gamhanan no Manyuyuwas

no kaliwat ni Hari David no suguonon din.

70Impabaja to Diyus to kagi din to mgo otow no kibali ba-ba din to diya una

71no pig-iling no ogyuwason ki din to mgo kuntra ta.

72Pigkayuujan din to mgo kaaw-apuan ta.

Wada din kalingawi to kasabutan din kandan.

73Insaad din ki Abraham no minuna ta duma to sapa

74no ogtabangan ki din

agun kona ki madaog-daog to mgo kuntra ta

aw kona ki mahaedok to pagtuman kandin

75no matarong ki kanunoy aw wada sae duon to atubangan din.

76Na, sikuna no bata, og-ilingon ka to kibali ba-ba to Diyus no Yabow to Tibo,

su og-una-una ka to Ginuu agun mahinaat nu to kaotawan to pagtidow din.

77Ogmaanon nu to angod ta no mgo Hibru no ogkayuwas sikandan

ko pasayluhon to mgo sae dan

78pinaagi to kae-at to Diyus ita.

Sikan no pagyuwas din ita iyan ogkaangodan to bag-u ogsilat no soga.

79Ogtang-awan din to mgo otow

no mig-ugpa duon to kadigyoman no wadad on pag-iman

su nasakup sikandan to kamatajon.

Sikandin to oghindu ita to dayan no og-unugon ta

agun no mahiuli kinow dow to Diyus

aw malinow to ginhawa ta.”

80Na, migtulin sikan anak ni Zacarias no maalamon dow madojow to kinaiya. Pagtulin din on, migpapaawoy sikandin diya to matahay no banwa kotob to panahon no og-atubangon din on to angod din no mgo kaliwat ni Israel.

Kasuyatan to Diyus

© 1999, Wycliffe Bible Translators, Inc. All rights reserved. More Info | Version Index